 |
ປະເທດລຸ່ມແມ່ນໍ້າຂອງ-ແມ່ນໍ້າລ້ານຊ້າງ ແລກປ່ຽນຄວາມຮູ້ ການພັດທະນາໄອຊີທີແບບຍືນຍົງ
ໃນງານສໍາມະນາດັ່ງກ່າວ, ນັກສໍາມະນາກອນ ໄດ້ຮັບຟັງການເຜີຍແຜ່, ປະກອບຄໍາເຫັນ, ແລກ ປຽ່ນບົດຮຽນ, ປະສົບການ ທາງດ້ານເຕັກໂນໂລຊີ ແລະ ແນວທາງນະໂຍບາຍຕ່າງໆ, ນິຕິກໍາ ທີ່ຍົກໃຫ້ ເຫັນສະພາບ ການນໍາໃຊ້ ໄອຊີທີ, ທິດທາງ ແລະ ແຜນການຂອງແຕ່ລະປະເທດ ລວມເຖິງຫົວຂໍ້ຕິດພັນ ກັບການພັດທະນາແບບຍືນຍົງ, ເສດຖະກິດດິຈິຕອນ ແລະ ການຫັນເປັນທັນສະໄໝ.
ທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງ ປທສ ໄດ້ກ່າວວ່າ: ການສົນທະນາ ກ່ຽວກັບ ການພັດທະນາ ໄອຊີທີ ຂອງພາກພື້ນນີ້, ບໍ່ພຽງແຕ່ ເປັນການ ແລກປ່ຽນຄວາມຮູ້ ແລະ ປະສົບການອັນດີ ລະຫວ່າງ ກັນແລ້ວ ແຕ່ຍັງເປັນການ ສົ່ງເສີມ ສາຍພົວພັນອັນດີ ລະຫວ່າງປະເທດ ເພື່ອນບ້ານ ທີ່ຢູ່ໃນຂົງເຂດ ແມ່ນ້ຳຂອງ-ແມ່ນ້ຳລ້ານຊ້າງ. ໃນປີ 2017 ແລະ 2018 ລັດຖະບານ ສປ ຈີນ ໄດ້ໃຫ້ການ ຊ່ວຍເຫລືອ ຫລາຍກິດຈະກໍາແກ່ ສປປ ລາວ ແລະ ບັນດາປະເທດ ເຂດລຸ່ມແມ່ນໍ້າຂອງ-ແມ່ນໍ້າລ້ານຊ້າງ, ພ້ອມທັງໄດ້ ຜັນຂະຫຍາຍວິໃສທັດ ຮອດປີ 2030, ແຜນຍຸດທະສາດໄລຍະ 10 ປີ (2016-2025) ແລະ ແຜນພັດທະນາ 5 ປີ ຄັ້ງທີ II (2016-2020) ຂອງຂະແໜງ ປທສ.
ທ່ານ ທອງໃສ ຊານໄຊຍະ ກ່າວຕື່ມວ່າ: ໃນຍຸກເສດຖະກິດ ດິຈິຕອນ, ໄອຊີທີ ແລະ ເຕັກໂນໂລຊີດິຈິຕອນ ແມ່ນມີບົດບາດສໍາຄັນ ໃນການພັດທະນາ ເສດຖະກິດ-ສັງຄົມ ຂອງທຸກປະເທດ ນັບມື້ນັບຂະຫຍາຍຕົວ ແລະ ມີຄວາມເກາະກ່າຍ ຂ້າມຂະແໜງການ. ພວກເຮົາຫວັງຢ່າງຍິ່ງວ່າ ການຮ່ວມມື ພາຍໃຕ້ຂອບ ການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງນີ້ ຈະຂັບເຄື່ອນ ໃຫ້ບັນລຸເປົ້າໝາຍ ຊຶ່ງຈະເປັນການ ຊ່ວຍພັດທະນາ ຂະແໜງການໄອຊີທີ ແບບຍືນຍົງ ໃນອະນຸພາກພື້ນ ເພື່ອໃຫ້ເປັນແຮງຜັກດັນ ການສ້າງສາ ແລະ ພັດທະນາ ປະເທດຊາດໂດຍລວມ.
（ແຫຼ່ງຂໍ້ມູນ： ຂປລ）
