 |
ປີ 2018 ວົງເງິນສົ່ງອອກສິນຄ້າຫວຽດນາມບັນລຸ 244,7 ຕື້ໂດລາ
ເມື່ອຫວນຄືນໝາກຜົນແຫ່ງການເຕີບໂຕເສດຖະກິດ - ສັງຄົມ, ດ້ວຍ GDP ບັນລຸ 7,08% ຊຶ່ງແມ່ນລະດັບເຕີບໂຕສູງ, ລື່ນກາຍຄາດໝາຍຂອງສະພາແຫ່ງຊາດທີ່ໄດ້ວາງອອກ. ພິເສດວົງເງິນສົ່ງອອກໃນປີຜ່ານມາບັນລຸໝາກຜົນເປັນທີ່ໜ້າປະທັບໃຈ, ເຮັດໃຫ້ຫວຽດນາມກາຍເປັນໜຶ່ງໃນບັນດາປະເທດສົ່ງອອກແຖວໜ້າໃນໂລກ. ກົມໃຫຍ່ສະຖິຕິລາຍງານວ່າ: ວົງເງິນສົ່ງອອກສິນຄ້າ ປີ 2018 ບັນລຸ 244,7 ຕື້ໂດລາ, ເພີ່ມຂຶ້ນ 13,8% ເມື່ອທຽບໃສ່ ປີ 2017 (ລື່ນກາຍຄາດໝາຍທີ່ສະພາແຫ່ງຊາດໄດ້ວາງ ອອກ ແມ່ນເພີ່ມຂຶ້ນ 7 - 8%). ສິ່ງທີ່ໜ້າສົນໃຈແມ່ນຂົງເຂດເສດຖະກິດພາຍໃນປະເທດໄດ້ມີການຫັນປ່ຽນຢ່າງຕັ້ງໜ້າ ເມື່ອບັນລຸລະດັບເຕີບໂຕວົງເງິນສົ່ງອອກສູງກວ່າຂົງເຂດທີ່ມີເງິນລົງທຶນຈາກຕ່າງປະເທດ.
ປີ 2018 ຈໍານວນສິນຄ້າ 29 ປະເພດທີ່ບັນລຸວົງເງິນສົ່ງອອກຫຼາຍກວ່າ 1 ຕື້ໂດລາ, ກວມເອົາກວ່າ 91% ຍອດວົງເງິນສົ່ງອອກຂອງທົ່ວປະເທດ. ໃນນັ້ນ, ສິນຄ້າ 9 ປະເພດບັນລຸຫຼາຍກວ່າ 5 ຕື້ໂດລາ ແລະ ສິນຄ້າ 5 ປະເພດບັນລຸຫຼາຍກວ່າ 10 ຕື້ໂດລາ. ໂທລະສັບ ແລະ ເຄື່ອງອາໄຫຼ່ແມ່ນສິນຄ້າປະເພດໜຶ່ງ ທີ່ມີລະດັບເຕີບໂຕສູງທີ່ສຸດ, ບັນລຸ 50 ຕື້ໂດລາ, ຮອງລົງມາແມ່ນເຄື່ອງຕໍ່າແຜ່ນຕັດຫຍິບບັນລຸຫຼາຍກວ່າ 30 ຕື້ໂດລາ, ຂະແໜງເອເລັກໂຕຣນິກ, ຄອມພິວເຕີ ແລະ ອາໄຫຼ່ອຸປະກອນກໍມີລະດັບເຕີບໂຕກະໂດດຂັ້ນບັນລຸຫຼາຍກວ່າ 29 ຕື້ໂດລາ. ນອກຈາກນັ້ນ, ວົງເງິນສົ່ງອອກສິນໃນນໍ້າ ແລະ ຜະລິດຕະພັນກະສິກໍາກໍມີການເຕີບໂຕກະໂດດຂັ້ນ. ທ່ານ ເຈີ່ນຕວັນແອັງ ລັດຖະມົນຕີກະຊວງການຄ້າ ແລະ ອຸດສາຫະກຳຫວຽດນາມ ໃຫ້ຮູ້ວ່າ: ບັນດາໝາກຜົນດັ່ງກ່າວເປັນໜ້າຊື່ນຊົມທີ່ລື່ນກາຍຄາດໝາຍທີ່ສະພາແຫ່ງຊາດວາງອອກ. ຜົນງານດັ່ງກ່າວສະແດງໃຫ້ເຫັນຄວາມຕັດສິນຂອງລັດຖະບານດ້ວຍການເຄື່ອນໄຫວຕ່າງໆ. ພິເສດແມ່ນຜ່ານບັນດາຂອດຕີລາຄາ ແລະ ຄາດຄະເນ.
ຈາກນັ້ນ ມີບັນດາມາດຕະການ ແລະ ວິທີແກ້ໄຂຖືກທິດ. ທ່ານ ເຈິ່ນ ຕວັນແອັງ ໃຫ້ຂໍ້ສັງເກດວ່າ: ບັນດາໝາກຜົນຂອງແຕ່ລະໄຕມາດໃນປີ 2018 ລ້ວນແຕ່ ມີຈຸດປະທັບໃຈ ແລະ ຕັ້ງໜ້າ. ດັ່ງນັ້ນ, ດ້ວຍບັນດາໝາກຜົນຂອງການເຕີບໂຕອາດຈະເວົ້າໄດ້ວ່າ: ແມ່ນສູງພໍສົມຄວນພ້ອມທັງຮັກສາໄດ້ຄວາມມີສະຖຽນລະພາບ ແລະ ຄວາມໝັ້ນຄົງຂອງການສົ່ງອອກ. ພິເສດໃນຂົງເຂດອຸດສາຫະກຳປຸງແຕ່ງ, ປະດິດສ້າງໄດ້ສ້າງກໍາລັງໜູນເພື່ອຊຸກຍູ້ການເຕີບໂຕຂອງບັນດາດັດຊະນີການຜະລິດອຸດສາຫະກຳກໍຄືກ ານປະກອບສ່ວນຂອງອຸດສາຫະກຳໃນໂຄງປະກອບຂອງ GDP ກໍຄືການເຕີບໂຕ ຂອງ GDP ເວົ້າລວມ. ຕາມແຫຼ່ງຂ່າວຈາກວິທະຍຸກະຈາຍສຽງຫວຽດນາມ: ຈຸດພົ້ນເດັ່ນອີກອັນໜຶ່ງໃນຂົງເຂດສົ່ງອອກທີ່ໜ້າຊື່ນຊົມຄື: ຂົງເຂດວິສາຫະກິດມີເງິນລົງທຶນຈາກພາຍໃນປະເທດໄດ້ບືນຕົວຂຶ້ນດ້ວຍລະດັບເຕີບໂຕເກືອບ 16%. ໃນຂະນະດຽວກັນ, ຂົງເຂດເງິນລົງທຶນໂດຍກົງຂອງຕ່າງປະເທດ (FDI) ຍາມໃດກໍບັນລຸລະດັບເກີນດຸ່ນ. ບັນດາຜົນງານກ່ຽວກັບການສົ່ງອອກໃນປີ 2018 ໄດ້ເຮັດໃຫ້ຫວຽດນາມກາຍເປັນໜຶ່ງໃນບັນດາປະເທດທີ່ມີລະດັບຄວາມໄວການເຕີບໂຕຂອງການສົ່ງອອກແຖວໜ້າຂອງໂລກ. ຫວຽດນາມຢູ່ອັນດັບທີ 3 ໃນການສົ່ງອອກເກີບໜັງ, ອັນດັບທີ 7 ໃນການສົ່ງອອກສິນຄ້າປະເພດຕໍ່າແຜ່ນຕັດຫຍິບ ແລະ ສິນຄ້າອື່ນໆອີກຫຼາຍປະເພດຄື: ເຂົ້າສານ, ກາເຟ, ຢາງພາລາ ຊຶ່ງແມ່ນບັນດາທ່າແຮງຂອງຫວຽດນາມຊຶ່ງຍາມໃດກໍຮັກສາຢູ່ໃນກຸ່ມແຖວໜ້າຂອງໂລກ.
ປີ 2019 ແມ່ນປີທີ່ມີຄວາມໝາຍສຳຄັນເປັນພິເສດສຳລັບການພັດທະນາເສດຖະກິດເວົ້າລວມ ແລະ ຂົງເຂດສົ່ງອອກຂອງຫວຽດນາມເວົ້າສະເພາະ. ສັນຍາຄູ່ຮ່ວມມືຮອບດ້ານ ແລະ ກ້າວໜ້າປາຊີຟິກ (CPTPP) ມີຜົນສັກສິດນັບແຕ່ວັນທີ 30 ເດືອນທັນວາ ປີ 2018 ເປັນຕົ້ນໄປ, ອັນໄດ້ສ້າງພາກພື້ນການຄ້າເສລີໂດຍກວມເອົາປະມານ 1/10 ພື້ນຖານເສດຖະກິດໂລກ. ບັນດາຜູ້ຜະລິດສົ່ງອອກຖືວ່າແມ່ນຜູ້ທຳອິດທີ່ໄດ້ຮັບຜົນປະໂຫຍດຈາກສັນຍາດັ່ງກ່າວ. ການພົວພັນດ້ານການຄ້າລະຫວ່າງ ຫວຽດນາມ - ເອີຣົບຈະກ້າວເຂົ້າສູ່ໄລຍະໃໝ່, ເມື່ອສັນຍາການຄ້າເສລີລະຫວ່າງ ຫວຽດນາມ ແລະ ເອີຣົບ ໄດ້ຮັບການໃຫ້ສັດຕະຍາບັນໃນອະນາຄົດອັນໃກ້ໆນີ້. ທ່ານ ກາວ ກວັກ ຟອງ ຮອງລັດຖະມົນຕີກະຊວງການຄ້າ ແລະ ອຸດສາຫະກຳຫວຽດນາມໃຫ້ຂໍ້ສັງເກດວ່າ: ຄາດວ່າສົນທິສັນຍາການຄ້າເສລີສະບັບນີ້ຈະສ້າງບຸລິມະສິດຫຼາຍຢ່າງໃຫ້ແກ່ສິນຄ້າຜະລິດຕະພັນກະສິກໍາຂອງທັງສອງຝ່າຍ. ເຖິງຢ່າງໃດກໍຕາມ, ເພື່ອໄດ້ຊົມໃຊ້ບັນດາ ບຸລິມະສິດນັ້ນ, ຮຽກຮ້ອງໃຫ້ພວກເຮົາຕ້ອງມີຄວາມພະຍາຍາມ ແລະ ມີການຮ່ວມມືຈາກຫຼາຍຝ່າຍເຊັ່ນ: ລັດຖະບານ, ປະຊາຄົມວິສາຫະກິດ, ສະຫະສະມາຄົມ ແລະ ບັນດາຄຳປຶກສາຈາກວົງການນັກຮຽນຮູ້ ແລະ ວິທະຍາສາດ.
ຫວຽດນາມວາງເປົ້າໝາຍການເຕີບໂຕສົ່ງອອກໃນປີ 2019 ເພີ່ມຂຶ້ນແຕ່ 7 - 8% ດ້ວຍວົງເງິນສົ່ງອອກບັນລຸປະມານ 258 ຕື້ໂດລາ. ຈາກບັນດາຜົນງານຄວາມກ້າວໜ້າທີ່ບັນລຸໄດ້, ໃນສະພາບການບັນດາສັນຍາການຄ້າເສລີກຳລັງມີຜົນສັກສິດພ້ອມກັບ ບັນດາເງື່ອນໄຂສະດວກຂອງລະບົບການຄ້າຫຼາຍຝ່າຍນັ້ນ, ເຊື່ອໝັ້ນວ່າ: ຂະແໜງສົ່ງອອກສິນຄ້າຫວຽດນາມຈະບັນລຸບັນດາຄາດໝາຍທີ່ວາງໄວ້.
（ແຫຼ່ງຂໍ້ມູນ： pasaxon.org.la）
