| ສື່ມວນຊົນຍີ່ປຸ່ນໄດ້ຕີລາຄາສູງການຢ້ຽມຢາມຍີ່ປຸ່ນຂອງທ່ານປະທານປະເທດ ຫວໍວັນເຖືອງ | |
| ນັກສຶກສາແມ່ນນັກການທູດເພື່ອເພີ່ມພູນຄູນສ້າງການພົວພັນມິດຕະພາບ ຫວຽດນາມ - ຍີ່ປຸ່ນ |
ທ່ານ ຫງວຽນຈິແທ່ງເດືອກ, ຊາວ ຫວຽດນາມ ອາໄສຢູ່ແຂວງ Fukui ໄດ້ໄປຍັງນະຄອນ Nanao, ເຂດສູນກາງຂອງເຫດການສັ່ນສະເທືອນຢູ່ແຂວງ Ishikawa, ເພື່ອໜູນຊ່ວຍພໍ່ແມ່ພີ່ນ້ອງໃນຕອນຄ່ຳວັນທີ 3 ມັງກອນ.
ໂດຍແມ່ນໜຶ່ງໃນບັນດາຄະນະ ຫວຽດນາມ ຊຸດທຳອິດທີ່ໄປຍັງເຂດປະສົບໄພຢ່າງໜັກໜ່ວງ, ທ່ານ ເດືອກ ແບ່ງປັນວ່າ ເສັ້ນທາງຍັງຫຍຸ້ງຍາກຫຼາຍເພາະເສັ້ນທາງຫຼາຍເສັ້ນຖືກຫຍຸບພັງ.
ມີບາງເຂດທີ່ເກືອບຖືກຕັດຂາດກັບພາຍນອກ, ລົດບໍ່ສາມາດເຂົ້າເຖິງໄດ້ ແລະ ຕ້ອງເຂົ້າເຖິງດ້ວຍຍ່າງໄປ. ບັນດາເຄື່ອງຊ່ວຍເຫຼືອທີ່ກຸ່ມທ່ານ ເດືອກ ໄດ້ນຳມາແມ່ນໜັກ ແລະ ໂຄ່ງເຄ່ງ, ໃນນັ້ນມີນ້ຳ, ເຂົ້າສຳເລັດຮູບ, ໝີ່ສຳເລັດຮູບ...
ການແບກເຄື່ອງເຫຼົ່ານີ້ ຍ່າງໄປຕາມເສັ້ນທາງທີ່ໄກ, ມື່ນ ແລະ ຊັນແມ່ນມີຄວາມຫຍຸ້ງຍາກຫຼາຍ, ແຕ່ທຸກຄົນກໍ່ມີຄວາມຕັ້ງໃຈທີ່ຈະອອກໄປໃນຕອນກາງຄືນເພື່ອໃຫ້ເຄື່ອງຮອດຜູ້ທີ່ຕ້ອງການໃນເວລາໄວທີ່ສຸດ.
ໜຶ່ງໃນກຸ່ມທຳອິດທີ່ໄດ້ຮັບການໜູນຊ່ວຍຈາກກຸ່ມຂອງທ່ານ ເດືອກ ອາໄສຢູ່ເຂດພູດອຍ. ເຖິງວ່າສະຖານທີ່ແຫ່ງນີ້ ເປັນບ່ອນປອດໄພ ເພື່ອປ້ອງກັນຄື້ນຍັກນາມິ, ແຕ່ການໄດ້ຮັບເຄື່ອງບັນເທົາທຸກຈາກລັດຖະບານ ກໍມີຄວາມຫຍຸ້ງຍາກຫຼາຍ ເພາະຢູ່ໄກຈາກເຂດທີ່ຢູ່ອາໄສ ແລະ ເສັ້ນທາງກໍ່ຖືກເສຍຫາຍ.
 |
ຊາວ ຫວຽດນາມ ຢູ່ນະຄອນ Nanao ໄດ້ຮັບເຄື່ອງລຳລຽງຈາກກຸ່ມອາສາສະໝັກ |
ບັນດາແຮງງານຫວຽດນາມຖືວ່າ ນີ້ແມ່ນສະພາບການລວມຂອງປະຊາຊົນຢູ່ເຂດນີ້, ນັບທັງຊາວ ຍີ່ປຸ່ນ. ນອກຈາກນັ້ນ, ກຸ່ມແມ່ຍິງ 19 ຄົນທີ່ອາໄສຢູ່ Wakura Onsen ໄດ້ຖືກຕັດຂາດຈາກພາຍນອກ ຍ້ອນວ່າເສັ້ນທາງທີ່ໄປທີ່ນີ້ ໄດ້ຖືກຕັດເຄິ່ງແລ້ວ.
ກໍ່ຄືກັບສະຖານທີ່ອື່ນໆ ພາຍຫຼັງເກີດແຜ່ນດິນໄຫວ, ຄວາມຕ້ອງການອັນຮີບດ່ວນທີ່ສຸດຂອງປະຊາຊົນຫວຽດນາມ ແມ່ນນ້ຳເພາະແຫຼ່ງນ້ຳໄດ້ຖືກເສຍຫາຍ, ບໍ່ມີຮ້ານຂາຍເຄື່ອງ ຫຼື ຮ້ານສັບພະສິນຄ້າຢູ່ໃກ້ໆເປີດໃນສະພາບປັດຈຸບັນ, ຖະໜົນຫົນທາງໄປຫາພວກນ້ອງກໍ່ຖືກເປ່ເພຢ່າງໜັກ ຫຼື ເຂດທີ່ເຂົາເຈົ້າອາໄສຢູ່ຫ່າງໄກຈາກເຂດທີ່ມີປະຊາກອນແໜ້ນຫນາ ...
ບັນດາແຮງງານ ຫວຽດນາມ ຢູ່ທີ່ນີ້ໃຫ້ຮູ້ວ່າ ເຂົາເຈົ້າຮູ້ເຖິງສະພາບຄວາມຫຍຸ້ງຍາກທີ່ອຳນາດການປົກຄອງທ້ອງຖິ່ນພວມປະເຊີນໜ້າ, ສະນັ້ນ ເຂົາເຈົ້າພະຍາຍາມເປັນເຈົ້າຕົນເອງ. ປະຊາຊົນເຕົ້າໂຮມກັນເປັນກຸ່ມເພື່ອໜູນຊ່ວຍເຊິ່ງກັນແລະກັນ.
ໃນໄລຍະທີ່ຂາດແຄນນ້ຳໃຊ້, ໂດຍໂຕ່ງເອົານ້ຳຝົນ, ພວກນ້ອງໄດ້ພາກັນນຳໃຊ້ທີ່ຢ່າງທີ່ສາມາດບັນຈຸນ້ຳມາວາງໄວ້ໃຕ້ທໍ່ນ້ຳຈາກຫລັງຄາ ເພື່ອເກັບນ້ຳຝົນໄວ້ໃຊ້ໃນຂະນະທີ່ລໍຖ້າການສະໜັບສະໜູນຈາກລັດຖະບານ ແລະ ກຸ່ມອາສາສະໝັກ.
ທ່ານ ໂງຕູ່ງ, ນັກເຝິກງານ ຫວຽດນາມ ຢູ່ນະຄອນ Kanazawa, ແຂວງ Ishikawa ພ້ອມດ້ວຍເພື່ອນ 2 ຄົນ, ຕອນຄ່ຳວັນທີ 3 ມັງກອນ ໄດ້ມາໜູນຊ່ວຍຊາວຫວຽດນາມ ຢູ່ນະຄອນ Nanao ເຊິ່ງເປັນຈຸດສູນກາງຂອງແຜ່ນດິນໄຫວ.
ບົນຈິດໃຈໜູນຊ່ວຍຂອງຊຸມຊົນ, ທ່ານ ຫງວຽນຕ໋ວນຫງອກ ທີ່ອາໄສຢູ່ແຂວງ Fukui ໄດ້ກະກຽມນ້ຳ ແລະ ສະບຽງອາຫານໄປຍັງເຂດປະສົບໄພແຜ່ນດິນໄຫວຢ່າງໜັກໜ່ວງ. ດ້ວຍຈໍານວນເຄື່ອງຂອງທີ່ລາວໄດ້ກະກຽມ, ລາວຄາດວ່າຈະສາມາດຫນູນຊ່ວຍປະມານ 100 ຄົນ.
ທ່ານແບ່ງປັນວ່າ ໃນຂະບວນການກະກຽມເຄື່ອງຂອງ, ບໍ່ພຽງແຕ່ຊາວ ຫວຽດນາມ ເທົ່ານັ້ນ ຫາກຍັງມີເພື່ອນມິດຊາວ ຍີ່ປຸ່ນ ມາໜູນຊ່ວຍດ້ານວັດຖຸ, ພ້ອມກັບຊາວ ຫວຽດນາມ ໄດ້ຈັດ ແລະ ຂົນເຄື່ອງຂຶ້ນລົດ.
ທ່ານນາງ ຫງວຽນທິຮັງ, ໜຶ່ງໃນບັນດາຊາວ ຫວຽດນາມ ອາໄສຢູ່ເຂດຫຼົບໄພຢູ່ Nanao, ແບ່ງປັນວ່າ ຍ້ອນປະຈຸບັນທ່ານຢູ່ Nanao ພຽງຄົນດຽວ ສະນັ້ນ ມີຄອບຄົວຊາວຍີ່ປຸ່ນຢູ່ໃກ້ຄຽງ ໄດ້ເຊີນທ່ານມາຢູ່ນຳກັນໃນໄລຍະຫຍຸ້ງຍາກນີ້.
ຍັງມີສະຖານທີ່ຢູ່ເຂດຈຸດສູນກາງແຜ່ນດິນໄຫວຖືກຕັດຂາດ, ຍັງມີປະຊາຊົນປະສົບກັບຄວາມຫຍຸ້ງຍາກ, ຂາດນ້ຳ, ຂາດອາຫານ... ລັດຖະບານ ຍີ່ປຸ່ນ ກໍ່ພວມພະຍາຍາມດຳເນີນວຽກງານກູ້ຊີບກູ້ໄພ, ຊ່ວຍເຫຼືອໃນໄລຍະເວລານີ້ໃຫ້ໄວທີ່ສຸດ.
ພ້ອມກັບລັດຖະບານ ແລະ ເພື່ອນມິດ ຍີ່ປຸ່ນ, ສະຖານທູດ ຫວຽດນາມ ປະຈຳ ຍີ່ປຸ່ນ ແລະ ຊາວຫວຽດນາມ ອາໄສຢູ່ ຍີ່ປຸ່ນ ເຊັ່ນ: ທ່ານ ເດືອກ, ທ່ານ ຕູ່ງ, ທ່ານ ຫງອກ... ດ້ວຍຈິດໃຈ “ຮັກແພງຊ່ວຍເຫຼືອເຊິ່ງກັນ ແລະ ກັນ” ພວມຮ່ວມມືກັນຊ່ວຍເຫຼືອປະຊາຊົນທີ່ປະສົບກັບຄວາມຫຍຸ້ງຍາກຢູ່ເຂດປະສົບໄພແຜ່ນດິນໄຫວ. ໂດຍແມ່ນໃນຊ່ວງເວລານີ້ ທີ່ຄໍາວ່າ "ພີ່ນ້ອງຮ່ວມຊາດ" ກາຍເປັນສິ່ງທີ່ສັກສິດ ແລະ ອົບອຸ່ນ.
ມິງດຶກ
