ເຄົາລົບກົດໝາຍ ແລະ ເຄົາລົບເຊິ່ງກັນ ແລະກັນໃນການພົວພັນສາກົນ

ເວທີປາໄສແຊງຊາງປັກກິ່ງ ຄັ້ງທີ 9 ແມ່ນເວທີປາໄສມີຈຳນວນເຈົ້າໜ້າທີ່ອາວຸໂສ ແລະນັກຊ່ຽວຊານ, ນັກຮຽນຮູ້ເຂົ້າຮ່ວມເປັນຈຳນວນຫຼາຍທີ່ສຸດນັບແຕ່ກ່ອນມາຮອດປະຈຸບັນ. ຜົນສະທ້ອນ ແລະຄວາມດູດດື່ມຂອງເວທີປາໄສແຊງຊາງປັກກິ່ງ ຄັ້ງທີ 9 ນັບມື້ນັບເພີ່ມຂຶ້ນ, ຍ້ອນເຫດນັ້ນ, ບັນດາເນື້ອໃນທີ່ນຳມາສະເໜີຢູ່ເວທີປາໄສຈຶ່ງນັບມື້ນັບມີຫຼາຍຮູບຫຼາຍແບບ.

ບັນຍາກາດທີ່ກອງປະຊຸມ.(ພາບ: Xinhuanews)

ເມື່ອທຽບໃສ່ກັບບັນດາເວທີປາໄສຄັ້ງກ່ອນ, ບັນດາວາລະປຶກສາຫາລືຕາມກຸ່ມໃນເວທີປາໄສປີນີ້ມີຫົວຂໍ້ລະອຽດກວ່າ. ຕົວຢ່າງ, ຫົວຂໍ້ “ຕີລາຄາກົນໄກກໍ່ສ້າງຄວາມໄວ້ເນື້ອເຊື່ອໃຈກ່ຽວກັບຄວາມໝັ້ນຄົງການທະຫານອາຊີ-ປາຊີຟິກ” ໃນເວທີປາໄສຄັ້ງນີ້ໄດ້ຫັນເປັນ 2 ວາລະປຶກສາຫາລືຕາມກຸ່ມ “ກອບຄວາມໝັ້ນຄົງອາຊີ-ປາຊີຟິກ” ແລະ “ສ້າງກົນໄກໃນການສ້າງຄວາມໄວ້ເນື້ອເຊື່ອໃຈ”. ເວທີປາໄສປີນີ້ມີ 4 ວາລະປະຊຸມຄົບຄະນະ, 8 ວາລະປຶກສາຫາລືຕາມກຸ່ມ ແລະວາລະປຶກສາຫາລືພິເສດ, ໃນນັ້ນ, ຈໍານວນວາລະປຶກສາຫາລືຕາມກຸ່ມໄດ້ເພີ່ມຂຶ້ນທົບສອງເທົ່າເມື່ອທຽບກັບເວທີປາໄສຄັ້ງກ່ອນ. ຫົວຂໍ້ຂອງບັນດາວາລະຄົບຄະນະລວມມີ: ການພົວພັນຂອງປະເທດໃຫຍ່ ແລະຄວາມເປັນລະບຽບຮຽບຮ້ອຍຂອງໂລກ; ການຄຸ້ມຄອງຄວາມສ່ຽງກ່ຽວກັບຄວາມໝັ້ນຄົງຢູ່ອາຊີ-ປາຊີຟິກ; ຜົນປະໂຫຍດຂອງບັນດາປະເທດປານກາງ ແລະນ້ອຍ ແລະຄວາມໝັ້ນຄົງລວມ; ກົນໄກຄວບຄຸມອາວຸດສາກົນ ແລະຄວາມໝັ້ນຄົງທົ່ວໂລກ.

ທ່ານພົນເອກ ໂງຊວນລິກ ໄດ້ສະເໜີບາງມາດຕະການເພື່ອຄຸ້ມຄອງບັນດາຄວາມສ່ຽງດ້ານຄວາມໝັ້ນຄົງໃນພາກພື້ນ, ໃນນັ້ນໄດ້ຍົກສູງຈິດໃຈເຄົາລົບກົດໝາຍ ແລະເຄົາລົບເຊິ່ງກັນ ແລະກັນໃນການພົວພັນສາກົນກໍ່ຄືໃນການແກ້ໄຂບັນດາການຂັດແຍ້ງ, ຄວາມບໍ່ລົງລອຍກັນໂດຍສັນຕິວິທີ, ດ້ວຍຈິດໃຈຄູ່ຮ່ວມມື, ເພື່ອຄວາມຮັບຜິດຊອບປະຊາຄົມ. ພ້ອມທັງເນັ້ນໜັກວ່າ, ບັນຫາທະເລຕາເວັນອອກຕ້ອງໄດ້ແກ້ໄຂໂດຍສັນຕິວິທີ, ບໍ່ນຳໃຊ້ກຳລັງອາວຸດ, ນາບຂູ່ນຳໃຊ້ກຳລັງອາວຸດ, ບົນພື້ນຖານກົດໝາຍສາກົນ, ເຄົາລົບຜົນປະໂຫຍດອັນຊອບທຳຂອງແຕ່ລະປະເທດດ້ວຍຈິດໃຈຄູ່ຮ່ວມມື, ເພື່ອຄວາມຮັບຜິດຊອບປະຊາຄົມ. ຫວຽດນາມ ໃຫ້ຄຳໝັ້ນສັນຍາວ່າຈະມານະພະຍາຍາມພ້ອມກັບບັນດາປະເທດຊຸກຍູ້ການຮ່ວມມືເພື່ອແນໃສ່ກໍ່ສ້າງທະເລຕາເວັນອອກໃຫ້ກາຍເປັນພາກພື້ນມີສັນຕິພາບ, ສະຖຽນລະພາບ ແລະພັດທະນາ, ເພື່ອຜົນປະໂຫຍດລວມຂອງທຸກປະເທດທັງພາຍໃນ ແລະນອກພາກພື້ນ. ຫຼັກໝັ້ນຂອງຫວຽດນາມ ແມ່ນສະໜັບສະໜູນ ແລະປົກປ້ອງສິດເສລີໃນການໄປມາ, ຄວາມໝັ້ນຄົງ, ຄວາມປອດໄພໃນການເດີນທະເລ ແລະການບິນຢູ່ທະເລຕາເວັນອອກໃຫ້ສອດຄ່ອງກັບກົດໝາຍສາກົນ. ຫວຽດນາມ ຢຶດໝັ້ນແຜນນະໂຍບາຍແກ້ໄຂບັນຫາທະເລຕາເວັນອອກໂດຍສັນຕິວິທີ, ເໝາະສົມກັບກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດ ກ່ຽວກັບກົດໝາຍວ່າດ້ວຍທະເລປີ 1982 (UNCLOS 1982).

（ໄຊພອນ）