 |
ການເລືອກຕັ້ງກຳປູເຈຍສະໄໝທີ 6.
ວັນທີ 28 ກໍລະກົດ ການກະກຽມໃຫ້ແກ່ການເລືອກຕັ້ງສະພາແຫ່ງຊາດກຳປຸເຈຍ ສະໄໝທີ VI ຖືວ່າສົມບູນແລ້ວ, ປະເທດອັງກໍວັດກຽມພ້ອມເຂົ້າສູ່ການເລືອກຕັ້ງມື້ນີ້ 29 ກໍລະກົດ.
ຕັ້ງແຕ່ເຊົ້າວັນທີ 28 ກໍລະກົດ ຊາວຜູ້ອອກແຮງງານຫຼາຍແສນຄົນຢູ່ນະຄອນຫຼວງ ແລະ ນະຄອນໃຫຍ່ຂອງກຳປູເຈຍ ໄດ້ກັບບ້ານເພື່ອກຽມໄປເລືອກຕັ້ງ ປະຕິບັດສິດຂອງປະຊາຊົນໃນວັນທີ 29 ກຳລະກົດນິ້. ບໍລິສັດ, ໂຮງຈັກໂຮງງານ, ເຈົ້າຂອງກິດຈະການອະນຸຍາດໃຫ້ແຮງງານພັກເປັນເວລາ 3 ມື້ເພື່ອສ້າງເງື່ອນໄຂໃຫ້ພວກເຂົາໄປເລືອກຕັ້ງ.
ຜູ້ມີສິດເລືອກຕັ້ງກວ່າ 8,3 ລ້ານຄົນ ໄດ້ລົງທະບຽນເພື່ອຈະໄປເລືອກຕັ້ງເຊິ່ງຈະດຳເນີນໄປໃນເວລາ 7ໂມງ ຫາ 15ໂມງຂອງວັນທີ 29 ກໍລະກົດ
ອີງຕາມຄະນະກຳມະການ-ການເລືອກຕັ້ງກຳປູເຈຍ (NEC), ອຸປະກອນທີ່ຕ້ອງການໃຫ້ແກ່ການເລືອກຕັ້ງຄື: ຫີບເລືອກຕັ້ງ, ບັດເລືອກຕັ້ງ, ນຳ້ມືກເພື່ອໃຊ້ໃນການເລືອກຕັ້ງ... ໄດ້ຖືກນຳສົ່ງເຖິງຈຸດເລືອກຕັ້ງ ຈຳນວນ 23.000ຈຸດ ທົ່ວປະເທດ.
ເຊົ້າມື້ວັນ 28 ກໍລະກົດ , ບັນດາພະນັກງາານ (NEC) ໄດ້ກວດກາຄວາມພ້ອມຢູ່ບາງຈຸດປ່ອນບັດ ແລະ ໄດ້ໃຫ້ຮູ້ວ່າວຽກງານການກະກຽມຄວາມພ້ອມແມ່ນຖືກຕາມແຜນການໝົດແລ້ວ.
ຕອນແລງ 28 ກໍລະກົດ NEC ໄດ້ສຳເລັດການລົງທະບຽນໃຫ້ແກ່ນັກສັງເກດການສາກົນ ທີ່ຈະເຂົ້າຮ່ວມສັງເກດການການເລືອກຕັ້ງສະພາແຫ່ງຊາດກຳປູເຈຍ ສະໄໝທີ VI ໃນວັນທີ 29 ກໍລະກົດນີ້.
ອີງຕາມການລາຍງານຂອງທ່ານ Dim Sovannarom ໂຄສົກ NEC ໄດ້ໃຫ້ຮູ້ວ່າ: ຄະນະສັງເກດການສາກົນ ປະກອບມີ 25 ຄົນ ມາຈາກປະເທດ: ລັດເຊຍ, ອັງກິດ, ຝລັ່ງເສດ, ອິດຕາລີ, ເບລາລຸດ, ບຣາຊິນ... ໄດ້ມີການເຮັດວຽກກັບ NEC ເພື່ອສຳເລັດໃນການເຂົ້າຮ່ວມສັງເກດການການເລືອກຕັ້ງສະພາແຫ່ງຊາດ ກຳປູເຈຍ ໃນວັນທີ 29 ກໍລະກົດນີ້.
ສະນັ້ນ ຜູ້ສັງເກດການ ທີ່ລົງທະບຽນເພື່ອເຂົ້າຮ່ວມສັງເກດການ ການເລືອກຕັ້ງກຳປູເຈຍ ສະໄໝທີ 6 ທັງໝົດແມ່ນ 539ຄົນ, ເປັນສະຖິຕິໃໝ່ໃນການເລືອກຕັ້ງແຕ່ລະສະໄໝຂອງກຳປູເຈຍ.
ຈຳນວນພົນຜູ້ສັງເກດການສາກົນທີ່ໄດ້ລົງທະບຽນເຂົ້າຮ່ວມສັງເກດການຢ່າງຫຼວງຫຼາຍ ຢູ່ກຳປູເຈຍ ຄັ້ງນີ້ສະແດງໃຫ້ເຫັນຄວາມສົນໃຈຂອງສາກົນ ຕໍ່ກັບສະພາບການ-ການເມືອງຂອງກຳປູເຈຍ.
NEC ໄດ້ຍອມຮັບວ່າໄດ້ມີ ຜູ້ສັງເກດການພາຍໃນຈຳນວນ 89.612 ຄົນເຂົ້າຮ່ວມໃນການສັງເກດການ ການເລືອກຕັ້ງສະມາຊິກສະພາແຫ່ງຊາດ ສະໄໝທີ 6ນີ້.
ຜູ້ສັງເກດການພາຍໃນ ແລະ ສາກົນ ສາມາດໄປສັງເກດການໄດ້ທົ່ວທຸກຈຸດ ໃນຈຳນວນ 23.000 ຈຸດເລືອກຕັ້ງທົ່ວປະເທດ ເພື່ອຈັດຕັ້ງປະຕິບັດວຽກງານການສັງເກດການຂອງຕົນ.
NEC ສະແດງຄວາມຕ້ອງການວ່າຜູ້ສັງເກດການສາກົນທີ່ມາບໍ່ພຽງແຕ່ສັງເກດການການເລືອກຕັ້ງເທົ່ານັ້ນ ແຕ່ຍັງເພື່ອໃຫ້ເຫັນປະຈັກຕາເຖິງບັນຍາກາດຂອງຄວາມເສລີ, ປະຊາທິປະໄຕກໍ່ຄືຜົນສຳເລັດແຫ່ງການພັດທະນາຂອງດິນແດນອັງກໍວັດ.
ນີ້ແມ່ນການເລືອກຕັ້ງສະພາແຫ່ງຊາດສະໄໝທີ VI ນັບແຕ່ກຳປູເຈຍ ເລີ່ມຈັດການເລືອກເລືອກຕັ້ງແບບຫຼາຍພັກ ໃນປີ 1993 ພາຍໃຕ້ການສະໜັບສະໜູນຂອງສະຫະປາຊາຊາດ. ໃນການເລືອກຕັ້ງຄັ້ງນີ້ ນຳ້ມືກໃຊ້ເຂົ້າໃນການປຳ້ນິ້ວມືແມ່ນນຳ້ມືກທີ່ລ້າງອອກຍາກ ແລະນຳເຂົ້າຈາກປະເທດອິນເດຍ.
ມືກນີ້ຈະຕິດບໍ່ສາມາດລ້າງອອກໄດ້ໃນໄລຍະສອງສາມອາທິດ ແລະ ນີ້ແມ່ນມາດຕະການເພື່ອສະກັດກັ້ນການກະທຳຜິດໃນການປ່ອນບັດ.
ອີງຕາມກົດໝາຍວ່າດ້ວຍການເລືອກຕັ້ງຂອງກຳປູເຈຍ, ພັກໃດທີ່ໄດ້ຮັບໄຊຊະນະດ້ວຍຄະແນນ 50%+1 ຂອງຈຳນວນບັດເລືອກຕັ້ງ ຈະໄດ້ຮັບສິດໃນການຈັດຕັ້ງລັດຖະບານໃໝ່. NEC ຍອມຮັບການເຂົ້າຮ່ວມຂອງພັກການເມືອງຈຳນວນ 20ພັກເພື່ອແຂ່ງຂັນໃນຄັ້ງນີ້, ໃນນັ້ນພັກ CPP ໄດ້ຮັບການຕີລາຄາສູງວ່າມີໂອກາດຈະໄດ້ຮັບໄຊຊະນະໃນການເລືອກຕັ້ງຄັ້ງນີ້.
（ຫັດທະບູນ）
