 |
ທ່ານ ທອງລຸນ ສີສຸລິດ ນາຍົກລັດຖະມົນຕີ ຕ້ອນຮັບທ່ານ Qu Dongyu ຜູ້ອຳນວຍການໃຫຍ່ອົງ ການອາຫານ ແລະ ການກະເສດ (FAO)
ໂອກາດນີ້ ທ່ານນາຍົກລັດຖະມົນຕີ ກໍໄດ້ຕີລາຄາສູງຕໍ່ການຢ້ຽມຢາມ ສປປ ລາວ ຂອງທ່ານ Qu Dongyu ແລະ ຄະນະໃນຄັ້ງນີ້ ເຊິ່ງເປັນການສືບຕໍ່ຮັດແໜ້ນສາຍພົວພັນການຮ່ວມມື ລະຫວ່າງ ລາວ ແລະ ອົງການ FAO ໃຫ້ແໜ້ນແຟ້ນຂຶ້ນກວ່າເກົ່າ ພ້ອມນີ້ສອງຝ່າຍຍັງໄດ້ແລກປ່ຽນ ປຶກສາຫາລືກ່ຽວກັບໂຄງການຮ່ວມມືໃນໄລຍະຜ່ານມາ ແລະ ແນວທາງການຮ່ວມມືໃນຕໍ່ໜ້າ ໂດຍສະເພາະ ຂໍ້ລິເລີ່ມຈາກມືສູ່ມື ຂອງຜູ້ອຳນວຍການໃຫຍ່ຄົນໃໝ່ ເພື່ອນຳເອົາການຊ່ວຍເຫຼືອຈາກບັນດາຄູ່ຮ່ວມພັດທະນາ ມາສູ່ບັນດາປະເທດທີ່ມີຄວາມຈຳເປັນ ນອກນີ້ ທ່ານນາຍົກລັດຖະມົນຕີຍັງໄດ້ສະແດງຄວາມຂອບໃຈອົງການ FAO ທີ່ໄດ້ປະກອບສ່ວນລະດົມຂົນຂວາຍທຶນເຂົ້າໃນການປັບປຸງ ແລະ ພັດທະນາວຽກງານໃນຂົງເຂດກ່ຽວຂ້ອງ ໂດຍຜ່ານໂຄງການຕ່າງໆທີ່ໄດ້ຈັດຕັ້ງປະຕິບັດຮ່ວມກັບຂະແໜງການພາກລັດຂອງລາວ ລວມເຖິງ ໂຄງ ການຊ່ວຍເຫຼືອໃນອະນາຄົດ ພ້ອມທັງໄດ້ລາຍງານວຽກງານບຸລິມະສິດຕ່າງໆຂອງລັດຖະບານ ໂດຍສະ ເພາະ ການສຸມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8 (2016-2020) ກໍຄື ການກະກຽມໃຫ້ການສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ຄວາມພະຍາຍາມເຮັດໃຫ້ປະເທດລາວຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໂດຍສະເພາະ ການລຶບລ້າງຄວາມທຸກຍາກ ແລະ ການລຶບລ້າງໄພອຶດຫິວ ການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ເຊິ່ງລ້ວນແຕ່ເປັນວຽກທີ່ຕິດພັນໂດຍກົງກັບບຸລິມະສິດ ແລະ ເປົ້າໝາຍຂອງອົງການ FAO ການສືບຕໍ່ ແລະ ຮັດແໜ້ນການຮ່ວມມືກັບອົງການມີຄວາມສຳຄັນ.
（ແຫຼ່ງຂໍ້ມູນ： vientianemai.net）
