 |
ຄະນະຈັດຕັ້ງແຂວງສະຫວັນນະເຂດ ສປປ ລາວ ແລະ ຄະນະຈັດຕັ້ງແຂວງກວາງຈິ ສສ ຫວຽດນາມ.
ການພົບປະລະຫວ່າງ ຄະນະຈັດຕັ້ງແຂວງສະຫວັນນະເຂດ ສປປ ລາວ ແລະ ຄະນະຈັດຕັ້ງແຂວງກວາງຈິ ສສ ຫວຽດນາມ ໄດ້ມີຂຶ້ນໃນວັນທີ 20 ມີຖຸນາ 2018 ຢູ່ແຂວງສະຫວັນນະເຂດ, ເຊິ່ງຝ່າຍແຂວງສະຫວັນນະເຂດ ນຳໂດຍທ່ານ ສຸດໃຈ ໄຊຍະວົງ ຮອງຫົວໜ້າ ຄະນະຈັດຕັ້ງແຂວງ ພ້ອມດ້ວຍບັນດາ ຂະແໜງການອ້ອມຂ້າງ, ຝ່າຍແຂວງກວາງຈິ ນຳໂດຍ ທ່ານ ຫງວຽນ ວັນ ຮຸ່ງ ຄະນະປະຈຳພັກແຂວງ ຫົວໜ້າ ຄະນະຈັດຕັ້ງແຂວງ, ທ່ານ ຫງວຽນ ຫື້ວ ແທງ ກຳມະການພັກແຂວງ ຫົວໜ້າໂຮງຮຽນການເມືອງ-ການປົກ ເລຢວນ ພ້ອມດ້ວຍຂະແໜງການອ້ອມຂ້າງ ເຂົ້າຮ່ວມ.
ໂອກາດດັ່ງກ່າວ ທັງສອງຝ່າຍ ໄດ້ຜັດປ່ຽນກັນ ລາຍງານສະພາບການພັດທະນາ ເສດຖະກິດ-ສັງຄົມ ແລະ ການປະຕິບັດໜ້າທີ່ວິຊາສະເພາະ ໃຫ້ກັນຊາບໂດຍສັງເຂບ. ນອກນັ້ນ, ທາງຝ່າຍແຂວງສະຫວັນນະເຂດ ກໍໄດ້ກ່າວສະແດງຄວາມຂອບໃຈ ຕໍ່ການບຳລຸງສ້າງພະນັກງານນຳພາ ຂອງແຂວງສະຫວັນນະເຂດ, ໃນນັ້ນ ຜ່ານການໄປບຳລຸງທິດສະດີ ການເມືອງ-ການປົກຄອງ ຢູ່ແຂວງກວາງຈິ ເຫັນວ່າ: ບັນດາພະນັກງານ ທີ່ໄປຍົກລະດັບມາ ກໍໄດ້ມີການບັນຈຸ, ສັບຊ້ອນ ເຂົ້າໃນຕຳແໜ່ງງານທີ່ສຳຄັນ ແລະ ໄດ້ຮັບມອບໝາຍໜ້າທີ່ວຽກງານ ທີ່ທາງພັກ-ລັດ ໄດ້ມອບໝາຍໃຫ້. ສ່ວນແຂວງກວາງຈິ ກໍ່ຍິນດີສືບຕໍ່ບຳລຸງ ສ້າງພະນັກງານ ຂອງແຂວງສະຫວັນນະເຂດ ຢູ່ໂຮງຮຽນການເມືອງ-ການປົກຄອງເລຢວນຕໍ່ໄປ, ພ້ອມນັ້ນ, ໃນທ້າຍເດືອນກໍລະກົດ ທີ່ຈະມາເຖິງນີ້ ຄະນະຈັດຕັ້ງແຂວງກວາງຈິ ຮ່ວມກັບໂຮງຮຽນການເມືອງ-ການປົກຄອງເລຢວນ ຈະໄດ້ພ້ອມກັນຈັດກອງປະຊຸມສະຫລຸບ 10 ປີ ຂອງການຊ່ວຍເຫລືອບຳລຸງສ້າງພະແນກງານ ຂອງແຂວງສະຫວັນນະເຂດ.
ໃນໂອກາດ ທີ່ມາພົບປະແລກປ່ຽນບົດຮຽນ ຢູ່ແຂວງສະຫວັນນະເຂດ, ຄະນະຈັດຕັ້ງແຂວງກວາງຈິ ກໍໄດ້ເຂົ້າຢ້ຽມ ທ່ານ ຄຳພູນ ຕຸໄພທູນ ຄະນະປະຈຳພັກແຂວງ ຮອງເຈົ້າແຂວງສະຫວັນນະເຂດ ອີກດ້ວຍ.
（ຫັດທະບູນ）
