 |
ທ່ານນາຍົກລັດຖະມົນຕີຫວຽດນາມ ຫງວ໋ຽນຊົນຟຸ໋ກ ກ່າວຄຳເຫັນທີ່ກອງປະຊຸມສາມັນ.
ສາກົນຄາດຄະເນວ່າເສດຖະກິດຫວຽດນາມ ເຕີບໂຕ 7%-7,1%
ລະດັບເຕີບໂຕດ້ານເສດຖະກິດສະແດງໃຫ້ເຫັນໃນທັງ 3 ຂົງເຂດ: ກະສິກໍາ, ອຸດສາຫະກໍາ ແລະບໍລິການ. ພິເສດແມ່ນການຜະລິດອຸດສາຫະກໍາເພີ່ມຂຶ້ນຢ່າງແຮງເຖິງ 14,3%. ໃນນັ້ນ, ການປຸງແຕ່ງ, ປະດິດສ້າງເພີ່ມຂຶ້ນ 16,6%, ແມ່ນກໍາລັງໜູນເຕີບໂຕໃນເດືອນ ກໍລະກົດ. ການສົ່ງອອກບັນລຸເກືອບ 134 ຕື້ໂດລາສະຫະລັດ, ສົ່ງອອກເກີນດຸນ 3,1 ຕື້ໂດລາສະຫະລັດ. ແຕ່ຕົ້ນປີມາຮອດປະຈຸບັນ, ມີວິສາຫະກິດສ້າງຕັ້ງໃໝ່ຕື່ມອີກເກືອບ 80.000 ແຫ່ງ, ມີວິສາຫະກິດເຄື່ອນໄຫວຄືນໃໝ່ 18,7 ພັນແຫ່ງ. ການດຳລົງຊີວິດຂອງພໍ່ແມ່ປະຊາຊົນສືບຕໍ່ໄດ້ຮັບການປັບປຸງ, ຈໍານວນຄອບຄົວຂາດເຂີນອຶດຢາກຫຼຸດລົງເກືອບ 40%. ອັດຕາຜູ້ອອກແຮງງານຫວ່າງງານມີພຽງ 2,2%...
ດ້ວຍບັນດາສັນຍານຕັ້ງໜ້າຂອງເສດຖະກິດ-ສັງຄົມ, ມີຫຼາຍອົງການຈັດຕັ້ງສາກົນຕີລາຄາສູງ ແລະຄາດຄະເນດີກ່ຽວກັບແງ່ຫວັງເສດຖະກິດຫວຽດນາມ. ທະນາຄານພັດທະນາອາຊີ (ABD) ຄາດຄະເນວ່າການເຕີບໂຕ GDP ຂອງຫວຽດນາມເພີ່ມຂຶ້ນ 7,1%; ທະນາຄານ Standard Chartered ຄາດຄະເນວ່າຈະເພີ່ມຂຶ້ນ 7%, ເງິນເຟີ້ຢູ່ໃນລະດັບ 4%. ໝາຍຄວາມວ່າການຕີລາຄາຂອງສາກົນກ່ຽວກັບເສດຖະກິດຫວຽດນາມ ຊ້ຳບໍ່ໜຳຍັງມີຄວາມປະເອີບໃຈກວ່າເມື່ອທຽບໃສ່ເປົ້າໝາຍເຕີບໂຕເສດຖະກິດໂດຍສະພາແຫ່ງຊາດ ແລະລັດຖະບານວາງອອກ (ເຕີບໂຕ 6,5-6,7%).
ສອງສິ່ງທ້າທາຍໃຫຍ່: ໄພທໍາມະຊາດ ແລະຄວາມເຄັ່ງຕຶງດ້ານການຄ້າຢູ່ໃນໂລກ
ຕາມການໄຈ້ແຍກຂອງທ່ານ ຫງວຽນຈີ໋ຢຸງ ລັດຖະມົນຕີກະຊວງແຜນການ ແລະການລົງທຶນແລ້ວ, ສໍາລັບເສດຖະກິດພາຍໃນປະເທດ, ສະພາບການໃນຊຸມເດືອນຕົ້ນປີສະດວກໂດຍພື້ນຖານ, ເຖິງຢ່າງໃດກໍ່ຕາມ, ໃນບັນດາເດືອນທ້າຍປີ, ບັນດາປັດໄຈສະດວກ ແລະຄວາມຫຍຸ້ງຍາກສືບຕໍ່ສະຫຼັບກັນ. ໃນນັ້ນ, ຄວາມສະດວກແມ່ນຍ້ອນພື້ນຖານເສດຖະກິດພວມຢູ່ໃນລະດັບເຕີບໂຕ. ສ່ວນລັດຖະບານກໍ່ມີຄວາມຕັດສິນໃຈສູງໃນການປັບປຸງສະພາບແວດລ້ອມແຫ່ງການລົງທຶນ ແລະການດໍາເນີນທຸລະກິດ. ຄິດໄລ່ຮອດໝົດໄຕມາດ II-2018, ມີ 738 ເງື່ອນໄຂໃນການດໍາເນີນທຸລະກິດໄດ້ຮັບການຍົກເລີກ, ປັບປຸງ ຫຼືຫັນເປັນງ່າຍດາຍ. ຄ່າໃຊ້ຈ່າຍດໍາເນີນທຸລະກິດຂອງວິສາຫະກິດພວມຢູ່ໃນຂັ້ນຕອນຫຼຸດລົງ...
ເຖິງວ່າຕີລາຄາສູງບັນດາໝາກຜົນທີ່ບັນລຸໄດ້ໃນໄລຍະຜ່ານມາ, ແຕ່ທ່ານ ຫງວຽນຊວນເກື່ອງ ລັດຖະມົນຕີກະຊວງກະສິກໍາ ແລະພັດທະນາຊົນນະບົດ ກໍ່ສະແດງຄວາມວິຕົກກັງວົນກ່ຽວກັບສະພາບໄພທໍາມະຊາດ, ນໍ້າຖ້ວມ. ເປັນໜ້າເອົາໃຈໃສ່ແມ່ນປີນີ້, ນໍ້າຖ້ວມບໍ່ພຽງແຕ່ເກີດຂຶ້ນຢູ່ຫວຽດນາມເທົ່ານັ້ນ, ຫາກຍັງເກີດຂຶ້ນໃນທົ່ວອາຊີ. ເພື່ອເປັນເຈົ້າການຮັບມືກັບຝົນຕົກນໍ້າຖ້ວມ, ກະຊວງກະສິກໍາ ແລະ ພັດທະນາຊົນນະບົດໄດ້ຮຽກຮ້ອງບັນດາທ້ອງຖິ່ນເກັບກ່ຽວເຂົ້າລະດູຮ້ອນຕໍ່ລະດູໃບໄມ້ຫຼົ່ນໂດຍໄວ.
ບໍ່ປ່ຽນແປງນະໂຍບາຍເງິນຕາ
ຕີລາຄາກ່ຽວກັບສະພາບການເສດຖະກິດ-ສັງຄົມ, ທ່ານນາຍົກລັດຖະມົນຕີ ຢືນຢັນວ່າ, ເສດຖະກິດມະຫາພາກສືບຕໍ່ເປັນປົກກະຕິ. ສີ່ເປົ້າໝາຍຂອງເສດຖະກິດມະຫາພາກຍັງຮັບປະກັນ: GDP ເພີ່ມຂຶ້ນ; ລາຄາເປັນປົກກະຕິ; ວຽກເຮັດງານທໍາເພີ່ມຂຶ້ນ, ການຫວ່າງງານຫຼຸດລົງ ແລະການສົ່ງອອກສຸດທິ. ທ່ານນາຍົກລັດຖະມົນຕີ ໃຫ້ຮູ້ວ່າ, ພື້ນຖານເສດຖະກິດມີສັນຍານດີຂຶ້ນຕາມການຕີລາຄາຂອງບັນດານັກຊ່ຽວຊານພາຍໃນປະເທດ ແລະສາກົນ, ເຫດຜົນຕົ້ນຕໍແມ່ນຍ້ອນບັນດາຄວາມມານະພະຍາຍາມປະຕິຮູບລະບອບລະບຽບການ, ການຊີ້ນໍາ, ບໍລິຫານລວມຂອງລັດຖະບານ, ການເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ, ເພີ່ມສະມັດຕະພາບແຮງງານ ແລະດັດຊະນີປ່ຽນແປງໃໝ່ຢ່າງມີຫົວຄິດປະດິດສ້າງ.
ທ່ານນາຍົກລັດຖະມົນຕີ ເນັ້ນໜັກວ່າ, ຄວນສືບຕໍ່ຮັກສາກຳລັງໜູນເຕີບໂຕ, ຮັກສາທ່າເຕີບໂຕ, ບໍ່ພຽງແຕ່ໃນປີນີ້ຫາກຍັງໃຫ້ຊຸມປີຕໍ່ໄປ; ພ້ອມທັງ, ພັດທະນາເສດຖະກິດແຕ່ຕ້ອງເອົາໃຈໃສ່ເປັນພິເສດເຖິງບັນຫາສິ່ງແວດລ້ອມ, ເອົາໃຈໃສ່ເປັນພິເສດເຖິງຄວາມປອດໄພໃຫ້ປະຊາຊົນ, ນັບທັງຄວາມສະຫງົບຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມ, ຄວາມປອດໄພກ່ອນຈະເກີດນ້ຳຖ້ວມ, ພາຍຸ.
（ແຫຼ່ງຂໍ້ມູນ： vov5）
