 |
ທ່ານ ເມນຸລາດ ຮອງປະທານ ອົງການກາແດງລາວ ພ້ອມຄະນະ ໄດ້ເຂົ້າວາງພວງມະລາໄວ້ອາໄລຕໍ່ການຈາກໄປ ຂອງ ທ່ານ ເຈີ່ນດ໋າຍ ກວາງ ປະທານປະເທດ ສສ ຫວຽດນາມ.
ທ່ານ ເມນຸລາດ ຮອງປະທານ ອົງການກາແດງລາວ ພ້ອມຄະນະ ໄດ້ເຂົ້າວາງພວງມະລາໄວ້ອາໄລ ຕໍ່ການຈາກໄປ ຂອງ ທ່ານ ເຈີ່ນ ດ໋າຍ ກວາງ ເພື່ອສະແດງຄວາມໄວ້ອາໄລ ແລະ ເສຍໃຈຢ່າງສຸດຊຶ້ງ ຕໍ່ການຈາກໄປ ໂດຍບໍ່ມີວັນກັບຄືນມາຂອງສະຫາຍ ເຈິ່ນ ດ໋າຍ ກວາງ. ການຈາກໄປຂອງສະຫາຍ ບໍ່ພຽງແຕ່ເປັນການສູນເສຍຜູ້ນຳທີ່ເຄົາລົບຮັກຂອງພັກ, ລັດ ແລະ ປະຊາຊົນຫວຽດນາມ ແຕ່ຍັງເປັນການສູນເສຍ ເພື່ອນມິດສະຫາຍທີ່ໃກ້ຊິດ ແລະ ສະໜິດສະໜົມທີ່ສຸດຂອງພັກ, ລັດ ແລະ ປະຊາຊົນລາວ ນຳອີກ.
ສະຫາຍ ເຈິ່ນດ໋າຍ ກວາງ ເປັນຜູ້ໜຶ່ງທີ່ປະກອບສ່ວນອັນສໍາຄັນ ເຂົ້າໃນພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ ຂອງ ສສ ຫວຽດນາມ, ໂດຍສະເພາະ ໃນຂົງເຂດວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນ ຂອງ ສສ ຫວຽດນາມ, ທັງເປັນຜູ້ທີ່ປະກອບສ່ວນອັນສຳຄັນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຕະຫລອດມາ.
（ຫັດທະບູນ）
