 |
ພາບປະກອບ
ທ່ານ ຄຳມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ໄດ້ລາຍງານໃຫ້ຮູ້ ໃນກອງປະຊຸມເປີດກວ້າງ ສະຫລຸບຕີລາຄາ, ຖອດຖອນບົດຮຽນການຈັດຕັ້ງປະຕິບັດ ແຜນພັດທະນາພະລັງງານ ແລະ ບໍ່ແຮ່ ໃນໄລຍະ 5 ປີ ຄັ້ງທີ VIII ( 2016-2020) ແລະ ທິດທາງແຜນການພັດທະນາພະລັງງານ ແລະ ບໍ່ແຮ່ 5 ປີ ຄັ້ງທີ IX ໃນລະຫວ່າງ ວັນທີ 4-5 ກຸມພາ 2020 ທີ່ນະຄອນຫລວງວຽງຈັນ ວ່າ: ປັດຈຸຸບັນ ທົ່ວປະເທດ ມີແຫລ່ງຜະລິດໄຟຟ້າແລ້ວ 78 ແຫ່ງ, ມີກຳລັງຕິດຕັ້ງທັງໝົດ 9.972 ເມັກກາວັດ, ສາມາດຜະລິດພະລັງງານໄຟຟ້າ ໄດ້ເຖິງ 52.211 ລ້ານກິໂລວັດໂມງຕໍ່ປີ, ມີໂຄງການໄຟຟ້າຖ່ານຫີນ 1 ໂຄງການ, ໂຄງການ ພະລັງງານໄຟຟ້າຊີວະມວນ 4 ແຫ່ງ, ໂຄງການໄຟຟ້າແສງຕາເວັນ 5 ແຫ່ງ ແລະ ໂຄງການພະລັງງານລົມ 4 ໂຄງການ. ຄຽງຄູ່ກັນນີ້, ການພັດທະນາລະບົບສາຍສົ່ງ ກໍໄດ້ດໍາເນີນໄປຢ່າງແຂງແຮງ, ມາຮອດປັດຈຸບັນ ທົ່ວປະເທດມີລະບົບສາຍສົ່ງແຮງສູງ, ແຮງກາງ ແລະ ແຮງຕໍ່າ ຍາວທັງໝົດ 65.563 ກວ່າກິໂລແມັດ, ມີສະຖານີຈ່າຍໄຟຟ້າ 71 ແຫ່ງ.
ນອກຈາກນີ້, ຍັງໄດ້ອະນຸຍາດ ໃຫ້ບໍລິສັດລົງທຶນໃນກິດຈະການ ທໍລະນີສາດ ແລະ ບໍ່ແຮ່ແລ້ວ ທັງໝົດ 193 ບໍລິສັດ.ໃນນັ້ນ, ປະຕິບັດວຽກງານຊອກຄົ້ນ ແລະ ສໍາຫລວດແຮ່ທາດ 69 ບໍລິສັດ, ສຶກສາຄວາມເປັນໄປໄດ້ ທາງດ້ານ ເສດຖະກິດ-ເຕັກນິກ 43 ບໍລິສັດ ແລະ ດໍາເນີນການຂຸດຄົ້ນແຮ່ທາດ 81 ບໍລິສັດ. ພ້ອມນັ້ນ, ວຽກງານພະລັງງານ ແລະ ບໍ່ແຮ່ ໄດ້ເປັນຜູ້ເຮັດບົດບາດທີ່ສຳຄັນ ແລະ ມີລັກສະນະເປັນພື້ນຖານ ໃນການພັດທະນາ ເສດຖະກິດ-ສັງຄົມ ຂອງຊາດ, ຜົນສຳເລັດຂອງການ ພັດທະນາວຽກງານພະລັງງານ ແລະ ບໍ່ແຮ່ ໄດ້ສ້າງພື້ນຖານທີ່ສຳຄັນໃຫ້ແກ່ ການຫັນຈາກເສດຖະກິດທຳມະຊາດ ໄປສູ່ເປັນເສດຖະກິດຜະລິດເປັນສິນຄ້າ, ການຫັນປ່ຽນແບບວິທີການຜະລິດ, ການດຳລົງຊີວິດ ແລະ ການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າຢ່າງຕັ້ງໜ້າ.
ສະເພາະປີ 2020 ສືບຕໍ່ກວດກາບັນດາເປົ້າໝາຍທີ່ເປັນຄວາມສ່ຽງກັບການຊົມໃຊ້ໄຟຟ້າຂອງປະຊາຊົນໃຫ້ທົ່ວເຖິງ ແລະ ຊຸກຍູ້ສົ່ງເສີມບັນດາເປົ້າໝາຍທີ່ກວດແລ້ວໃຫ້ມີການແກ້ໄຂໃຫ້ໄດ້ 30% ຂຶ້ນໄປ ສຸມໃສ່ຈັດຕັ້ງປະຕິບັດໂຄງການປັບປຸງຍົກລະດັບໄຟຟ້າໃນ ນວ ທີ່ໄດ້ຮັບທຶນຊ່ວຍເຫຼືອລ້າຈາກຈີນ 300 ລ້ານຢວນ ສົມທົບພາກສ່ວນກ່ຽວຂ້ອງລົງແກ້ໄຂ ແລະ ຊົດເຊີຍຜົນກະທົບຂອງໂຄງການກໍ່ສ້າງສາຍສົ່ງແຮງສູງ 5 ໂຄງການໃຫ້ສອດຄ່ອງຕາມລະບຽບກົດໝາຍ ຄຸ້ມຄອງກິດຈະການຂຸດຄົ້ນ-ປຸງແຕ່ງແຮ່ທາດໃນ ນວ ໃຫ້ເຄື່ອນໄຫວສອດຄ່ອງຕາມລະບຽບກົດ ໝາຍ ທັງຮັບປະກັນປະສິດທິພາບ ແລະ ປະສິດທິຜົນ ສະໜອງຜະລິດຕະພັນແຮ່ທາດໃຫ້ພຽງພໍກັບຄວາມຕ້ອງການຂອງສັງຄົມ ເປັນຕົ້ນ ຖ່ານຫີນແອນຕຣາໄຊ 250.000 ໂຕນຕໍ່ປີ ເກືອກິນ 10.000 ໂຕນຕໍ່ປີ ຫີນພູ 2 ແສນແມັດກ້ອນຕໍ່ປີ ຫີນດານ 15.000 ແມັດກ້ອນຕໍ່ປີ ດິນແດງ 3 ແສນແມັດກ້ອນຕໍ່ປີ ນອກນີ້ ຍັງສະເໜີບາງຂໍ້ຫຍຸ້ງຍາກໃຫ້ຮອງເຈົ້າຄອງ ນວ ຮັບຊາບ ແລະ ຊ່ວຍໃຫ້ທິດຊີ້ນຳໃນການແກ້ໄຂ ເປັນຕົ້ນ ດ້ານບຸຄະລາກອນໜ້ອຍ ສ່ວນຫຼາຍຍັງໜຸ່ມນ້ອຍປະສົບການຍັງບໍ່ຫຼາຍ ບໍ່ທັນສາມາດຕອບສະໜອງໄດ້ຕາມຄວາມຕ້ອງການຂອງວຽກງານ ມີບາງວຽກຍັງຄຸມເຄືອກັບຂະແໜງການອື່ນ.
（ໄຊພອນ）
