ຫວຽດນາມ ໄດ້ຮັບຄວາມໄວ້ເນື້ອເຊື່ອໃຈຈາກເພື່ອນມິດສາກົນ

ຫວຽດນາມ ໄດ້ຮັບຄວາມໄວ້ເນື້ອເຊື່ອໃຈຈາກເພື່ອນມິດສາກົນ.(ພາບ:vnexpress.net)

ການຕັດສິນໃຈຂອງຫວຽດນາມຄັ້ງນີ້ ສະແດງໃຫ້ເຫັນຄວາມປາດຖະໜາຢາກປະກອບສ່ວນຫຼາຍຢ່າງຕື່ມອີກ ເຂົ້າໃນຄວາມມານະພະຍາຍາມທົ່ວໄປຂອງປະຊາຄົມສາກົນ ໃນການຍົກສູງກົດໝາຍສາກົນ ແລະ ກົດບັດ ສປຊ, ຊຸກຍູ້ບົດບາດຂອງ ສປຊ ແລະ ລະບອບລະບຽບການຫຼາຍຝ່າຍ, ພິເສດແມ່ນໃນການຮັກສາສັນຕິພາບ ແລະ ຄວາມໝັ້ນຄົງສາກົນ.

ຫວຽດນາມ ແມ່ນສະມາຊິກ ທີ່ມີຄວາມຕັ້ງໜ້າຂອງອາຊຽນ; ຫວຽດນາມ ກຳລັງຮ່ວມກັບບັນດາປະເທດສະມາຊິກອື່ນ ພະຍາຍາມກໍ່ສ້າງປະຊາຄົມອາຊຽນ ໃຫ້ໝັ້ນຄົງເຂັ້ມແຂງ ແລະ ສະໜິດຕິດພັນກັນ, ຈາກນັ້ນປະກອບສ່ວນເຂົ້າໃນການຮັບປະກັນສັນຕິພາບ, ສະຖຽນລະພາບ ແລະ ວັດທະນາຖາວອນຂອງພາກພື້ນ ແລະ ໂລກ.

ທ່ານເອກອັກຄະລັດຖະທູດ Dian Triansyah Djani, ຫົວໜ້າຄະນະຜູ້ຕາງໜ້າອິນໂດເນເຊຍ ປະຈຳ ສປຊ ສະແດງຄວາມເຊື່ອໝັ້ນວ່າ: ຖ້າວ່າຫວຽດນາມ ຊະນະການເລືອກຕັ້ງ, ກໍ່ຈະດຳລົງຕຳແໜ່ງກຳມະການບໍ່ປະຈຳ ຂອງຕົນ ຢູ່ ສະພາຄວາມໝັ້ນຄົງ ສປຊ ໄດ້ເປັນຢ່າງດີ, ຍ້ອນວ່າ ຫວຽດນາມ ໄດ້ຮັບຄວາມໄວ້ເນື້ອເຊື່ອໃຈສູງທີ່ສຸດ.

ສ່ວນ ທ່ານ Antonio Alessandro ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ.ອີຕາລີ ປະຈຳຫວຽດນາມ ໃຫ້ຂໍ້ສັງເກດວ່າ: ເມື່ອດຳລົງຕຳແໜ່ງເປັນກຳມະການບໍ່ປະຈຳສະພາຄວາມໝັ້ນຄົງ ສປຊ, ຫວຽດນາມ ຈະມີການປະກອບສ່ວນອັນສຳຄັນທີ່ສຸດ ເຂົ້າໃນການເສີມສ້າງສັນຕິພາບ, ສະຖຽນລະພາບໃນໂລກ. ກໍ່ຄ້າຍຄືກັນກັບຄັ້ງທຳອິດທີ່ດຳລົງຕຳແໜ່ງນີ້ໃນສະໄໝປີການ 2008-2009, ຫວຽດນາມ ຈະພິສູດໃຫ້ເຫັນວ່າເປັນປະເທດທີ່ມີຄວາມຮັບຜິດຊອບຕໍ່ປະຊາຄົມສາກົນ.

ມີທັດສະນະຄືກັບທ່ານ Antonio Alessandro, ທ່ານ Ian Martin, ອະດີດຜູ້ອຳນວຍການບໍລິຫານຂອງອົງການລາຍງານສະພາຄວາມໝັ້ນຄົງ ສປຊ ຢືນຢັນວ່າ: ຫວຽດນາມ ໄດ້ສະແດງໃຫ້ເຫັນບົດບາດ ແລ້ວໃນການເປັນກຳມະການບໍ່ປະຈຳຂອງສະພາຄວາມໝັ້ນຄົງ ສປຊ ສະໄໝປີການ 2008-2009 ໄດ້ດີທີ່ສຸດ. ຫວຽດນາມ ກໍ່ມີບົດຮຽນສາກົນຫຼາຍຢ່າງ, ສະນັ້ນ, ຂ້າພະເຈົ້າເຊື່ອໝັ້ນວ່າຫວຽດນາມ ຈະມີບັນດາການປະກອບສ່ວນເປັນຢ່າງດີ ເມື່ອໄດ້ເປັນກຳມະການບໍ່ປະຈຳສະພາຄວາມໝັ້ນຄົງ ສປຊ ສະໄໝປີການ 2020-2021.

（ໄຊພອນ）