ໂດຍໄດ້ຮັບຄຳເຊີນຂອງທ່ານປະທານປະເທດຫວຽດນາມ ຫວໍວັນເຖືອງ, ທ່ານປະທານາທິບໍດີອິນໂດເນເຊຍ Joko Widodo ມາຢ້ຽມຢາມທາງລັດຖະກິດຫວຽດນາມ ແຕ່ວັນທີ 11-13 ມັງກອນ. ກ່ອນການຢ້ຽມຢາມ, ການນຳວິສາຫະກິດອິນໂດເນເຊຍ ຫຼາຍແຫ່ງມີຄວາມເຊື່ອໝັ້ນໂດຍຖືວ່າ, ການຮ່ວມມືດ້ານເສດຖະກິດລະຫວ່າງ 2 ປະເທດຈະມີບາດກ້າວບຸກທະລຸໃນໄລຍະມາເຖິງ.
ໄລ່ຮອດທ້າຍເດືອນພະຈິກ 2023, ຍອດເງິນລົງທຶນຂອງອິນໂດເນເຊຍ ເຂົ້າຫວຽດນາມ ບັນລຸ 651,21 ລ້ານໂດລາສະຫະລັດ, ດ້ວຍ 120 ໂຄງການທີ່ຍັງມີຜົນສັກສິດຢູ່, ຢືນອັນດັບ 29/143 ປະເທດ ແລະເຂດແຄວ້ນທີ່ມີເງິນລົງທຶນເຂົ້າຫວຽດນາມ.
 |
| ກອງປະຊຸມສໍາມະນາແລກປ່ຽນການຄ້າຫວຽດນາມ-ອິນໂດເນເຊຍ. ພາບ: vovworld.vn |
ກ່ຽວກັບດ້ານການຄ້າ, ວົງເງິນການຄ້າ 2 ຝ່າຍ ຫວຽດນາມ - ອິນໂດເນເຊຍ ໄດ້ເພີ່ມຈາກ 8,20 ຕື້ໂດລາສະຫະລັດ ໃນປີ 2020 ຂຶ້ນເປັນ 14,17 ຕື້ໂດລາສະຫະລັດ ໃນປີ 2022. ອິນໂດເນເຊຍ ກາຍເປັນຕະຫຼາດສົ່ງອອກໃຫຍ່ອັນດັບ 3 ແລະຕະຫຼາດນຳເຂົ້າອັນດັບ 2 ຂອງຫວຽດນາມ ຢູ່ພາກພື້ນອາຊີຕາເວັນອອກສ່ຽງໃຕ້ ໃນປີ 2023. ໃນອະນາຄົດ, ໜຶ່ງໃນບັນດາເປົ້າໝາຍຈຸດສຸມເຊິ່ງການນຳ 2 ປະເທດໄດ້ວາງອອກແມ່ນຍົກວົງເງິນການຄ້າ 2 ຝ່າຍໃຫ້ຂຶ້ນເປັນ 15 ຕື້ໂດລາສະຫະລັດ ໃນປີ 2028.
ທ່ານຮອງປະທານຫ້ອງການການຄ້າ ແລະອຸດສາຫະກຳອິນໂດເນເຊຍ Shinta Widjaja Kamdani, ໃຫ້ຮູ້ວ່າ ເປັນທີ່ຈະແຈ້ງແລ້ວວ່າ, ຍັງມີຫຼາຍວຽກງານທີ່ຈະຕ້ອງເຮັດເພື່ອໃຫ້ວົງເງິນການຄ້າບັນລຸລະດັບສູງສຸດ, ພິເສດແມ່ນພາຍໃນອາຊຽນ, ພວກເຮົາສາມາດປຶກສາຫາລື ເພື່ອຈະເຮັດແນວໃດໃຫ້ຊຸກຍູ້ການຄ້າພາຍໃນກຸ່ມໃຫ້ດີທີ່ສຸດ. ສຳລັບຂົງເຂດລົງທຶນ, ຂ້າພະເຈົ້າຄິດວ່າ ຈຳນວນເງິນລົງທຶນລະຫວ່າງ 2 ປະເທດໃນປະຈຸບັນຍັງໜ້ອຍຢູ່.
ບູນມີ
