ວັນທີ 22 ມີນາ, ຢູ່ນະຄອນ Higashi Osaka ໄດ້ດຳເນີນລາຍການດົນຕີບ້ານເກີດເມືອງນອນ 2024 ຂອງປະຊາຄົມຊາວ ຫວຽດນາມ ໂດຍໄດ້ຮັບການອຸປະຖຳຈາກສະມາຄົມໜູນຊ່ວຍ ຍີ່ປຸ່ນ - ຫວຽດນາມ ແລະ ກົງສຸນໃຫຍ່ ຫວຽດນາມ ປະຈຳ Osaka.
ເຂົ້າຮ່ວມລາຍການ ມີທ່ານເຈົ້າຄອງນະຄອນ Higashi Osaka, ທ່ານຜູ້ຕາງໜ້າກົງສຸນໃຫຍ່ຫວຽດນາມ ປະຈຳ Osaka ພ້ອມກັບຜູ້ຊົມ ຫວຽດນາມ ແລະ ຍີ່ປຸ່ນ ປະມານ 1.000 ຄົນຢູ່ເຂດ Kansai. ນີ້ແມ່ນລາຍການເຂົ້າຊົມໂດຍບໍ່ເສຍຄ່າສຳລັບຊາວ ຫວຽດນາມ ອາໄສຢູ່ ຍີ່ປຸ່ນ, ກໍ່ຄືຊາວ ຍີ່ປຸ່ນ ທີ່ຮັກວັດທະນະທຳ ແລະ ຊາວ ຫວຽດນາມ.
ກ່າວຄຳປາໄສທີ່ລາຍການ, ເຈົ້າຄອງນະຄອນ Higashi Osaka - ທ່ານ Noda Yoshikazu ສະແດງຄວາມປິຕິຊົມຊື່ນເມື່ອປະຊາຄົມຊາວ ຫວຽດນາມ ໄດ້ຈັດຕັ້ງລາຍການພົບປະແລກປ່ຽນດົນຕີທີ່ມີຄວາມໝາຍນີ້.
ທ່ານເຊື່ອໝັ້ນວ່າ ບັນດາການເຄື່ອນໄຫວພົບພະແລກປ່ຽນວັດທະນະທຳ ຫວຽດນາມ - ຍີ່ປຸ່ນ ຈະແມ່ນເຊືອກມັດເພື່ອສະໜິດຕິດພັນສາຍພົວພັນມິດຕະພາບສອງຝ່າຍກ່ວາອີກ. ທ່ານປາຖະໜາວ່າ ຢາກໃຫ້ຊາວ ຫວຽດນາມ ໄປດຳລົງຊີວິດ ແລະ ເຮັດວຽກຢູ່ນະຄອນ Higashi Osaka ຫຼາຍກວ່າອີກ.
 |
ການພົບປະແລກປ່ຽນວັດທະນະທຳຕິດພັນປະຊາຄົມ ແລະ ປັບປຸງການພົວພັນມິດຕະພາບ ຫວຽດນາມ - ຍີ່ປຸ່ນ |
ຜູ້ຕາງໜ້າກົງສຸນໃຫຍ່ ຫວຽດນາມ ປະຈໍາ Osaka, ທ່ານກົງສຸນ ຫງວຽນມິງເຊີນ ໄດ້ຕີລາຄາວ່າ ລາຍການດົນຕີບ້ານເກີດເມືອງນອນ 2024 ແມ່ນເຫດການທີ່ມີຄວາມໝາຍອັນໃຫຍ່ຫຼວງຕໍ່ປະຊາຄົມຊາວ ຫວຽດນາມ ຢູ່ເຂດ Kansai ເພາະວ່າສະຖານທີ່ແຫ່ງນີ້ ບໍ່ຄ່ອຍໄດ້ດຳເນີນບັນດາເຫດການວັດທະນະທຳໃຫຍ່ສຳລັບປະຊາຄົມຊາວ ຫວຽດນາມ ຫຼາຍປານໃດ.
ທ່ານ ຫງວຽນມິງເຊີນ ໄດ້ສະແດງຄວາມຂອບອົກຂອບໃຈຕໍ່ບັນດາຜູ້ຈັດຕັ້ງ, ຜູ້ອຸປະຖຳທີ່ມານະພະຍາຍາມນຳ “ອາຫານທາງຈິດໃຈ” ມາໃຫ້ຊາວ ຫວຽດນາມ ອາໄສຢູ່ຫ່າງໄກຈາກບ້ານເກີດ ແລະ ສ້າງໂອກາດເພື່ອສະໜິດຕິດພັນຊຸມຊົມ.
ໂດຍເຫັນດີເປັນເອກະພາບກັບທັດສະນະດັ່ງກ່າວ, ຜູ້ຕາງໜ້າຜູ້ອຸປະຖຳຫຼັກຂອງລາຍການ, ທ່ານນາງ Mori Mioka - ຜູ້ອຳນວຍການບໍລິສັດ Mori Pharmacy ແລະ Mori Healthcare ຢູ່ ຍີ່ປຸ່ນ ໃຫ້ຮູ້ວ່າ ລາຍການໄດ້ເພີ່ມທະວີຄວາມສະໜິດຕິດພັນປະຊາຄົມຊາວ ຫວຽດນາມ ຢູ່ເຂດ Kansai, ໃຫ້ທຸກຄົນໄດ້ມີໂອກາດເບິ່ງລາຍການສິລະປະທີ່ເຂັ້ມຂຸ້ນໄປດ້ວຍສີສັນຊາດ ກັບບັນດາທຳນອງ, ເນື້ອຮ້ອງ ແລະ ພາບທີ່ລື້ງເຄີຍກ່ຽວກັບບ້ານເກີດເມືອງນອນ, ປະເທດຊາດ.
ທ່ານນາງ Mori ໄດ້ສະແດງຄວາມປາດຖະໜາວ່າ ຈະມີບັນດາລາຍການສະແດງດົນຕີຫຼາຍກ່ວາອີກ ເພື່ອໃຫ້ຊາວ ຫວຽດນາມ ຢູ່ເຂດ Kansai ມີກາລະໂອກາດແລກປ່ຽນ, ເພີ່ມທະວີຄວາມສາມັກຄີ ເພື່ອພັດທະນາກາຍເປັນປະຊາຄົມທີ່ເຂັ້ມແຂງ, ມຸ່ງໄປເຖິງປະເທດຊາດ, ປະກອບສ່ວນໃຫ້ແກ່ບ້ານເກີດເມືອງນອນຫຼາຍກວ່າອີກ.
ພິເສດ, ລາຍການ ຍັງໄດ້ຮັບການຊື່ນຊົມຢ່າງສຸດໃຈຈາກຜູ້ຊົມຊາວ ຍີ່ປຸ່ນ ເມື່ອບັນດານັກສະແດງຮ້ອງເພງ “ຢຽມ ເຊືອ” ດ້ວຍພາສາຍີ່ປຸ່ນ ແລະ ເພງ “Sukiyaki" ທີ່ມີຊື່ສຽງຂອງ ຍີ່ປຸ່ນ. ຜູ້ຊົມຊາວ ຍີ່ປຸ່ນ ຫຼາຍຄົນ ໄດ້ຮ້ອງເພງຮ່ວມພ້ອມກັບນັກຮ້ອງເມື່ອໄດ້ຟັງເພງທີ່ຄຸ້ນເຄີຍຈາກປະເທດຂອງຕົນ.
ທ່ານ Funaoka Toshikazu - ຜູ້ຊົມຊາວ ຍີ່ປຸ່ນ, ພາຍຫຼັງເບິ່ງລາຍການດົນຕີ ໄດ້ສະແດງຄວາມເປັນກຽດ ເມື່ອໄດ້ເບິ່ງລາຍການສິລະປະທີ່ມີຄວາມໝາຍ ດ້ວຍບັນດາລາຍການສະແດງທີ່ເຕັມໄປດ້ວຍຄວາມຕື້ນຕັນໃຈຂອງບັນດານັກຮ້ອງ ຫວຽດນາມ, ກໍ່ຄືບັນດານັກຮ້ອງຢູ່ ຍີ່ປຸ່ນ.
ທ່ານຮູ້ສຶກຕື້ນຕັນໃຈເມື່ອໄດ້ຍິນເພງ ຍີ່ປຸ່ນ ໃນງານວາງສະແດງດົນຕີ ຫວຽດນາມ. ທ່ານໃຫ້ຄຳເຫັນວ່າ ເມື່ອໄດ້ຮັບຟັງເພງ “ຢຽມ ເຊືອ” ແລະ ເພງ "Sukiyaki", ເນື້ອເພງທີ່ອ່ອນໂຍນຂອງສອງເພງໄດ້ເຮັດໃຫ້ທ່ານຮູ້ສຶກເຖິງຄວາມຄ້າຍຄືກັນດ້ານວັດທະນະທຳລະຫວ່າງສອງຊາດຢ່າງຈະແຈ້ງ.
ທ່ານກໍໄດ້ສະແດງຄວາມເຊື່ອໝັ້ນວ່າ ນີ້ແມ່ນລາຍການທີ່ມີຄວາມໝາຍທີ່ສຸດ, ເຮັດໃຫ້ຊີວິດດ້ານວັດທະນະທຳຈິດໃຈຂອງຊາວ ຫວຽດນາມ ຢູ່ ຍີ່ປຸ່ນ ເວົ້າລວມ ແລະ ຢູ່ເຂດ Kansai ເວົ້າສະເພາະ ອຸດົມສົມບູນຂຶ້ນຕືື່ມ, ພ້ອມກັນນັ້ນ ກໍ່ແມ່ນຂົວຕໍ່ເພີ່ມທະວີການພົວພັນມິດຕະພາບ ຫວຽດນາມ - ຍີ່ປຸ່ນ ຢ່າງໝັ້ນແກ່ນ.
ຜູ້ຕາງໜ້າຄະນະຈັດຕັ້ງໃຫ້ຮູ້ວ່າ ດ້ວຍເປົ້າໝາຍນຳມາເຊິ່ງບັນຍາກາດບ້ານເກີດເມືອງນອນ, ອົບອຸ່ນ, ແລະ ຄວາມສາມັກຄີ, ພ້ອມກັບບັນດານັກສິລະປິນຂອງ ຫວຽດນາມ ເຊັ່ນ ພິທີກອນ ດ້າຍເຫງິຍ, ນັກຮ້ອງ ແຮ້ງຫງວຽນ, ນັກຮ້ອງ ແອງຫງອກ, ນັກຮ້ອງ ເຈື່ອງເຖວິງ ແລ້ວ, ໃນລາຍການຍັງມີການເຂົ້າຮ່ວມຂອງບັນດາຊາວ ຫວຽດນາມ ຢູ່ Kansai ໃນການສະແດງຟ້ອນຕື່ມອີກຄື ຟ້ອນຊຸດເສື້ອຍາວ, ຟ້ອນກຸບ, ໃນນັ້ນ ພິເສດທີ່ສຸດແມ່ນເພງ “ພາສາຫວຽດທີ່ຮັກແພງ” ໂດຍນັກຮ້ອງ ແອງຫງອກ ສະແດງກັບກຸ່ມຟ້ອມ ເຊິ່ງແມ່ນບັນດາເດັກນ້ອຍ ຫວຽດນາມ ທີ່ຮຽນຢູ່ຊຸດຮຽນພາສາ ຫວຽດນາມ ໃນເຂດ Kansai.
ນີ້ແມ່ນຄວາມພະຍາຍາມອັນໃຫຍ່ຫຼວງຂອງຄະນະຈັດຕັ້ງ ກໍຄືຜູ້ເຂົ້າຮ່ວມລາຍການຍ້ອນໄດ້ໃຊ້ເວລາວ່າງບໍ່ເທົ່າໃດມື້ໃນການຝຶກຊ້ອມ.
ດົນຕີ, ງານບຸນທີ່ມີບົດບາດອັນໃຫຍ່ຫຼວງໃນການເຊື່ອມຕໍ່ປະຊາຊົນ, ປະເທດຊາດ. ຄະນະຈັດຕັ້ງໃຫ້ຮູ້ວ່າ ລາຍການບ້ານເກີດເມືອງນອນຄັ້ງທີ 2 ຄາດວ່າຈະຈັດຂຶ້ນໃນວັນທີ 4 ມັງກອນ 2025, ແຈກປີ້ເຂົ້າຊົມໂດຍບໍ່ເສຍຄ່າ, ດ້ວຍຄວາມຫວັງວ່າ ຈະສ້າງສະຖານທີ່ແລກປ່ຽນ, ເຊື່ອມຕໍ່ປະຈຳປີໃຫ້ປະຊາຄົມຊາວ ຫວຽດນາມ ແລະ ຍີ່ປຸ່ນ ໃນເຂດ Kansai.
ມິງດຶກ
