ການຢ້ຽມຢາມທາງລັດຖະກິດຢູ່ ຫວຽດນາມ ຂອງທ່ານປະທານາທິບໍດີ ສາທາລະນະລັດອິນໂດເນເຊຍ Joko Widodo ໄດ້ມີຄວາມໝາຍສຳຄັນແນວໃດກ່ຽວກັບການພັດທະນາການພົວພັນມິດຕະພາບ, ການຮ່ວມມືລະຫວ່າງສອງປະເທດ, ຂໍຮຽນທ່ານເອກອັກຄະລັດຖະທູດ?
ການຢ້ຽມຢາມ ຫວຽດນາມ ຄັ້ງນີ້ຂອງທ່ານປະທານາທິບໍດີ ອິນໂດເນເຊຍ Joko Widodo ແມ່ນການຢ້ຽມຢາມທາງລັດຖະກິດຄັ້ງທີ 2, ພາຍຫຼັງການຢ້ຽມຢາມຄັ້ງທຳອິດໃນປີ 2018. ໃນເວລານັ້ນ, ການນຳ 2 ຝ່າຍໃຫ້ຄຳໝັ້ນສັນຍາບັນລຸເປົ້າໝາຍວົງເງິນການຄ້າ 2 ຝ່າຍໃນປີ 2023 ໃຫ້ໄດ້ 10 ຕື້ USD. ແຕ່ວ່າ ປີ 2022, ພວກເຮົາບັນລຸ ໃດ້ 14,2 ຕື້ USD ແລ້ວ - ເຊິ່ງລື່ນກາຍເປົ້າໝາຍທີ່ໄດ້ວາງອອກ. ໝາຍຄວາມວ່າ, ເປົ້າໝາຍບັນລຸ 15 ຕື້ USD ໃນປີ 2028 ຈະບັນລຸໄດ້ໂດຍໄວ. ການຢ້ຽມຢາມຄັ້ງນີ້ແມ່ນເພື່ອແນໃສ່ເພີ່ມທະວີການພົວພັນຄູ່ຮ່ວມມືຍຸດທະສາດ ອິນໂດເນເຊຍ - ຫວຽດນາມ ທີ່ໄດ້ຮັບການສ້າງຕັ້ງໃນປີ 2013.
ໃນສະພາບການຄາດຄະເນເສດຖະກິດໂລກທີ່ຍັງບໍ່ຄ່ອຍດີພາຍຫຼັງ COVID-19, ອິນໂດເນເຊຍ ແລະ ຫວຽດນາມ ໄດ້ວາງເປົ້າໝາຍມຸ່ງໄປສູ່ການກາຍເປັນປະເທດມີລາຍຮັບສູງຮອດປີ 2045. ນີ້ແມ່ນຈຸດຫັນປ່ຽນ 100 ປີແຫ່ງວັນເອກະລາດ ຂອງທັງອິນໂດເນເຊຍ ແລະ ຫວຽດນາມ.
 |
ທ່ານເອກອັກຄະລັດຖະທູດ ອິນໂດເນເຊຍ ປະຈຳ ຫວຽດນາມ Denny Abdi |
ເປົ້າໝາຍໃຫຍ່ອີກອັນໜຶ່ງທີ່ພວກເຮົາວາງໄວ້ແມ່ນບັນລຸເປົ້າໝາຍການປ່ອຍອາຍພິດລົງເປັນ 0 ຂອງ ຫວຽດນາມ ໃນປີ 2050 ແລະ ອິນໂດເນເຊຍ ໃນປີ 2060. ເປົ້າໝາຍສອງຢ່າງນີ້ບໍ່ແມ່ນເລື່ອງງ່າຍ. ພວກເຮົາຕ້ອງທຳຄວາມພະຍາຍາມທຸກຢ່າງເພື່ອໃຫ້ສອງປະເທດທີ່ມີພື້ນຖານເສດຖະກິດທີ່ຟົດຟື້ນແຖວໜ້າຢູ່ ອາຊີຕາເວັນອອກສ່ຽງໃຕ້ ບັນລຸເປົ້າໝາຍ. ສິ່ງທີ່ສໍາຄັນທີ່ສຸດ, ພວກເຮົາມີຊັບສິນທີ່ລ້ຳຄ່າທີ່ສຸດ - ນັ້ນແມ່ນຊັບພະຍາກອນມະນຸດທີ່ອຸດົມສົມບູນ ແລະ ຍາມໃດກໍ່ກຽມພ້ອມສໍາລັບເປົ້າຫມາຍທີ່ຍິ່ງໃຫຍ່. ສະນັ້ນ, ການຮ່ວມມືຢ່າງສະໜິດສະໜົມຈະສ້າງກຳລັງແຮງອັນໃຫຍ່ຫລວງບໍ່ພຽງແຕ່ໃຫ້ແກ່ເສດຖະກິດຂອງສອງປະເທດເທົ່ານັ້ນ, ຫາກຍັງໃຫ້ທັງພາກພື້ນ ອາຊຽນ ອີກດ້ວຍ.
ຮຽນທ່ານເອກອັກຄະລັດຖະທູດ, ການນຳຂອງສອງປະເທດໄດ້ເຫັນດີເປັນເອກະພາບຈະຍົກລະດັບການພົວພັນໂດຍໄວ, ທ່ານເອກອັກຄະລັດຖະທູດມີການຕີລາຄາກ່ຽວກັບຄວາມສຳຄັນຂອງບາດກ້າວນີ້ຄືແນວໃດ?
ຫວຽດນາມ ແລະ ອິນໂດເນເຊຍ ໄດ້ກາຍເປັນຄູ່ຮ່ວມມືຍຸດທະສາດນັບແຕ່ປີ 2013. ໃນປີກາຍ, ພວກເຮົາມີຫຼາຍກິດຈະກຳເພື່ອສະເຫຼີມສະຫຼອງ 10 ປີແຫ່ງການພົວພັນນີ້. ພວກເຮົາຫວັງວ່າສອງປະເທດຂອງພວກເຮົາຈະສາມາດຍົກລະດັບການເປັນຄູ່ຮ່ວມມືຍຸດທະສາດຮອບດ້ານໄດ້ໂດຍໄວ. ບາດກ້າວດັ່ງກ່າວຈະສະແດງໃຫ້ເຫັນຫຼັກໝັ້ນຂອງສອງປະເທດໃນການຮ່ວມມືຢ່າງມີປະສິດທິຜົນກວ່າ, ເປີດບັນດາກາລະໂອກາດໃໝ່ອອກ.
ໃນນັ້ນ, ຂ້າພະເຈົ້າຄິດວ່າ ພວກເຮົາຈົ່ງພ້ອມກັນມຸ່ງໄປການພັດທະນາເສດຖະກິດຂອງສອງປະເທດໃນອະນາຄົດ. ຕໍ່ຈາກນັ້ນ, ບໍ່ຢຸດຢັ້ງການຮ່ວມມືສອງຝ່າຍ, ພວກເຮົາຕ້ອງຮ່ວມມືໃນບັນດາເວທີປາໄສຫຼາຍຝ່າຍເພື່ອແກ້ໄຂຄວາມບໍ່ໝັ້ນຄົງດ້ານການເມືອງຢູ່ພາກພື້ນຄື: ສະພາບການ ມຽນມາ, ບັນຫາທະເລຕາເວັນອອກ ແລະ ສິ່ງທ້າທາຍແບບໃໝ່. ເພາະສະນັ້ນ, ອິນໂດເນເຊຍ ແລະ ຫວຽດນາມ ດ້ວຍການພົວພັນມິດຕະພາບທີ່ເປັນມູນເຊື້ອອັນດີງາມໃນທຸກລະດັບ ແລະ ຂົງເຂດຈາກການເມືອງຕະຫຼອດເຖິງເສດຖະກິດ, ໃນຖານະເປັນສະມາຊິກອາຊຽນ, 2 ປະເທດຈະປະກອບສ່ວນຢ່າງຕັ້ງໜ້າເຂົ້າໃນການເພີ່ມທະວີບົດບາດຂອງພາກພື້ນ ແລະ ໃນໂລກ, ມຸ່ງໄປເຖິງໂລກແຫ່ງສັນຕິພາບ, ສະຖຽນລະພາບ ແລະ ການພັດທະນາ.
ດ້ວຍບັນດາບັນດາປັດໄຈທີ່ມີຢູ່ແລ້ວ, ທ່ານເອກອັກຄະລັດຖະທູດ ມີຄວາມຫວັງໃນການຢ້ຽມຢາມ ຫວຽດນາມ ຂອງທ່ານປະທານາທິບໍດີ Widodo ຄືແນວໃດ ແລະ ຈະລົງນາມໃນບັນດາຂໍ້ຕົກລົງໃດແດ່?
ດັ່ງທີ່ຂ້າພະເຈົ້າໄດ້ກ່າວມາແລ້ວ, ເປົ້າໝາຍທີ່ເຕັມໄປດ້ວຍຄວາມຫວັງຂອງສອງປະເທດແມ່ນກາຍເປັນປະເທດທີ່ມີລາຍຮັບສູງໃນປີ 2045, ດັ່ງນັ້ນ ພວກເຮົາຕ້ອງຫັນປ່ຽນໂຄງປະກອບການຄ້າສອງປະເທດໃນທິດທາງການຮ່ວມມືໃໝ່. ໃນນັ້ນ, ການຮ່ວມມືລະຫວ່າງລັດຖະບານ, ວິສາຫະກິດ ແລະ ປະຊາຊົນນັບມື້ນັບເຂົ້າສູ່ລວງເລິກ.
ການຮ່ວມມື, ການລົງທຶນ 2 ຝ່າຍເຂັ້ມແຂງກວ່າ, ໂດຍສຸມໃສ່ 5 ຂົງເຂດຄື: ກະສິກຳ, ການປະມົງ, ອຸດສາຫະກຳເຕັກໂນໂລຢີສູງຄື: ລະບົບນິເວດລົດໄຟຟ້າ, ພະລັງງານທົດແທນ ແລະ ເສດຖະກິດດີຈີຕອນ.
ພ້ອມກັນນັ້ນ, ສອງປະເທດກໍ່ສຸມໃສ່ພັດທະນາບັນດາຜະລິດຕະພັນທີ່ມີມູນຄ່າສູງເພື່ອເຊື່ອມໂຍງເຂົ້າກັບຕ່ອງໂສ້ການສະໜອງທົ່ວໂລກ; ເນັ້ນໜັກເຖິງຂົງເຂດການສຶກສາ, ຄົ້ນຄວ້າ ແລະ ພັດທະນາ; ຫຼື ອຸດສາຫະກຳ Halal ເພື່ອເປີດປະຕູສູ່ການພັດທະນາການທ່ອງທ່ຽວ.
ຂໍຂອບໃຈທ່ານທູດ!
ມິງດຶກ
