 |
ບັນຍາກາດກອງປະຊຸມ. (ພາບ:ພູວຽງຄຳ)
ທ່ານ ບົວສອນ ບຸບຜາວັນ ໄດ້ກ່າວວ່າ: ເຖິງແມ່ນວ່າ ສປປ ລາວ ຈະປະສົບຜົນສຳ ເລັດໃນລະດັບໃດໜຶ່ງໃນການ ພັດທະນາເສດຖະກິດ, ຫຼຸດຜ່ອນຄວາມທຸກຍາກ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ກໍ່ຕາມ ແຕ່ໂຄງສ້າງເສດຖະກິດຂອງ ສປປ ລາວ ຂອງພວກເຮົາບໍ່ທັນເຂັ້ມແຂງ ແລະ ຍັງມີຫຼາຍບັນຫາທີ່ຈະຕ້ອງໄດ້ສືບຕໍ່ປັບປຸງໃຫ້ດີຂຶ້ນ, ໂດຍສະເພາະແມ່ນການເອື່ອຍອີງໃສ່ຊັບພະຍາກອນທຳມະຊາດ, ໃນຂະນະທີ່ການສົ່ງອອກສິນຄ້າກໍຍັງບໍ່ຫຼາຍ, ເຮັດໃຫ້ມີການຂາດດຸນການຄ້າຕິດຕໍ່ກັນມາຫຼາຍປີ, ການຂາດດຸນງົບປະມານຂອງລັດເປັນຈຳ ນວນຫຼວງຫຼາຍ ແລະ ຕິດຕໍ່ກັນຫຼາຍປີ, ການເພີ່ມຂຶ້ນຂອງໜີ້ສາທາລະນະ, ປະສິດທິພາບ ແລະ ປະສິດທິຜົນຂອງການລົງທຶນຂອງລັດຕ່ຳ ແລະ ອື່ນໆ.
ບັນຫາຕ່າງໆດັ່ງກ່າວ ໄດ້ຊີ້ໃຫ້ເຫັນວ່າ ການສືບຕໍ່ປັບປຸງໂຄງສ້າງເສດຖະກິດໃນ ສປປ ລາວ ແມ່ນມີຄວາມຕ້ອງການ ແລະ ຈຳເປັນຮີບດ່ວນ. ກອງປະຊຸມໄດ້ຮັບຟັງ ການສະເໜີກ່ຽວກັບ "ບົດຮຽນ ກ່ຽວກັບການປັບໂຄງສ້າງ ເສດຖະກິດຂອງ ສສ ຫວຽດ ນາມ" ຈາກທ່ານ ຫງວຽນຊຽນ ທັງ, ຮອງຫົວໜ້າສະຖາບັນຄົ້ນຄວ້າເສດຖະກິດ ສະພາບັນດິດວິທະຍາສາດສັງຄົມຂອງ ສສ ຫວຽດນາມ; ການສະເໜີກ່ຽວກັບ "ການປັບໂຄງສ້າງການລົງທຶນຂອງລັດ", ຈາກທ່ານ ແພມ ສີ ແອນ, ຫົວໜ້າພະແນກເສດຖະກິດມະຫາພາກ, ສະຖາບັນຄົ້ນຄວ້າເສດ ຖະກິດຂອງ ສະພາບັນດິດວິທະຍາສາດສັງຄົມຂອງ ສສ ຫວຽດນາມ ແລະ ໄດ້ຮັບຟັງການສະເໜີກ່ຽວກັບ "ການປັບໂຄງສ້າງລັດວິສາຫະກິດ" ຈາກ ທ່ານ ນາງດັ້ງ ທິເຟືອງ ຮວາ, ຮອງຫົວໜ້າບັນນາທິການ ວາລະສານເສດຖະກິດຂອງ ສະພາບັນດິດວິທະຍາສາດສັງຄົມຂອງ ສສ ຫວຽດນາມ.
ສາມາດສະຫຼຸບໄດ້ວ່າ: ພາຍຫຼັງທີ່ເຂົ້າຮ່ວມອົງການ WTO ໃນປີ 2007, ເສດຖະກິດມະຫາພາກ ຂອງຫວຽດນາມ ຕົກຢູ່ໃນພາວະບໍ່ໝັ້ນຄົງ; ອັດຕາການຂະຫຍາຍຕົວເສດຖະກິດ ຫຼຸດລົງ, ອັດຕາເງິນເຟີ້ເພີ່ມຂຶ້ນ, ງົບປະມານຂາດດຸນເກີນອັດຕາທີ່ສະພາແຫ່ງຊາດກຳນົດໄວ້, ການຂາດດຸນການຄ້າກັບຕ່າງປະເທດເພີ່ມຂຶ້ນ, ປະສິດທິພາບຂອງການລົງທຶນຂອງລັດ ແລະ ລັດວິສາຫະກິດຕ່ຳ, ມີໜີ້ສິນຄຸມເຄືອ ແລະ ອື່ນໆ. ເພື່ອແກ້ໄຂສະພາບເສດຖະກິດດັ່ງກ່າວ, ໃນກອງປະຊຸມໃຫຍ່ຄັ້ງທີ XI ຂອງພັກກອມມູນິດຫວຽດນາມໄດ້ເປີດຂຶ້ນໃນຕົ້ນປີ 2011 ໄດ້ ຕົກລົງປັບໂຄງສ້າງ ແລະ ປ່ຽນຮູບແບບການຂະຫຍາຍຕົວຂອງເສດຖະກິດໃຫ້ມີຄຸນນະພາບສູງຂຶ້ນ.
ນະໂຍບາຍປັບໂຄງສ້າງເສດຖະກິດດັ່ງກ່າວໄດ້ຮັບການຜັນຂະຫຍາຍ ຜ່ານບັນດາ ໂຄງການປັບໂຄງສ້າງເສດຖະກິດຕິດພັນກັບການປ່ຽນແປງຮູບແບບໃໝ່ຮູບແບບການຂະຫຍາຍຕົວຕາມທິດຍົກສູງຄຸນນະພາບ, ປະສິດທິຜົນ ແລະ ຄວາມສາມາດໃນການແຂ່ງຂັນໃນໄລຍະປີ 2013 2020 ຊຶ່ງສຸມໃສ່ 3 ຂົງເຂດຕົ້ນຕໍຄື: ປັບໂຄງສ້າງການລົງທຶນຂອງລັດ, ປັບໂຄງສ້າງລັດວິສາຫະກິດ ແລະ ໂຄງສ້າງທະນາຄານການຄ້າ. ການປັບໂຄງສ້າງເສດ ຖະກິດດັ່ງກ່າວໄດ້ເຮັດໃຫ້ສະ ພາບເສດຖະກິດຂອງ ຫວຽດ ນາມ ໄດ້ມີໂສມໜ້າໃໝ່ ແລະ ມີ ການປ່ຽນແປງໃນຫຼາຍຂົງ ເຂດ. ສະພາບເສດຖະກິດມະ ຫາພາກໝັ້ນຄົງຂຶ້ນ, ລະດັບອັດຕາເງິນເຟິ້ຫຼຸດລົງມາຢູ່ໃນລະດັບທີ່ສາມາດຄວບຄຸມໄດ້, ອັດຕາການຂະຫຍາຍຕົວຂອງເສດຖະກິດເພີ່ມຂຶ້ນ, ການຂາດດຸນການຄ້າກັບຕ່າງ ປະເທດໄດ້ຮັບການປັບປຸງໃຫ້ດີຂຶ້ນ, ການລົງທຶນຂອງລັດໄດ້ຮັບການຕິດຕາມ ແລະ ກວດກາເຂັ້ມງວດຂຶ້ນ, ລະບົບທະນາຄານການຄ້າ ໄດ້ຮັບການປັບປຸງໃຫ້ໝັ້ນຄົງຫຼາຍຂຶ້ນຜ່ານບັນດາລະບົບການຕິດຕາມຂອງທະນາຄານແຫ່ງລັດ, ລັດວິສາຫະກິດໄດ້ຮັບການຫັນເປັນຫຸ້ນສ່ວນ, ລັດຖອນທຶນອອກຈາກບັນດາຂົງເຂດການລົງທຶນທີ່ບໍ່ຈຳເປັນ ແລະ ນຳໃຊ້ບັນດາມາດຖານການຄຸ້ມຄອງລັດວິສາຫະກິດທີ່ທັນສະໄໝ. ປັດຈຸບັນ ຫວຽດນາມໄດ້ເປັນເຈົ້າການຮອງຮັບການພັດທະນາໃນຍຸກ 4.0 ແລະ ການເຊື່ອມໂຍງ ແລະ ເຊື່ອມຈອດກັບສາກົນ.
（ແຫຼ່ງຂໍ້ມູນ： pasaxon.org.la）
