ການກະທຳຂອງຈີນ ກໍ່ຜົນສະທ້ອນເຖິງຫຼາຍປະເທດທີ່ມີອະທິປະໄຕຢູ່ທະເລຕາເວັນອອກ

ການກະທຳຂອງຈີນ ກໍ່ຜົນສະທ້ອນເຖິງຫຼາຍປະເທດທີ່ມີອະທິປະໄຕຢູ່ທະເລຕາເວັນອອກ.(ພາບ:suckhoedoisong.vn)

ໃນຊຸມມື້ຜ່ານມາ, ກຸ່ມກ່ຳປັ່ນສຳຫຼວດໄຮ້ຢ໊າງ 8 ຂອງຈີນ ໄດ້ລະເມີດເປັນຄັ້ງທີ 2 ເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງຫວຽດນາມ ຢູ່ທາງທິດໃຕ້ທະເລຕາເວັນອອກ. ຫາງສຽງມີຄວາມວິຕົກກັງວົນຕໍ່ບັນດາການກະທຳລະເມີດຂອງຈີນ ຢູ່ທະເລຕາເວັນອອກ ເຮັດໃຫ້ຫຼຸດຜ່ອນຄວາມໄວ້ເນື້ອເຊື່ອໃຈ, ເພີ່ມຄວາມເຄັ່ງຕຶງ, ພາໄປເຖິງການຂາດຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລ ແລະ ການບິນ.

ໃນໄລຍະຜ່ານມາ, ຫຼາຍປະເທດຢູ່ພາກພື້ນ ແລະ ໃນໂລກ ລ້ວນແຕ່ສະແດງໃຫ້ເຫັນຄວາມວິຕົກກັງວົນຕໍ່ເລື່ອງຈີນ ມີບັນດາການກະທຳລະເມີດເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງຫວຽດນາມ ຢ່າງຕໍ່ເນື່ອງ. ມາຮອດປະຈຸບັນ, ຫວຽດນາມ ຍັງຢືດໝັ້ນການແກ້ໄຂຜ່ານທາງການທູດໂດຍສັນຕິວິທີ, ເດັດດ່ຽວຮຽກຮ້ອງໃຫ້ຈີນ ຢຸດຕິບັນດາການກະທຳລະເມີດອຳນາດອະທິປະໄຕ, ສິດອະທິປະໄຕຂອງຫວຽດນາມ, ຢືດໝັ້ນຮຽກຮ້ອງຄວາມສາມັກຄີໃນພາກພື້ນ, ຍົກສູງການເຄົາລົບກົດໝາຍສາກົນ.

ສົນທິສັນຍາກົດໝາຍວ່າດ້ວຍທະເລປີ 1982 - ກຳນົດວ່າ, ໃນເຂດເສດຖະກິດຈຳເພາະຂອງບັນດາປະເທດ, ເມື່ອປະເທດອື່ນຢາກສຳຫຼວດ, ຂຸດຄົ້ນ ຫຼື ຫາປາ ລ້ວນແຕ່ຕ້ອງຂໍອະນຸຍາດນຳປະເທດປະຈຳຖິ່ນ. ຖ້າຫາກບໍ່ໄດ້ຮັບຄວາມເຫັນດີຂອງປະເທດປະຈຳຖິ່ນນັ້ນ, ຕໍ່ຖືວ່າ ການກະທຳນັ້ນແມ່ນລະເມີດກົດໝາຍສາກົນ, ລະເມີດອຳນາດອະທິປະໄຕ, ສິດອະທິປະໄຕ ແລະ ສິດອຳນາດສານຂອງປະເທດມີເຂດເສດຖະກິດຈຳເພາະ.

ໃນກໍລະນີດັ່ງກ່າວ, ການກະທຳຂອງຈີນ ນຳກ່ຳປັ່ນ ໄຮ້ຢ໊າງ 8 ມາສຳຫຼວດຢູ່ຫາດດອນ ຕືຈິ໊ງ ຂອງຫວຽດນາມ ແມ່ນລະເມີດສົນທິສັນຍາກົດໝາຍວ່າດ້ວຍທະເລປີ 1982 ຢ່າງຮ້າຍແຮງ. ການກະທຳດັ່ງກ່າວຂອງຈີນ ກໍ່ລະເມີດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ເຊິ່ງຈີນ ໄດ້ລົງນາມກັບບັນດາປະເທດອາຊຽນ ຢູ່ກຳປູເຈຍ.

ຖະແຫຼງການຂອງກະຊວງການຕ່າງປະເທດອາເມລິກາ ເນັ້ນໜັກວ່າ, ບັນດາການກະທຳຂອງຈີນ ໄດ້ຕັ້ງຄຳຖາມຢ່າງເຂັ້ມງວດກ່ຽວກັບບັນດາຄຳໝັ້ນສັນຍາຂອງປັກກິງ ກ່ຽວກັບມາດຕະການສັນຕິພາບໃຫ້ແກ່ບັນດາການຂັດແຍ້ງກັນຢູ່ທະເລ. ຕາມກະຊວງການຕ່າງປະເທດອາເມລິກາ ແລ້ວ, ເລື່ອງຈີນ ຜັນຂະຫຍາຍກ່ຳປັ່ນສຳຫຼວດຂຶ້ນກັບກຳມະສິດລັດຖະບານ, ພ້ອມກັບບັນດາກ່ຳປັ່ນປ້ອງກັນຈຳນວນໜຶ່ງທີ່ປະກອບອາວຸດ, ເຂົ້າໄປເຂດທະເລຂອງຫວຽດນາມ ຄືນໃໝ່ ໃນວັນທີ 13 ສິງຫາ ຜ່ານມາ ແມ່ນ “ການກະທຳປີນຂັ້ນໄດຂອງປັກກິງ ໃນຄວາມມານະພະຍາຍາມເພື່ອນາບຂູ່ບັນດາປະເທດທີ່ຖະແຫຼງອະທິປະໄຕ ພວມຂຸດຄົ້ນບັນດາແຫຼ່ງຊັບພະຍາກອນຢູ່ທະເລຕາເວັນອອກ”.

ການກະທຳຂອງຈີນ ນຳກ່ຳປັ່ນມາສຳຫຼວດຢູ່ ຫາດດອນ ຕືຈິ໊ງ ຂອງຫວຽດນາມ ຄວາມຈິງແມ່ນໄປຝືນກັບກົດໝາຍສາກົນທັງໝົດ, ໄປຝືນກັບບັນດາສິ່ງທີ່ຈີນ ໃຫ້ຄຳໝັ້ນສັນຍາກັບໂລກ ແລະ ຫວຽດນາມ. ສະນັ້ນ, ການກະທຳດັ່ງກ່າວຂອງຈີນ ເອງໄດ້ເຮັດໃຫ້ອິດທິພົນຊື່ສຽງຂອງຈີນ ບົນເວທີສາກົນຖືກຫຼຸດໜ້ອຍຖອຍລົງຢ່າງງຮ້າຍແຮງ.

ທ່ານນາງ ເລທິທູຮັ່ງ ໂຄສົກກະຊວງການຕ່າງປະເທດຫວຽດນາມ ໄດ້ເນັ້ນຫນັກວ່າ: ຫວຽດນາມ ສະເຫນີບັນດາປະເທດກ່ຽວຂ້ອງ ແລະ ປະຊາຄົມສາກົນ ປະກອບສ່ວນຕັ້ງຫນ້າ, ແທດຈິງ ເຂົ້າໃນການຮັກສາຄວາມເປັນລະບຽບຮຽບຮ້ອຍ, ສັນຕິພາບ, ຄວາມໝັ້ນຄົງໃນພາກພຶ້ື້ນ, ຄວາມປອດໄພການເດີນທະເລ ແລະ ການບິນ, ເຄົາລົບກົດໝາຍວ່າດ້ວຍທະເລ, ເໝາະສົມກັບກົດໝາຍສາກົນ ເປັນຕົ້ນແມ່ນສົນທິສັນຍາ ສປຊ ກ່ຽວກັບກົດໝາຍທະເລປີ 1982.

（ໄຊພອນ）