ທ່ານ ວິໄລທອງ ສີຊານົນ ຫົວໜ້າສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ.(ພາບ:ຂປລ)
ທ່ານ ວິໄລທອງ ສີຊານົນ ຫົວໜ້າສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 10 ຕຸລາ 2019 ນີ້ວ່າ: ໃນໄລຍະຜ່ານມາ ສະຖາບັນສື່ມວນຊົນ, ວັດທະ ນະທຳ ແລະ ທ່ອງທ່ຽວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ສປປ ລາວ ແລະ ກົມສື່ມວນຊົນ ກະຊວງຖະແຫລງຂ່າວ ແລະ ສື່ສານຫວຽດນາມ; ສະຖາບັນສື່ສານມວນຊົນ ແລະ ໂຄສະນາ; ສະຖາບັນການເມືອງແຫ່ງຊາດ ໂຮ່ຈິມິງ ໄດ້ຮ່ວມມືຊ່ວຍເຫລືອເຊິ່ງກັນ ແລະ ກັນ ໃນການກໍ່ສ້າງບຸກຄະ ລາກອນ, ເຊິ່ງສະແດງອອກໃນການແລກປ່ຽນ ບົດຮຽນທາງດ້ານຂໍ້ມູນຂ່າວສານ, ບົດຮຽນດ້ານການເຄື່ອນໄຫວວິຊາສະເພາະຕ່າງໆ ລວມທັງການຈັດຝຶກອົບຮົມຢູ່ ສປປ ລາວ ໃຫ້ພະນັກງານຂົງເຂດສື່ມວນຊົນ ທັງສູນກາງ ແລະ ທ້ອງຖິ່ນ ໄລຍະສັ້ນ 1-2 ອາທິດ ໄດ້ຫລາຍກວ່າ 5 ຊຸດ, ແຕ່ລະຊຸດ ຈະມີຜູ້ເຂົ້າຮ່ວມປະມານ 35-40 ຄົນ, ໂດຍໄດ້ຮັບການສະໜັບສະໜູນດ້ານທຶນຮອນ ແລະ ຄູອາຈານ ມາສິດສອນ ຈາກ ສສ ຫວຽດນາມ, ພ້ອມກັນນີ້ ສະຖາບັນສື່ສານມວນຊົນ ແລະ ໂຄສະນາ ສສ ຫວຽດນາມ ຍັງໄດ້ເປີດຊຸດອົບຮົມ ໃຫ້ແກ່ນັກຂ່າວລາວ ກ່ຽວກັບວຽກງານຄຸ້ມຄອງສື່ມວນຊົນ ໄລຍະ 2 ອາທິດ ຢູ່ ສສ ຫວຽດນາມ ໂດຍໄດ້ດຳເນີນມາແລ້ວ 5 ຊຸດ, ຊຸດລະ 20 ຄົນ ເພື່ອນຳເອົາບົດຮຽນດັ່ງກ່າວ, ມາໜູນໃຊ້ເຂົ້າໃນວຽກງານຕົວຈິງ.
ໃນປີ 2019 ນີ້, ສະຖາບັນການເມືອງແຫ່ງຊາດໂຮ່ຈິມິງ ຮ່ວມກັບ ສະຖາບັນການເມືອງ ແລະ ການປົກຄອງແຫ່ງຊາດລາວ ໄດ້ເຊັນບົດບັນທຶກການຊ່ວຍເຫລືອເຊິ່ງກັນ ແລະ ກັນ ໃນການສ້າງພະນັກ ງານຄຸ້ມຄອງສື່ມວນຊົນ ໃຫ້ແກ່ ສປປ ລາວ ໄລຍະ ປີ 2019-2023 ປີລະ 1 ຊຸດ, ຊຸດລະ 20 ຄົນ ເປັນເວລາ 2 ເດືອນ, ໃນນັ້ນ ຊຸດທຳອິດແມ່ນຈະເລີ່ມແຕ່ ວັນທີ 13 ຕຸລາ ເຖິງ 13 ທັນວາ 2019 ໂດຍມີພະນັກງານຄຸ້ມຄອງສື່ມວນຊົນ ຈາກສຳນັກງານສື່ມວນຊົນຕ່າງໆ ເພື່ອແລກປ່ຽນບົດຮຽນ, ປະສົບການເຊິ່ງກັນ ແລະ ກັນ ເຊິ່ງຈະເປັນພື້ນຖານໃຫ້ແກ່ ການຄຸ້ມຄອງວຽກງານສື່ມວນຊົນຂອງລາວເຮົາ.
(ແຫຼ່ງຂໍ້ມູນ: ຂປລ)