ເພີ່ມທະວີການຄ້າລະຫວ່າງແຂວງ ເຊີນລາ ແລະ ບັນດາແຂວງພາກເໜືອຂອງ ລາວ

ຍສໝ - ດ້ວຍເສັ້ນຊາຍແດນ 250 ກິໂລແມັດ, ມີຊາຍແດນຕິດກັບແຂວງ ຫົວພັນ ແລະ ແຂວງ ຫຼວງພະບາງ (ລາວ), ການຊຸກຍູ້ໂຄງລ່າງການຄ້າຊາຍແດນລະຫວ່າງແຂວງ ເຊີນລາ ແລະ ບັນດາແຂວງພາກເໜືອຂອງ ລາວ ຈະມີການປະກອບສ່ວນສຳຄັນເຂົ້າໃນການພັດທະນາເສດຖະກິດ - ສັງຄົມຂອງສອງປະເທດ.

	ເຊີນລາ ໜູນຊ່ວຍແຂວງ ຫົວພັນ ແກ້ໄຂຜົນຮ້າຍຢ້ອນຫຼັງຈາກໄພທຳມະຊາດ
	ຮ່າຕິ້ງ ແລະ ເຊີນລາ ຝຶກອົບຮົມວຽກງານການຕ່າງປະເທດໃຫ້ແກ່ພະນັກງານທ້ອງຖິ່ນ

ເຊີນລາ ແມ່ນແຂວງພູດອຍທາງທິດຕາເວັນຕົກສ່ຽງເໜືອຂອງ ຫວຽດນາມ, ຫ່າງຈາກນະຄອນຫຼວງ ຮ່າໂນ້ຍ 320 ກິໂລແມັດ (ກມ) ຕາມເສັ້ນທາງຫຼວງແຫ່ງຊາດ ເລກທີ 6. ແຂວງມີເນື້ອທີ່ 14.109,83 ກິໂລຕາແມັດ, ຈັດຢູ່ອັນດັບທີ 3 ຂອງປະເທດ. ທິດໃຕ້ຕິດກັບແຂວງ ແທງຮວ໋າ ແລະ ແຂວງ ຫົວພັນ - ລາວ, ທິດຕາເວັນຕົກສ່ຽງໃຕ້ ຕິດກັບແຂວງ ຫຼວງພະບາງ - ລາວ. ເຊີນລາ ມີເສັ້ນຊາຍແດນແຫ່ງຊາດ ຫວຽດນາມ - ລາວ ຍາວປະມານ 274,065 ກມ, ດ້ວຍ 06 ເມືອງຊາຍແດນຄື: ມົກເຈົາ, ເວີນໂຮ່, ອຽນເຈົາ, ມາຍເຊີນ, ຊົງມ໊າ ແລະ ສົບກົບ ດ້ວຍ 17 ຕາແສງຊາຍແດນ ແລະ ມີພົນລະເມືອງກວ່າ 90.000 ຄົນຢູ່ບັນດາຕາແສງຊາຍແດນ. ແຂວງ ເຊີນລາ ມີ 1 ດ່ານຊາຍແດນສາກົນແມ່ນດ່ານຊາຍແດນ ລ໋ອງເຊິບ (ເມືອງ ມົກເຈົາ), 1 ດ່ານຊາຍແດນແຫ່ງຊາດແມ່ນດ່ານຊາຍແດນ ຈຽງເຄືອງ (ເມືອງ ຊົງມ໊າ), 2 ດ່ານຊາຍແດນສຳຮອງ (ດ່ານປະເພນີ) ແມ່ນດ່ານຊາຍແດນ ນາກາຍ (ເມືອງ ອຽນເຈົາ) ແລະ ດ່ານຊາຍແດນ ນ້ຳແລ້ງ (ເມືອງ ສົບກົບ) ແລະ 07 ເສັ້ນທາງນ້ອຍ, ເສັ້ນທາງເປີດ.

ດ້ວຍລັກສະນະພິເສດເປັນແຂວງທີ່ມີເສັ້ນຊາຍແດນຕິດກັບ ສປປ ລາວ ເປັນໄລຍະທາງຍາວ, ມາຮອດປະຈຸບັນ ເຊີນລາ ມີການພົວພັນຮ່ວມມືຮອບດ້ານກັບ 09/18 ແຂວງຂອງ ສປປ ລາວ ໃນນັ້ນມີ: ຫົວພັນ, ຫຼວງພະບາງ, ບໍ່ແກ້ວ, ອຸດົມໄຊ, ຜົ້ງສາລີ, ຫຼວງນ້ຳທາ, ໄຊຍະບູລີ, ຊຽງຂວາງ, ໄຊສົມບູນ. ແຂວງ ເຊີນລາ ພວມຮັກສາສາຍພົວພັນມິດຕະພາບອັນດີງາມລະຫວ່າງແຂວງ ເຊີນລາ ແລະ ບັນດາແຂວງພາກເໜືອຂອງ ລາວ ແລະ ໄດ້ມີບັນດາການເຄື່ອນໄຫວທາງການທູດ, ແລກປ່ຽນໃນບັນດາຂົງເຂດວັດທະນະທຳ, ເສດຖະກິດ, ການຄ້າ, ການບໍລິການ, ການສຶກສາ… ການເຄື່ອນໄຫວໜູນຊ່ວຍການລົງທຶນ ແລະ ຮ່ວມມືໃນການພັດທະນາການຄ້າຈຳນວນໜຶ່ງ ເຊິ່ງພວມໄດ້ຮັບການຜັນຂະຫຍາຍເທື່ອລະກ້າວ ແລະ ໃນເບື້ອງຕົ້ນໄດ້ຮັບຜົນດີຫຼາຍຢ່າງ. ເຖິງວ່າການເຄື່ອນໄຫວທາງການຄ້າຊາຍແດນລະຫວ່າງແຂວງ ເຊີນລາ ແລະ ບັນດາແຂວງຂອງ ສປປ ລາວ ຍັງປະສົບກັບຂໍ້ຈຳກັດຫຼາຍຢ່າງກໍ່ຕາມ, ແຕ່ກໍ່ໄດ້ປະກອບສ່ວນສຳຄັນເຂົ້າໃນການຊຸກຍູ້ການຜະລິດ ແລະ ການຈໍລະຈອນສິນຄ້າເພື່ອຕອບສະໜອງຄວາມຕ້ອງການໃຫ້ແກ່ການຜະລິດ ແລະ ຊີວິດການເປັນຢູ່ຂອງປະຊາຊົນເຂດຊາຍແດນ.

ເພີ່ມທະວີການຄ້າລະຫວ່າງແຂວງ ເຊີນລາ ແລະ ບັນດາແຂວງພາກເໜືອຂອງ ລາວ

ຕະຫຼາດຊາຍແດນ ຈຽງເຄືອງ.

ໂດຍຮັບຮູ້ວ່າການຊຸກຍູ້ພື້ນຖານໂຄງລ່າງການຄ້າຊາຍແດນລະຫວ່າງແຂວງ ເຊີນລາ ແລະ ບັນດາແຂວງພາກເໜືອຂອງ ລາວ ຈະປະກອບສ່ວນຢ່າງສຳຄັນເຂົ້າໃນການພັດທະນາເສດຖະກິດ - ສັງຄົມຂອງທ້ອງຖິ່ນ, ແຂວງ ເຊີນລາ ໄດ້ເອົາໃຈໃສ່ ແລະ ມີຫຼາຍການເຄື່ອນໄຫວເພື່ອແນໃສ່ຊຸກຍູ້ການແລກປ່ຽນ, ການຊື້-ຂາຍສິນຄ້າຂອງປະຊາຊົນຢູ່ເຂດຊາຍແດນ.

ຕາມແຜນການປະຕິບັດໂຄງການພັດທະນາພື້ນຖານໂຄງລ່າງການຄ້າຊາຍແດນຮອດປີ 2025, ດ້ວຍວິໄສທັດຮອດປີ 2030 ໂດຍຄະນະກຳມະການປະຊາຊົນແຂວງ ເຊີນລາ ປະກາດໃຊ້, ເປົ້າໝາຍທີ່ໄດ້ວາງອອກແມ່ນຊຸກຍູ້ການຮ່ວມມື, ພັດທະນາ ແລະ ການເຊື່ອມຕໍ່ພື້ນຖານໂຄງລ່າງການຄ້າຊາຍແດນລະຫວ່າງແຂວງ ເຊີນລາ ແລະ ບັນດາແຂວງຊາຍແດນຂອງ ລາວ; ດຶງດູດ ແລະ ຫັນເປັນສັງຄົມການລົງທຶນກໍ່ສ້າງ ແລະ ພັດທະນາພື້ນຖານໂຄງລ່າງການຄ້າຊາຍແດນ.

ໃນນັ້ນ ສຸມໃສ່ດຶງດູດການລົງທຶນຈາກບັນດາສູນ, ບໍລິເວນກຸ່ມບໍລິການຂົນສົ່ງຢູ່ເຂດດ່ານຊາຍແດນລ໋ອງເຊິບ ແລະ ຈຽງເຄືອງ ເພື່ອແນໃສ່ເຮັດໃຫ້ພື້ນຖານໂຄງລ່າງຢູ່ບັນດາເຂດດ່ານຊາຍແດນສົມບູນແບບ; ສົ່ງເສີມການພັດທະນາຖັນແຖວນັກທຸລະກິດທີ່ເຂົ້າຮ່ວມການເຄື່ອນໄຫວທຸລະກິດ; ຍົກສູງຄຸນນະພາບຂອງຊັບພະຍາກອນມະນຸດເພື່ອປະຕິບັດວຽກງານພັດທະນາການຄ້າຊາຍແດນ; ສ້າງຮາກຖານຂໍ້ມູນກ່ຽວກັບການພັດທະນາການຄ້າຊາຍແດນ.

ການພັດທະນາພື້ນຖານໂຄງລ່າງ ແລະ ການຄ້າຊາຍແດນໃນຊຸມປີທີ່ຜ່ານມາກໍ່ໄດ້ປະກອບສ່ວນຢ່າງໃຫຍ່ຫຼວງເຂົ້າໃນການຮັກສາຄວາມສະຫງົບດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມ ຢູ່ເຂດຊາຍແດນ ຫວຽດນາມ - ລາວ. ໃນນັ້ນ, ວຽກງານຄຸ້ມຄອງ ແລະ ຕິດຕາມກວດກາການເຂົ້າ-ອອກເມືອງຂອງປະຊາຊົນ ແລະ ພາຫະນະຂອງກຳລັງທະຫານປ້ອງກັນຊາຍແດນຢູ່ບັນດາຕະຫຼາດຊາຍແດນກໍ່ໄດ້ຮັກສາຢ່າງໝັ້ນຄົງ ແລະ ມີປະສິດທິຜົນ.

ສະເລ່ຍຈຳນວນພໍ່ຄ້າ-ແມ່ຄ້າທີ່ເຮັດທຸລະກິດ, ຄ້າ-ຂາຍຢູ່ຕະຫຼາດຊາຍແດນເປັນປະຈຳແມ່ນແຕ່ 30 ຫາ 50 ຄົວເຮືອນ. ພະນັກງານ-ລັດຖະກອນດ່ານຊາຍແດນ ຍາມໃດກໍ່ປະຕິບັດລະບຽບການ, ກວດກາ, ຄວບຄຸມການເຂົ້າ-ອອກເມືອງເປັນຢ່າງດີ, ສ້າງເງື່ອນໄຂສະດວກໃຫ້ແກ່ການຈໍລະຈອນທາງຊາຍແດນຕາມຂໍ້ກໍານົດຂອງກົດໝາຍແຕ່ລະປະເທດ, ໂດຍຜ່ານນັ້ນ ກໍ່ສົມທົບກັນກວດກາ, ຄວບຄຸມການສົ່ງອອກ ແລະ ນໍາເຂົ້າສິນຄ້າໃຫ້ຖືກຕ້ອງຕາມລະບຽບກົດໝາຍ, ຫຼັກການ ແລະ ຂັ້ນຕອນ.

ໃນໄລຍະຈະມາເຖິງ, ແຂວງ ເຊີນລາ ຈະສືບຕໍ່ເພີ່ມທະວີການຮ່ວມມືໃນທຸກຂົງເຂດ, ສືບຕໍ່ຮັກສາການໄປມາຫາສູ່ກັນ, ພົວພັນ ແລະ ເຮັດວຽກເປັນປະຈຳ; ເພີ່ມທະວີ ແລະ ຍົກສູງປະສິດທິຜົນການຮ່ວມມືດ້ານປ້ອງກັນປະເທດ, ປ້ອງກັນຄວາມສະຫງົບ, ການຮ່ວມມືລະຫວ່າງບັນດາທ້ອງຖິ່ນຂອງສອງປະເທດ...; ຢືນຢັນຄວາມຕັດສິນໃຈຈະຍົກສູງລະດັບການຮ່ວມມືດ້ານເສດຖະກິດໃຫ້ເໝາະສົມກັບການພົວພັນແບບພິເສດລວມລະຫວ່າງສອງປະເທດ, ພິເສດແມ່ນການຊຸກຍູ້ການຄ້າຊາຍແດນ. ສືບຕໍ່ເອົາໃຈໃສ່ເຖິງການວາງແຜນ ແລະ ການລົງທຶນພື້ນຖານໂຄງລ່າງລະຫວ່າງ ເຊີນລາ ແລະ ບັນດາແຂວງຂອງປະເທດເພື່ອນ ລາວ, ພິເສດແມ່ນລະບົບພື້ນຖານໂຄງລ່າງຄົມມະນາຄົມຂົນສົ່ງການຄ້າຢູ່ເຂດດ່ານຊາຍແດນ, ສົມທົບລະຫວ່າງການລົງທຶນພື້ນຖານໂຄງລ່າງທີ່ຈຳເປັນກັບການສ້າງຊີວິດການເປັນຢູ່ຂອງປະຊາຊົນຢູ່ເຂດຊາຍແດນໃຫ້ເປັນປົກກະຕິ./.

ເຊີນລາ ເພີ່ມທະວີການຮ່ວມມືໃນຂົງເຂດດ້ານການສຶກສາ ແລະບຳລຸງສ້າງກັບບັນດາແຂວງພາກເໜືອຂອງລາວ

ຍສໝ - ໂດຍປະຕິບັດຕາມບົດບັນທຶກຊ່ວຍຈໍາລະຫວ່າງແຂວງເຊີນລາ ແລະບັນດາແຂວງພາກເໜືອຂອງລາວ, ແຕ່ປີ 2001 ມາຮອດປະຈຸບັນ, ແຂວງເຊີນລາ ໄດ້ກໍ່ສ້າງນັກສຶກສາລາວ ເກືອບ 2.300 ຄົນ ຈົບຊັ້ນກາງ, ວິທະຍາໄລ, ມະຫາວິທະຍາໄລ; ນັກສຶກສາລາວເກືອບ 4.000 ຄົນໄດ້ຮັບການບໍາລຸງພາສາຫວຽດ.