 |
| ພາບໜ້າປົກ: ໃນການເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງຢູ່ນະຄອນຫຼວງວຽງຈັນ (ລາວ), ວັນທີ 8 ຕຸລາ 2024, ທ່ານນາຍົກລັດຖະມົນຕີຫວຽດນາມ ຟ້າມມິງຈິ໊ງ ພົບປະກັບ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ປະທານອາຊຽນ 2024. ພາບ: TTXVN |
ສາຍພົວພັນໄດ້ຮັບການປັບປຸງ ແລະພັດທະນາຢ່າງຕັ້ງໜ້າ
ຕອນເຊົ້າວັນທີ 9 ມັງກອນ, ພາຍຫຼັງມາຮອດນະຄອນຫຼວງວຽງຈັນ, ທ່ານ ຟ້າມມິງຈີ໊ງ ນາຍົກລັດຖະມົນຕີຫວຽດນາມ ໄດ້ພ້ອມກັບທ່ານ ສອນໄຊ ສີພັນດອນ ນາຍົກລັດຖະມົນຕີລາວ ເປັນປະທານຮ່ວມກອງປະຊຸມ ຄັ້ງທີ 47 ຄະນະກຳມະການຮ່ວມມືທະວີພາຄີລະຫວ່າງລັດຖະບານ ຫວຽດນາມ-ລາວ.
ທີ່ກອງປະຊຸມ, ນາຍົກລັດຖະມົນຕີສອງທ່ານ ໄດ້ສະແດງຄວາມປິຕິຊົມຊື່ນຕໍ່ໝາກຜົນການຮ່ວມມືທີ່ປະສົບຜົນສຳເລັດໃນຫຼາຍຂົງເຂດ. ປີ 2024, ການຮ່ວມມືດ້ານເສດຖະກິດການຄ້າ ແລະການລົງທຶນໄດ້ຮັບຄວາມເອົາໃຈໃສ່, ຊຸກຍູ້ ແລະໄດ້ຮັບໝາກຜົນທີ່ເປັນໜ້າຮັບຮູ້: ສະສົມຮອດປະຈຸບັນ, ວິສາຫະກິດຫວຽດນາມ ໄດ້ລົງທຶນຢູ່ລາວ ບັນລຸ 267 ໂຄງການ, ດ້ວຍຍອດຈຳນວນທຶນຈົດທະບຽນ 5,7 ຕື້ໂດລາສະຫະລັດ; ທຶນປະຕິບັດບັນລຸປະມານ 2,8 ຕື້ໂດລາສະຫະລັດ. ໃນສະພາບການເສດຖະກິດໂລກ ແລະພາກພື້ນສືບຕໍ່ປະສົບກັບຄວາມຫຍຸ້ງຍາກ, ຄວາມຕ້ອງການຂອງຜູ້ບໍລິໂພກຫຼຸດລົງ, ວົງເງິນການຄ້າສອງຝ່າຍລະຫວ່າງ ຫວຽດນາມ-ລາວ ປີ 2024 ສ້າງຂີດໝາຍເມື່ອຍອດວົງເງິນການຄ້າສອງປະເທດລື່ນກາຍລະດັບ 2,2 ຕື້ໂດລາສະຫະລັດ, ເພີ່ມຂຶ້ນ 33,9% ເມື່ອທຽບໃສ່ປີ 2023, ໃນນັ້ນເປັນໜ້າຮັບຮູ້ ແມ່ນລາວ ສົ່ງອອກເກີນດຸນໄປຍັງຫວຽດນາມ ກວ່າ 730 ລ້ານໂດລາສະຫະລັດ.
 |
| ນາຍົກລັດຖະມົນຕີຫວຽດນາມ ແລະນາຍົກລັດຖະມົນຕີລາວ ເປັນປະທານຮ່ວມກອງປະຊຸມ ຄັ້ງທີ 47 ຄະນະກຳມະການຮ່ວມມືທະວີພາຄີລະຫວ່າງລັດຖະບານ ຫວຽດນາມ-ລາວ. ພາບ: ສໍານັກຂ່າວສານຫວຽດນາມ |
ກ່ຽວກັບຈຸດສຸມການຮ່ວມມືປີ 2025, ສອງຝ່າຍເຫັນດີເປັນເອກະພາບສືບຕໍ່ນຳການພົວພັນດ້ານການເມືອງ, ການທູດລະຫວ່າງສອງປະເທດເຂົ້າສູ່ລວງເລິກ; ເພີ່ມທະວີເສົາຄໍ້າການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ, ສືບຕໍ່ໃຫ້ບຸລິມະສິດພິເສດແກ່ການຮ່ວມມືດ້ານການສຶກສາ-ບໍາລຸງສ້າງ ແລະເສດຖະກິດ. ຊຸກຍູ້ການເຕີບໂຕວົງເງິນການຄ້າຢ່າງແຂງແຮງ, ສູ້ຊົນສືບຕໍ່ຊຸກຍູ້ເພີ່ມວົງເງິນການຄ້າລະຫວ່າງສອງປະເທດໃຫ້ໄດ້ 10-15% ໃນປີ 2025 ເມື່ອທຽບໃສ່ປີ 2024, ມຸ່ງໄປເຖິງບັນລຸວົງເງິນການຄ້າ 5 ຕື້ໂດລາສະຫະລັດ ໂດຍໄວ; ສຸມໃສ່ແກ້ໄຂຄວາມຫຍຸ້ງຍາກ, ຊຸກຍູ້ຜັນຂະຫຍາຍການເຊື່ອມຕໍ່ໂຄງລ່າງຄົມມະນາຄົມ. ຖືກະສິກໍາ ແລະການພັດທະນາຊົນນະບົດແມ່ນໜຶ່ງໃນບັນດາເສົາຄໍ້າຂອງການຮ່ວມມືດ້ານເສດຖະກິດລະຫວ່າງສອງປະເທດ.
ສະຫຼຸບທີ່ກອງປະຊຸມ, ນາຍົກລັດຖະມົນຕີສອງທ່ານ ໄດ້ເນັ້ນໜັກຈະສຸມໃສ່ຊີ້ນຳຢ່າງຂ້ຽວຂາດບັນດາກະຊວງ, ຂະແໜງການ, ທ້ອງຖິ່ນ, ວິສາຫະກິດ, ຫົວໜ່ວຍທີ່ກ່ຽວຂ້ອງສົມທົບກັນຢ່າງແໜ້ນແຟ້ນ ເພື່ອຜັນຂະຫຍາຍບັນດາຂໍ້ຕົກລົງຄຳໝັ້ນສັນຍາຢ່າງມີປະສິດທິຜົນ, ໃນນັ້ນຈະສືບຕໍ່ສ້າງຄວາມສະດວກຢ່າງສຸດຂີດໃຫ້ວິສາຫະກິດສອງປະເທດໃນການຮ່ວມມືລົງທຶນ, ຜະລິດດຳເນີນທຸລະກິດ. ສອງຝ່າຍເຊື່ອໝັ້ນວ່າ, ສຳເລັດຜົນຂອງກອງປະຊຸມຈະສ້າງກຳລັງໜູນໃໝ່ຊ່ວຍການພົວພັນຮ່ວມມືລະຫວ່າງສອງປະເທດ ນັບມື້ນັບພັດທະນາ, ເຂົ້າສູ່ລວງເລິກ, ແທດຈິງ, ໄວ້ເນື້ອເຊື່ອໃຈ ແລະມີປະສິດທິຜົນ, ປະກອບສ່ວນປັບປຸງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ-ລາວ ໃນໄລຍະຈະມາເຖິງ.
