ບັນດາທ່ານລັດຖະມົນຕີໄດ້ຢືນຢັນຄວາມຕັດສິນໃຈໃນການປະຕິບັດວິໄສທັດປະຊາຄົມອາຊຽນ ຮອດປີ 2025 ຢ່າງຄົບຖ້ວນ ແລະ ມີປະສິດທິຜົນ, ສືບຕໍ່ຜັນຂະຫຍາຍບັນດາການກຳນົດທິດ, ຂໍ້ລິເລີ່ມສ້າງອາຊຽນ ໃຫ້ມີີຄວາມເຂັ້ມແຂງດ້ວຍຕົນເອງ, ປະດິດຄິດສ້າງ ແລະ ພັດທະນາຍືນຍົງໃນທຸກດ້ານ, ພ້ອມກັນນັ້ນກໍ່່ຢືນຢັນຄືນໃໝ່ຄຳໝັ້ນສັນຍາເພີ່ມທະວີການຮ່ວມມື ຮັກສາ ແລະ ຊຸກຍູ້ສັນຕິພາບ, ສະຖຽນລະພາບ ແລະ ຄວາມໝັ້ນຄົງໃນພາກພື້ນ, ກໍາຈັດສິ່ງທ້າທາຍທີ່ພວມພົ້ນເດັ່ນຂຶ້ນຢ່າງມີປະສິດທິຜົນ.
 |
ທ່ານນາຍົກລັດຖະມົນຕີໄທ ປຣາຢຸດ ຈັນໂອຊາ ກ່າວຄໍາເຫັນທີ່ກອງປະຊຸມ. (ພາບ: TTXVN)
ເມື່ອປຶກສາຫາລືກ່ຽວກັບສະພາບການຢູ່ທະເລຕາເວັນອອກ, ບັນດາລັດຖະມົນຕີໄດ້ຮັບຮູ້ຄວາມວິຕົກກັງວົນກ່ຽວກັບການເຄື່ອນໄຫວຖົມດິນເປັນເກາະ, ພິເສດແມ່ນບັນດາເຫດການທີ່ພວມເກີດຂຶ້ນຢູ່ທະເລຕາເວັນອອກ. ບັນດາລັດຖະມົນຕີໄດ້ອອກຖະແຫຼງການຮ່ວມຂອງກອງປະຊຸມ, ໃນນັ້ນຮຽກຮ້ອງບັນດາຝ່າຍຫຼີກລ້ຽງເລື່ອງເຮັດໃຫ້ຄວາມເຄັ່ງຕຶງ ຢູ່ທະເລຕາເວັນອອກເພີ່ມຂຶ້ນດ້ວຍການດັດແປງພື້ນທີ່ຕົວຈິງ ຫຼື ບັນດາເຫດການທີ່ຮ້າຍແຮງ. ຕາມນັ້ນແລ້ວ, ອາຊຽນ ຢືນຢັນຄືນໃໝ່ຄວາມສຳຄັນຂອງການປະຕິບັດຕາມກົດໝາຍສາກົນ, ສົນທິສັນຍາກົດໝາຍວ່າດ້ວຍທະເລປີ 1982, ຮຽກຮ້ອງໃຫ້ບັນດາຝ່າຍຄວນລະງັບໃຈ, ບໍ່ຫັນເປັນການທະຫານ ແລະ ຫຼີກລ້ຽງມີບັນດາການກະທຳເຮັດໃຫ້ສະພາບການສັບສົນຂຶ້ນຕື່ມ; ແກ້ໄຂການຂັດແຍ້ງໂດຍສັນຕິວິທີບົນພື້ນຖານກົດໝາຍສາກົນ, ສົນທິສັນຍາກົດໝາຍວ່າດ້ວຍທະເລປີ 1982. ບັນດາປະເທດອາຊຽນ ໃຫ້ຄຳໝັ້ນສັນຍາສືບຕໍ່ມານະພະຍາຍາມປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ, ມີປະສິດທິຜົນ ແລະ ບັນລຸກົດແຫ່ງການປະພຶດຢູ່ທະເລຕາເວັນອອກ (COC) ໃຫ້ມີປະສິດທິຜົນ, ຄຸນນະພາບ.
（ແຫຼ່ງຂໍ້ມູນ： vovworld.vn）
