 |
ນະຄອນຫຼວງວຽງຈັນ ແລະ ແຂວງບ່າເຣ່ຍ-ຫວຸ້ງເຕົ່າ ເພີ່ມທະວີການຮ່ວມມື
ກອງປະຊຸມພົບປະ ລະຫວ່າງຄະນະຜູ້ແທນຂັ້ນສູງນະຄອນຫຼວງວຽງຈັນ (ນວ) ສປປ ລາວ ແລະ ຄະນະຜູ້ແທນຂັ້ນສູງແຂວງບ່າເຣ່ຍ-ຫວຸ້ງເຕົ່າ ສສ ຫວຽດນາມ ຈັດຂຶ້ນວັນທີ 15 ຕຸລາ 2019 ຢູ່ສຳນັກງານອົງການປົກຄອງ ນວ ເຊິ່ງຝ່າຍລາວນຳໂດຍສະຫາຍ ສິນລະວົງ ຄຸດໄພທູນ ກົມການເມືອງສູນກາງພັກ ເລຂາຄະນະພັກ ເຈົ້າຄອງ ນວ ຝ່າຍຫວຽດນາມນຳໂດຍສະຫາຍ ຫງວຽນ ຮົ່ງ ລິ້ງ ກຳມະການສູນກາງພັກ ເລຂາພັກແຂວງ ປະທານສະພາປະຊາຊົນແຂວງບ່າເຣ່ຍ-ຫວຸ້ງເຕົ່າ.
ສະຫາຍ ສິນລະວົງ ຄຸດໄພທູນ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ກໍຄື ນວ ຂອງສະຫາຍ ຫງວຽນ ຮົ່ງ ລິ້ງ ພ້ອມຄະນະໃນຄັ້ງນີ້ ເຊິ່ງເປັນການເພີ່ມທະວີ ແລະ ຮັດແໜ້ນສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ.
ການຮ່ວມມືຂອງສອງທ້ອງຖິ່ນ ເບື້ອງຕົ້ນສະເໝີໃຫ້ມີການແລກປ່ຽນບົດຮຽນກ່ຽວກັບການພັດທະນາ ແລະ ຄຸ້ມຄອງເຂດອຸດສາຫະກຳ ດຶງດູດການລົງທຶນຈາກຕ່າງປະເທດ ມາລົງທຶນຢູ່ເຂດອຸດສາຫະກຳ ຊຸກ ຍູ້ສົ່ງເສີມໃຫ້ພາກທຸລະກິດຂອງ ນວ ແລະ ແຂວງບ່າເຣ່ຍ-ຫວຸ້ງເຕົ່າ ໃຫ້ມີການຮ່ວມມືດ້ານການທ່ອງທ່ຽວ.
ໂອກາດນີ້ ຍັງໄດ້ລົງນາມສັນຍາຮ່ວມມືດ້ານທຸລະກິດທ່ອງທ່ຽວ 3 ສະບັບຕື່ມອີກ.
（ແຫຼ່ງຂໍ້ມູນ： vientianemai.net）
