ລາວຍັງບໍ່ພົບຜູ້ຕິດເຊື້ອພະຍາດໄວຣັສໂຄໂຣນາ

16:30 | 11/02/2020

ໃນຫຼາຍມື້ທີ່ຜ່ານມາ ຫຼາຍຄົນກໍ່ອາດຈະໄດ້ຍິນຂ່າວລືກ່ຽວກັບກໍລະນີທີ່ມີຜູ້ເສຍຊີດວິດ ຍ້ອນພະຍາດອັກເສບ ປອດຈາກເຊື້ອຈຸລະໂລກສາຍພັນໃໝ່ ຫຼື ໄວຣັສໂຄໂຣນາ ໃນວັນທີ 9 ກຸມພາ 2020 ກະຊວງສາທາລະນະສຸກ ໄດ້ອອກມາຢືນຢັນວ່າຜົນການກວດເບື້ອງຕົ້ນ ແມ່ນບໍ່ພົບເຊື້ອພະຍາດໄວຣັສໂຄໂຣນາ ພ້ອມທັງຢືນຢັນວ່າ ສປປ ລາວ ຍັງບໍ່ພົບກໍລະນີຜູ້ຕິດເຊື້ອດັ່ງກ່າວ ທັງຈະສືບຕໍ່ປະຕິບັດມາດ ຕະການເຝົ້າລະວັງ ແລະ ການປ້ອງກັນການ ລະບາດຂອງພະຍາດໂຄໂຣນາໄວຣັສ.

ລາວຍັງບໍ່ພົບຜູ້ຕິດເຊື້ອພະຍາດໄວຣັສໂຄໂຣນາ.(ພາບ: vientianemai.net)

ມາເຖິງປັດຈຸບັນ ສປປ ລາວ ມີກໍລະນີສົງໃສທັງໝົດ 19 ກໍລະນີ ຜ່ານການເກັບຕົວຢ່າງ ກວດໃນ ຫ້ອງວິເຄາະແມ່ນບໍ່ພົບເຊື້ອ ແລະ ເພື່ອປ້ອງກັນ ເຝົ້າລະວັງພະຍາດນີ້ແມ່ນຈະສືບຕໍ່ຕິດຕາມກໍລະນີ ຜູ້ທີ່ຢູ່ໃກ້ຊິດ ຄົນເຈັບທີ່ຖືກຢັ້ງຢືນວ່າຕິດເຊື້ອໄວຣັສໂຄໂຣນາ ທີ່ເຂົ້າມາທ່ຽວລາວ ເມື່ອກັບ ສປ ຈີນ ແລ້ວກວດພົບວ່າຕິດເຊື້ອ ເຊິ່ງ ທີມງານສາທາລະນະສຸກສືບຕໍ່ຕິດຕາມຢ່າງໃກ້ຊິດ ທັງບຸກຄົນທີ່ເຮັດວຽກໃນການບໍລິການທ່ອງທ່ຽວ ພະນັກງານຂັບລົດ ຜູ້ບໍລິການໃນໂຮງແຮມ ຮ້ານອາຫານ ສະຖານທີ່ທ່ອງທ່ຽວທຸກຄົນທີ່ມີການສຳພັດຢູ່ແຂວງຫຼວງພະບາງ ຈຳນວນ 86 ຄົນ ແຂວງຫຼວງນ້ຳທາ ແລະ ອຸດົມໄຊໄດ້ມີການຕິດຕາມຢ່າງໃກ້ຊິດປັດຈຸບັນ ກຸ່ມຄົນດັ່ງກ່າວ ແມ່ນຍັງມີສຸຂະພາບທີ່ແຂງແຮງດີ ນອກຈາກນັ້ນ ແມ່ນໄດ້ສືບຕໍ່ຕິດຕາມແຮງງານຈີນ ແລະ ນັກສຶກສາຈີນ ທີ່ມາເຮັດວຽກ ແລະ ຮຽນຢູ່ ສປປ ລາວ ໄດ້ມີການວາງແຜນລົງໄປໃຫ້ຂໍ້ມູນຂ່າວສານໂດຍສະເພາະກັບເຈົ້າ ຂອງກິດຈະການ ນອກຈາກນັ້ນຖ້າມີຜູ້ທີສົງໃສ ຫຼື ມີອາການເຂົ້າກັບນິຍາມແມ່ນໄດ້ມີການກະກຽມເພື່ອກຳ ຈັດບໍລິເວນເປັນເວລາ 14 ວັນເພື່ອຕິດຕາມຢ່າງໃກ້ຊິດ ພ້ອມນັ້ນປັດຈຸບັນຢູ່ທົ່ວປະເທດມີເຄື່ອງກວດ ວິເຄາະເຊື້ອດັ່ງກ່າວທີ່ທັນສະໄໝໄດ້ຮັບການຮັບຮອງຈາກອົງການອະນາໄມໂລກ ແລະ ສາກົນຈຳນວນ 11 ເຄື່ອງ ສາມາດກວດຫາເຊື້ອໄດ້ 2 ພັນ ຫາ 3 ພັນຕົວຢ່າງຕໍ່ມື້ ແລະ ເພື່ອສ້າງຄວາມພ້ອມ ໃນການບົ່ງມະຕິ ແລະ ການກວດຫາເຊື້ອຢ່າງວ່ອງໄວແມ່ນໄດ້ຈັດເຝິກອົບຮົມ ແລະ ຈັດສົ່ງເຄື່ອງກວດວວິເຄາະ ເຄື່ອນທີ່ໃຫ້ແຂວງ ຫຼວງພະບາງ ແລະ ແຂວງຫຼວງນ້ຳທາ.

ຄະນະບໍລິຫານ ຄູ-ອາຈານ ໂຮງຮຽນ ມສ ລຽວໂຕ ແລະ ກຸ່ມໂຮງຮຽນສອນ ແລະ ຮຽນພາສາຈີນ ຮ່ວມໃຈກັນລະດົມທຶນ ເພື່ອປະກອບສ່ວນປ້ອງກັນການລະບາດຂອງພະຍາດອັກເສບປອດຮຸນແຮງ ທີ່ເກີດຈາກເຊື້ອຈຸລະໂລກ ໄວຣັສ ໂຄໂຣນາ (NCOV) ຢູ່ ສປ ຈີນ ພາຍຫຼັງໄດ້ມີການລະບາດຢູ່ເມືອງອູຮັ່ນ ແຂວງຫູເປີຍ ສປ ຈີນ ແຕ່ທ້າຍປີ 2019 ເປັນຕົ້ນມາ ແລະ ແຜ່ລາມໄປຫຼາຍແຂວງຂອງ ສປ ຈີນ ແລະ ຫຼາຍປະເທດໃນໂລກ ໃນປັດຈຸບັນ. ການລະດົມທຶນຄັ້ງນີ້ ຈັດຂຶ້ນວັນທີ 8 ກຸມພາ 2020 ຢູ່ໂຮງຮຽນດັ່ງກ່າວ ໂດຍມີທ່ານ ສົມປະສົງ ຈັນທະວົງ ປະທານໂຮງຮຽນ ມສ ລຽວໂຕ ປະທານກຸ່ມໂຮງຮຽນສອນ ແລະ ຮຽນພາສາຈີນ ທ່ານ ໄຊປະເສີດ ຕັງຊະນະ ຮອງປະທານໂຮງຮຽນ ມສ ລຽວໂຕ ຮອງປະທານກຸ່ມໂຮງຮຽນສອນ ແລະ ຮຽນພາສາຈີນ ທ່ານ ບຸນສົງ ສະຫວັນວາລີ ຮອງປະທານໂຮງຮຽນ ມສ ລຽວໂຕ ເລຂາທິການກຸ່ມໂຮງຮຽນສອນ ແລະ ຮຽນພາສາຈີນ ພ້ອມດ້ວຍຄູ-ອາຈານ ເຂົ້າຮ່ວມ. ຜ່ານການລະດົມທຶນ ສາມາດຮວບຮວມເງິນໄດ້ທັງໝົດ 100 ລ້ານກີບ ເຊິ່ງເງິນຈຳນວນນີ້ ຈະນຳໄປມອບໃຫ້ລັດຖະບານ ສປປ ລາວ ນຳໄປມອບຕໍ່ໃຫ້ລັດຖະບານ ສປ ຈີນ ນຳໃຊ້ເຂົ້າໃນການປ້ອງກັນການລະບາດ ຂອງພະຍາດອັກເສບປອດຮຸນແຮງ ທີ່ເກີດຈາກເຊື້ອຈຸລະໂລກ (NCOV) ຢູ່ ສປ ຈີນ.

ພິທີມອບ-ຮັບອຸປະກອນການແພດ.(ພາບ: vientianemai.net)

ພິທີມອບ-ຮັບອຸປະກອນການແພດ ໄດ້ຈັດຂຶ້ນວັນທີ 10 ກຸມພາ 2020 ທີ່ກະຊວງການເງິນ ຕາງໜ້າມອບ ໂດຍທ່ານ ປີຊາໄຊ ແກ້ວໄຊຍະຈັກ ປະທານ ບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ ຕາງໜ້າຮັບຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ທັງເປັນຫົວໜ້າຄະນະກຳມະການສະເພາະກິດເພື່ອປ້ອງກັນຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ມີທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະທັງສອງຝ່າຍເຂົ້າຮ່ວມ.

ທ່ານ ປີຊາໄຊ ແກ້ວໄຊຍະຈັກ ກ່າວວ່າ: ບໍລິສັດຂອງພວກເຮົາໄດ້ເຫັນຄວາມສຳຄັນໃນການໂຕ້ຕອບປ້ອງກັນ ແລະ ຄວບຄຸມພະຍາດດັ່ງກ່າວ ເພາະເຫັນວ່າ ສປປ ລາວ ເປັນປະເທດໜຶ່ງທີ່ມີຊາຍແດນຕິດຈອດກັບ ສປ ຈີນ ຍາວສົມຄວນ ເຊິ່ງກໍ່ໃຫ້ເກີດມີຄວາມສ່ຽງໃນການຕິດເຊື້ອພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ເພື່ອເປັນການກະກຽມຄວາມພ້ອມ ແລະ ໂຕ້ຕອບຕໍ່ພະຍາດດັ່ງກ່າວນີ້ ດັ່ງນັ້ນ ທາງບໍລິສັດຂອງພວກເຮົາຈຶ່ງໄດ້ນຳເອົາອຸປະກອນການແພດທີ່ສາມາດໂຕ້ຕອບ ປ້ອງກັນ ແລະ ຕ້ານກັບພະຍາດໄວຣັສໂຄໂຣນາ ປະກອບມີ: ເຄື່ອງກວດວິເຄາະຫາເຊື້ອພະຍາດ ໂຄໂຣນາ ຈຳນວນ 2 ເຄື່ອງ ນ້ຳຢາກວດຫາເຊື້ອພະຍາດ ຈຳນວນ 2.500 ຫຼອດ ຖົງມືຈຳນວນ 100.000 ຄູ່ ຊຸດປ້ອງກັນພະຍາດ ຈຳນວນ 1.200 ຊຸດ ລວມມູນຄ່າທັງໝົດ 205.000 ໂດລາສະຫະລັດ ຫຼື ປະມານ 1,8 ຕື້ກວ່າກີບ.

（ໄຊພອນ）