ແຂວງ Luxor ຂອງ ອີຢິບ ປາດຖະໜາຢາກເພີ່ມທະວີການຮ່ວມມືກັບ ຫວຽດນາມ

16:59 | 29/02/2024

ຍສໝ - ວັນທີ 25 ກຸມພານີ້, ຄະນະປະຕິບັດງານສະຖານທູດ ຫວຽດນາມ ປະຈຳ ອີຢິບ ໂດຍທ່ານເອກອັກຄະລັດຖະທູດ ຫງວຽນຮຸຍຢຸງ ນຳໜ້າ ໄດ້ມີການພົບປະເຮັດວຽກກັບການນຳແຂວງ Luxor ປະເທດ ອີຢິບ ແລະ ສົມທົບກັບຫ້ອງການການຄ້າແຂວງ Luxor ຈັດຕັ້ງການສຳມະນາການຄ້າ ດ້ວຍຫົວຂໍ້ “ກາລະໂອກາດດຳເນີນທຸລະກິດຂອງ ຫວຽດນາມ - ອີຢິບ” ເພື່ອຊຸກຍູ້ການຮ່ວມມືໃນຂົງເຂດເສດຖະກິດ, ການຄ້າ, ການລົງທຶນ, ການທ່ອງທ່ຽວ,ວັດທະນະທຳ, ກະສິກຳ ແລະ ການສຶກສາ ລະຫວ່າງ ຫວຽດນາມ ແລະ ອີຢິບ ກໍ່ຄືລະຫວ່າງທ້ອງຖິ່ນຂອງ 2 ປະເທດ ໃຫ້ຫຼາຍກ່ວາອີກ.

	ເວທີປາໄສການຮ່ວມມືວິສາຫະກິດຫວຽດນາມ - ອີຢິບ
	ເພີ່ມທະວີການຮັບປະກັນຄວາມປອດໄພຄວາມເປັນລະບຽບຮຽບຮ້ອຍລະຫວ່າງຕຳຫຼວດແຂວງ ເຊີນລາ ແລະ ຕຳຫຼວດ 3 ແຂວງໃກ້ຄຽງຂອງລາວ

ຕາມນັກຂ່າວສຳນັກຂ່າວສານ ຫວຽດນາມ ປະຈຳ ອີຢິບ ແລ້ວ, ທີ່ການພົບປະເຮັດວຽກກັບຜູ້ວ່າການແຂວງ Luxor, ທ່ານ Mustafa Mohamed Alham Khaled, ທ່ານເອກອັກຄະລັດຖະທູດ ຫວຽດນາມ ຫງວຽນຮຸຍຢຸງ ເນັ້ນໜັກວ່າ ຫວຽດນາມ ແລະ ອີຢິບ ມີການພົວພັນທີ່ເປັນມູນເຊື້ອ ແລະ ມິດຕະພາບ, ຢືນຢັນການພົວພັນຮ່ວມມືລະຫວ່າງສອງປະເທດ ໄດ້ເຫັນການພັດທະນາທີ່ດີຫຼາຍໃນຊຸມປີທີ່ຜ່ານມາ. ພິເສດ, 2 ປະເທດ ໄດ້ເຊັນຂໍ້ຕົກລົງການຮ່ວມມືໃນຫຼາຍຂົງເຂດໃນຂອບເຂດບັນດາການຢ້ຽມຢາມຂັ້ນສູງຂອງການນຳ 2 ປະເທດໃນປີ 2017 – 2018, ໃນນັ້ນ ມີຂໍ້ຕົກລົງຮ່ວມມື ແລະ ມິດຕະພາບລະຫວ່າງແຂວງ Luxor ຂອງ ອີຢິບ ແລະ ແຂວງ ນິງບີງ ຂອງ ຫວຽດນາມ. ຕາມທ່ານເອກອັກຄະລັດຖະທູດແລ້ວ, ຫວຽດນາມ ແລະ ອີຢິບ ມີຄວາມສາມາດບົ່ມຊ້ອນຫຼາຍດ້ານໃນການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງຄື ກະສິກຳ, ອຸດສາຫະກຳ, ຕ່ຳແຜ່ນຕັດຫຍິບ, ການຂົນສົ່ງ, ອາຫານທະເລ, ການທ່ອງທ່ຽວ, ເສດຖະກິດທາງທະເລ... ສອງປະເທດພວມມຸງໄປເຖິງເປົ້າໝາຍນຳວົງເງິນການຄ້າສອງສົ້ນຂຶ້ນເປັນ 1 ຕື້ USD ໃນໄລຍະຈະມາເຖິງ.

ແຂວງ Luxor ຂອງ ອີຢິບ ປາດຖະໜາຢາກເພີ່ມທະວີການຮ່ວມມືກັບ ຫວຽດນາມ

ທ່ານເອກອັກຄະລັດຖະທູດ ຫງວຽນຮຸຍຢຸງ ກ່າວຄຳປາໄສທີ່ການສຳມະນາ

ທ່ານເອກອັກຄະລັດຖະທູດ ຫງວຽນຮຸຍຢຸງ ແລະ ທ່ານຜູ້ວ່າການແຂວງ Luxor Alham Khaled ໄດ້ເຫັນດີເປັນເອກະພາບໃຫ້ເຫັນວ່າ ແຂວງ Luxor ແລະ ນິງບີງ ຄວນກວດກາຄືນ ແລະ ເພີ່ມເຕີມເນື້ອໃນການຮ່ວມມືໃນສັນຍາມິດຕະພາບ ແລະ ການຮ່ວມມືລະຫວ່າງ 2 ທ້ອງຖິ່ນ ເພື່ອຈະລົງນາມໃນເອກະສານສະບັບນີ້ໂດຍໄວ. ທ່ານເອກອັກຄະລັດຖະທູດ ຫວຽດນາມ ກໍໄດ້ສະເໜີໃຫ້ແຂວງ Luxor ເພີ່ມທະວີການຮ່ວມມືບໍ່ພຽງແຕ່ກັບແຂວງ ນິງບີງ ເທົ່ານັ້ນ ຫາກຍັງກັບບັນດາທ້ອງຖິ່ນຂອງ ຫວຽດນາມ ອີກດ້ວຍ.

ທ່ານ Alham Khaled ໄດ້ສະແດງຄວາມປາດຖະໜາວ່າ Luxor ແລະ ນິງບີງ ຈະເພີ່ມເຕີມເນີ້ອໃນຮ່ວມມືໃນຂົງເຂດກະສິກຳ, ການສຶກສາ ແລະ ການທ່ອງທ່ຽວ, ພ້ອມກັນນັ້ນ ກໍ່ຮຽກຮ້ອງບັນດາວິສາຫະກິດ ຫວຽດນາມ ເພີ່ມທະວີການລົງທຶນເຂົ້າບັນດາເຂດອຸດສາຫະກຳຢູ່ແຂວງ Luxor. ທ່ານເອກອັກຄະລັດຖະທູດ ຫງວຽນຮຸຍຢຸງ ແລະ ການນຳແຂວງ Luxor ກໍ່ສະເໜີໃຫ້ 2 ປະເທດສ້າງເງື່ອນໄຂໃຫ້ບັນດາວິສາຫະກິດທ່ອງທ່ຽວຂອງ 2 ຝ່າຍເປີດຫ້ອງການຜູ້ຕາງໜ້າ ແລະ ສົ່ງເສີມບັນດາການເຄື່ອນໄຫວໂຄສະນາການທ່ອງທ່ຽວໃນບໍລິເວນຂອງກັນ.

ທີ່ການສຳມະນາການຄ້າດ້ວຍຫົວຂໍ້ “ກາລະໂອກາດດຳເນີນທຸລະກິດ ຫວຽດນາມ - ອີຢິບ” ໄດ້ດຳເນີນໄປໃນວັນດຽວກັນ, ໂດຍມີການເຂົ້າຮ່ວມຂອງທ່ານປະທານຫ້ອງການການຄ້າແຂວງ Luxor Muhammad Yehia ແລະ ຜູ້ຕາງໜ້າວິສາຫະກິດຫຼາຍແຫ່ງໃນແຂວງ, ທ່ານເອກອັກຄະລັດຖະທູດ ຫງວຽນຮຸຍຢຸງ ໄດ້ແນະນຳຈຸດຫຼັກກ່ຽວກັບສະພາບການເສດຖະກິດ ກໍຄືບັນດານະໂຍບາຍດຶງດູດການລົງທຶນຂອງ ຫວຽດນາມ, ພ້ອມກັນ ກໍ່ສະເໜີໃຫ້ບັນດາວິສາຫະກິດຂອງ 2 ປະເທດເພີ່ມທະວີການເຊື່ອມຕໍ່ ເພື່ອຊອກຫາທ້ອງຕະຫຼາດກໍຄືຊອກຫາກາລະໂອກາດຮ່ວມມືດ້ານທຸລະກິດ.

ສ່ວນທ່ານປະທານຫ້ອງການການຄ້າແຂວງ Luxor Muhammad Yehia ໄດ້ສະເໜີໃຫ້ 2 ປະເທດຊຸກຍູ້ການຮ່ວມມືໃນທຸກຂົງເຂດກວ່າອີກ, ພິເສດແມ່ນເສດຖະກິດ, ການຄ້າ, ການລົງທຶນ, ການທ່ອງທ່ຽວ, ວັດທະນະທຳ ແລະ ການແລກປ່ຽນປະຊາຊົນ. ທ່ານ Muhammad Yehia ກໍ່ສະແດງຄວາມປາດຖະໜາວ່າ ບັນດາວິສາຫະກິດ ຫວຽດນາມ ຈະມີຄວາມສົນໃຈລົງທຶນເຂົ້າບັນດາເຂດອຸດສາຫະກຳຢູ່ແຂວງ Luxor.

ທີ່ການສຳມະນາ, ທ່ານ ຫງວຽນຢຸຍຮື່ງ, ເລຂາຜູ້ທີໜຶ່ງ, ຫົວໜ້າອົງການການຄ້າສະຖານທູດຫວຽດນາມ ປະຈຳ ອີຢິບ ໄດ້ແນະນຳໂດຍສັງເຂບກ່ຽວກັບການເຄື່ອນໄຫວການຄ້າ ກໍຄືບັນດາຂະແໜງການທ່າແຮງຂອງ ຫວຽດນາມ, ພ້ອມກັນນັ້ນ ກໍ່ແກ້ຂໍ້ຂ້ອງໃຈທີ່ກຽວຂ້ອງກັບກົນໄກນະໂຍບາຍຂອງວິສາຫະກິດຈຳນວນໜຶ່ງໃນ Luxor.

ມິງດຶກ