ສາຍພົວພັນອັນອົບອຸ່ນລະຫວ່າງນັກສຶກສາລາວ ແລະຄອບຄົວຊາວຫວຽດນາມ

21:37 | 15/08/2019

ສ້າງສະພາບແວດລ້ອມໃຫ້ແກ່ນັກສຶກສາລາວ ໄດ້ເຊື່ອມຕົວເຂົ້າກັບການດໍາລົງຊີວິດປະຈໍາວັນກັບບັນດາຄອບຄົວຊາວຫວຽດນາມ, ຜ່ານນັ້ນມີອາລົມຈິດທີ່ສະໜິດຕິດພັນ, ໜູນຊ່ວຍຊີວິດການເປັນຢູ່ທາງດ້ານວັດຖຸ, ຈິດໃຈໃຫ້ບັນດາພວກເພື່ອນທີ່ມາຮໍ່າຮຽນຢູ່ຫ່າງໄກຈາກບ້ານເກີດເມືອງນອນ, ນັ້ນແມ່ນເປົ້າໝາຍຂອງລາຍການ “ນັກສຶກສາລາວ ກັບຄອບຄົວຊາວຫວຽດນາມ” ໂດຍຄະນະຊາວໜຸ່ມນະຄອນໂຮ່ຈີມິນ ສົມທົບກັບບັນດາອົງການສະມາຄົມ, ອົງການຈັດຕັ້ງມະຫາຊົນນະຄອນ ຈັດຕັ້ງປະຕິບັດ ແລະປະເມີນຜົນໃນຕອນຄໍ່າວັນທີ 14 ສິງຫາ.

ສາຍພົວພັນອັນອົບອຸ່ນລະຫວ່າງນັກສຶກສາລາວ ແລະຄອບຄົວຊາວຫວຽດນາມ

ນັກສຶກສາພະແນກພາສາຫວຽດນາມ, ມະຫາວິທະຍາໄລແຫ່ງຊາດລາວ.(ພາບ: vietnamplus.vn)

ໂດຍໄດ້ຮັບການຜັນຂະຫຍາຍທົດລອງມາແຕ່ວັນທີ 18 ພຶດສະພາ, ລາຍການມີການເຂົ້າຮ່ວມຂອງ 13 ຄອບຄົວ, ຮັບເອົານັກສຶກສາລາວ 24 ຄົນທີ່ກໍາລັງຮໍ່າຮຽນຢູ່ບັນດາໂຮງຮຽນມະຫາວິທະຍາໄລ, ສະຖາບັນໃນບໍລິເວນນະຄອນ, ດໍາເນີນຊີວິດໄປພ້ອມກັບຄອບຄົວໃນເວລາ 3 ເດືອນ. ພາຍຫຼັງໄດ້ດໍາລົງຊີວິດກັບບັນດາຄອບຄົວ, ໄດ້ຮັບການຊ່ວຍເຫຼືອ, ເບິ່ງແຍງດູແລ ແລະແນະນໍາມາໄດ້ໄລຍະໜຶ່ງ, ບັນດານັກສຶກສາລາວ ໄດ້ເຊື່ອມຕົວເຂົ້າກັບການດໍາລົງຊີວິດປະຈໍາວັນຂອງຄອບຄົວຊາວຫວຽດນາມ.

ນອກຈາກເວລາຮໍ່າຮຽນຢູ່ໂຮງຮຽນແລ້ວ, ນັກສຶກສາລາວ ໄດ້ຕັ້ງໜ້າເຂົ້າຮ່ວມບັນດາການເຄື່ອນໄຫວພ້ອມກັບຄອບຄົວ, ກໍ່ຄືບັນດາລາຍການພົບປະແລກປ່ຽນກັບບັນດາອົງການຈັດຕັ້ງມະຫາຊົນ. ຍ້ອນໄດ້ດໍາລົງຊີວິດ, ໄດ້ເຂົ້າຮ່ວມພຶດຕິກຳຕົວຈິງນັ້ນຈຶ່ງເກີດອາລົມຈິດສະໜິດຕິດພັນລະຫວ່າງນັກສຶກສາລາວ ກັບບັນດາສະມາຊິກໃນຄອບຄົວຊາວຫວຽດນາມ, ຊ່ວຍເຫຼືອບັນດາພວກເພື່ອນຜ່ານຜ່າຄວາມຫຍຸ້ງຍາກກ່ຽວກັບພາສາເພື່ອເຊື່ອມຕົວ, ມີອາລົມຈິດສະໜິດຕິດພັນ, ມີຈິດໃຈສູ້ຊົນເມື່ອມາຮໍ່າຮຽນຢູ່ຫ່າງໄກຈາກບ້ານເກີດເມືອງນອນ.

ຜ່ານລາຍການ, ການນໍານະຄອນຫວັງວ່າສ້າງເງື່ອນໄຂເພື່ອໃຫ້ນັກສຶກສາລາວ ຊອກຮູ້ວັດທະນະທໍາ, ຝຶກຝົນພາສາຫວຽດນາມກໍ່ຄືເປັນມິດກັບສະພາບແວດລ້ອມໃນການຮໍ່າຮຽນຢູ່ຫວຽດນາມ, ພ້ອມທັງຊ່ວຍເຫຼືອບັນດາຄອບຄົວຊາວຫວຽດນາມ ມີໂອກາດຊອກຮູ້ກ່ຽວກັບວັດທະນະທໍາ, ປະເທດ ແລະຊາວລາວ.

（ແຫຼ່ງຂໍ້ມູນ： la.qdnd.vn）