 |
ວັນທີ 16 ມີນາ 2020 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວ ຕິດຕາມການເຝົ້າລະວັງ, ປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງເຊື້ອໄວຣັດໂຄວິດ-19.(ພາບ: ຂປລ)
ທ່ານ ທອງລຸນ ສີສຸລິດ ໄດ້ຮັບຟັງ ການລາຍງານໂດຍຫຍໍ້ ກ່ຽວກັບສະພາບການ ຈັດຕັ້ງປະຕິບັດມາດຕະການຕ້ານ ແລະ ຄວບຄຸມ ການແຜ່ລະບາດຂອງເຊື້ອໄວຣັດໂຄວິດ-19 ຈາກພາກສ່ວນທີ່ກ່ຽວຂ້ອງ. ຫລັງຈາກນັ້ນ, ທ່ານ ທອງລຸນ ສີສຸລິດ ກໍໄດ້ຖະແຫລງ ຂ່າວຕໍ່ສື່ມວນຊົນ ໂດຍທ່ານ ໄດ້ຢືນຢັນວ່າ: ປັດຈຸບັນ ສປປ ລາວ ໄດ້ມີຄວາມພ້ອມໃນທຸກດ້ານ ເພື່ອຮອງຮັບການລະບາດ ຂອງພະຍາດນີ້ ທີ່ອາດຈະແຜ່ລະບາດ ຢູ່ ສປປ ລາວ ເປັນຕົ້ນ ໄດ້ມີຄວາມພ້ອມທາງດ້ານບຸກຄະລາກອນ, ອຸປະກອນທາງການແພດ, ສະຖານທີ່ຮອງຮັບຄົນເຈັບ ໂດຍໄດ້ກຳນົດເອົາ ໂຮງໝໍມິດຕະພາບ 150 ຕຽງ ແລະ ໂຮງໝໍສູນກາງ 103 ເປັນຫລັກ ເຊິ່ງໂຮງໝໍດັ່ງກ່າວ, ກໍມີຄວາມພ້ອມທາງ ດ້ານອຸປະກອນທີ່ທັນສະໄໝ, ຫ້ອງປິ່ນປົວ ແລະ ອື່ນໆ. ພ້ອມນັ້ນ, ທ່ານນາຍົກລັດຖະມົນຕີ ຍັງໄດ້ຮຽກຮ້ອງ ໃຫ້ພາກສ່ວນທີ່ກ່ຽວຂ້ອງ ໂດຍສະເພາະ ຢູ່ບັນດາດ່ານເຂົ້າ-ອອກເມືອງຕ່າງໆ ໃຫ້ເພີ່ມທະວີເອົາໃຈໃສ່ ກວດຄົນເຂົ້າ-ອອກເມືອງ ຢ່າງເຄັ່ງຄັດ ພ້ອມທັງໃຫ້ປະຊາຊົນລາວບັນດາເຜົ່າ ເປັນເຈົ້າການເຝົ້າລະວັງ ແລະ ຈັດຕັ້ງປະຕິບັດ ຕາມບັນດາມາດຕະການ ທີ່ລັດຖະບານວາງອອກ ແລະ ຕິດຕາມຂ່າວ ກ່ຽວກັບການແຜ່ລະບາດ ຂອງພະຍາດນີ້ເປັນປະຈຳ, ບໍ່ໃຫ້ເຜີຍແຜ່ ຫລື ນຳສະເໜີຂ່າວຕ່າງໆ ກ່ຽວກັບພະຍາດນີ້, ທີ່ບໍ່ແມ່ນມູນຄວາມຈິງອອກສູ່ສັງຄົມ.
ຢູ່ພາກພື້ນອາຊີຕາເວັນອອກສ່ຽງໃຕ້, ຕໍ່ໜ້າການຜັນແປຢ່າງສັບສົນຂອງສະພາບການເຊື້ອພະຍາດ, ບັນດາປະເທດໄດ້ສືບຕໍ່ຜັນຂະຫຍາຍບັນດາມາດຕະການສະກັດກັ້ນໄວຣັດ SARS-CoV-2 ແຜ່ລະບາດ. ວັນທີ 15 ມີນາ, ທ່ານ Joko Widodo ປະທານາທິບໍດີອິນໂດເນເຊຍ ໄດ້ສະເໜີໃຫ້ປະຊາຊົນຮັກສາໄລຍະຫ່າງການສໍາຜັດຍ້ອນວ່າການກະທໍານີ້ແມ່ນສິ່ງສໍາຄັນທີ່ສຸດຕ້ອງໄດ້ເຮັດໃນປະຈຸບັນນີ້. ໃນຂະນະນັ້ນ, ທ່ານ Samdech Techo Hun Sen ນາຍົກລັດຖະມົນຕີກໍາປູເຈຍ ກໍ່ຮຽກຮ້ອງໃຫ້ປະຊາຊົນປະເທດນີ້ຈົ່ງມີຄວາມທຸ່ນທ່ຽງ ແລະໝູນໃຊ້ບັນດາມາດຕະການທຳຄວາມສະອາດຢ່າງປະຈໍາເພື່ອສຸຂະພາບຂອງຕົນເອງ ແລະຂອງສະມາຊິກໃນຄອບຄົວ.
ຕາມອົງການອະນາໄມໂລກ (WHO) ແລ້ວ, ຊັບສິນໃຫຍ່ທີ່ສຸດຂອງມະນຸດໃນການຕໍ່ສູ້ຕ້ານເຊື້ອພະຍາດ Covid-19 ໃນປະຈຸບັນຕົວຈິງແມ່ນຈິດປັນຍາ ແລະຄວາມສາມັກຄີ. ການຕໍ່ສູ້ຕ້ານເຊື້ອພະຍາດ Covid-19 ບໍ່ແມ່ນການຕໍ່ສູ້ສະເພາະຂອງໃຜມັນ ຫຼື ຂອງປະເທດໃດປະເທດໜຶ່ງ, ສະນັ້ນບັນດາປະເທດຕ່າງໆຄວນເພີ່ມທະວີການແລກປ່ຽນຂໍ້ມູນຂ່າວສານ ແລະໜູນຊ່ວຍເຊິ່ງກັນ ແລະກັນດ້ວຍຄວາມຕິດສິນໃຈພ້ອມກັນເອົາຊະນະເຊື້ອພະຍາດນີ້ໃຫ້ໄດ້.
（ໄຊພອນ）
