 |
ພາບປະກອບ
ນັບແຕ່ຕົ້ນປີ 2020, ໜ່ວຍປະຕິບັດງານຂອງທ່ານນາຍົກລັດຖະມົນຕີໄດ້ມີການເຮັດວຽກກັບບັນດາກະຊວງ, ຂະແໜງການ, ບັນດາຫົວໜ່ວຍທີ່ກ່ຽວຂ້ອງກ່ຽວກັບການສ້າງເຄື່ອງມື ແລະ ແຜນການຫລຸດຜ່ອນ, ຫັນຂໍ້ກຳນົດທີ່ກ່ຽວຂ້ອງເຖິງການເຄື່ອນໄຫວຜະລິດດຳເນີນທຸລະກິດໄລຍະ 2020 – 2025 ເປັນງ່າຍດາຍ. ຕາມນັ້ນແລ້ວ, ຈະຫລຸດຜ່ອນບັນດາຂໍ້ກຳນົດທີ່ເປັນຮົ້ວກີດຂວາງຕໍ່ການເຄື່ອນໄຫວຜະລິດດຳເນີນທຸລະກິດ, ສະກັດກັ້ນການສ້າງຂໍ້ກຳນົດໃໝ່ ເຊິ່ງເຮັດໃຫ້ເພີ່ມລາຍຈ່າຍ ແລະ ຮົ້ວກີດຂວາງຕໍ່ການເຄື່ອນໄຫວຂອງວິສາຫະກິດຢ່າງທັນທີ. ເປົ້າໝາຍລະອຽດແມ່ນ ຫລຸດຜ່ອນຈຳນວນເອກະສານທີ່ໄດ້ປະກາດໃຊ້ ເຊິ່ງຂຶ້ນກັບສິດອຳນາດຂອງລັດຖະມົນຕີ, ນາຍົກລັດຖະມົນຕີ, ລັດຖະບານລົງຢ່າງໜ້ອຍສຸດແມ່ນ 20%; ຫລຸດຜ່ອນລາຍຈ່າຍທີ່ປະຕິບັດຕາມຂໍ້ກຳນົດກົດໝາຍກ່ຽວກັບການເຄື່ອນໄຫວດຳເນີນທຸລະກິດໃນແຕ່ລະປີລົງຢ່າງໜ້ອຍສຸດແມ່ນ 20% (ນັບແຕ່ປີ 2020 - 2025).
ດັດຊະນີກຳລັງຄວາມສາມາດແກ່ງແຍ້ງທົ່ວໂລກ (GCI) ຂອງ ຫວຽດນາມ ຢູ່ອັນດັບ 67, ເພີ່ມຂຶ້ນ 10 ຂັ້ນ ແລະ 3,5 ຄະແນນ ໃນປີ 2019. ຫວຽດນາມ ກໍ່ໄດ້ຮັບຮູ້ວ່າ ເປັນປະເທດທີ່ມີຄະແນນເພີ່ມຂຶ້ນຫລາຍທີ່ສຸດໃນໂລກ. ນີ້ແມ່ນໝາກຜົນຂອງບັນດາຄວາມມານະພະຍາຍາມໃນການປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ກຳລັງຄວາມສາມາດແກ່ງແຍ້ງຂອງ ຫວຽດນາມ; ໃນນັ້ນ, ການປັບປຸງສະພາບແວດລ້ອມແຫ່ງການດຳເນີນທຸລະກິດຫລຸດຜ່ອນຂະແໜງອາຊີບດຳເນີນທຸລະກິດທີ່ມີເງື່ອນໄຂ; ຫລຸດຜ່ອນ ແລະ ຫັນເງື່ອນໄຂການດຳເນີນທຸລະກິດເປັນງ່າຍດາຍໃຫ້ແກ່ວິສາຫະກິດແມ່ນໜຶ່ງໃນບັນດາປັດໄຈຕັດສິນຊີ້ຂາດ.
（ໄຊພອນ）
