ພັນລະຍານາຍົກລັດຖະມົນຕີ ຫວຽດນາມ ແລະ ລາວ ລົງຕົວຈິງເປັນຊ່າງຢູ່ໝູ່ບ້ານຜ້າໄຫມ ນາມກາວ, ແຂວງ ໄທບິ່ງ.

ຍສໝ - ພັນລະຍາຂອງນາຍົກລັດຖະມົນຕີ ຫວຽດນາມ, ທ່ານນາງ ເລທິບິກເຈີນ ແລະພັນລະຍາຂອງນາຍົກລັດຖະມົນຕີລາວ, ທ່ານ ນາງ ວັນດາລາ ສີພັນດອນ ໄດ້ໄປຢ້ຽມຢາມບ້ານເດັກ SOS ແຂວງ ໄທບິ່ງ, ຢ້ຽມຢາມໝູ່ບ້ານຜ້າໄໝ ນາມກາວ (ໄທບິ່ງ) ແລະ ລົງຕົວຈິງເປັນຊ່າງຢູ່ໝູ່ບ້ານຜ້າໄໝ.

	ກອງປະຊຸມປຶກສາຫາລືຂັ້ນລັດຖະມົນຕີການຕ່າງປະເທດ ຫວຽດນາມ - ລາວ ຄັ້ງທີ 10
	ທ່ານນາຍົກລັດຖະມົນຕີ ຫວຽດນາມ ຕ້ອນຮັບທ່ານຫົວໜ້າຂະແໜງເສດຖະກິດກະຊວງການຕ່າງປະເທດ ອາເມລິກາ

ພັນລະຍານາຍົກລັດຖະມົນຕີ ຫວຽດນາມ ແລະ ລາວ ລົງຕົວຈິງເປັນຊ່າງຢູ່ໝູ່ບ້ານຜ້າໄຫມ ນາມກາວ, ແຂວງ ໄທບິ່ງ.

ຕອນບ່າຍວັນທີ 6 ມັງກອນ, ໃນຂອບເຂດການຢ້ຽມຢາມ ຫວຽດນາມ ຢ່າງເປັນທາງການ, ທ່ານນາງ ເລທິບິກເຈີນ, ພັນລະຍານາຍົກລັດຖະມົນຕີ ຫວຽດນາມ ຟ້າມມິງຈິງ ແລະ ທ່ານນາງ ວັນດາລາ ສີພັນດອນ, ພັນລະຍານາຍົກລັດຖະມົນຕີ ລາວ ສອນໄຊ ສີພັນດອນ ໄດ້ໄປຢ້ຽມຢາມບ້ານເດັກ SOS ແຂວງ ໄທບິ່ງ, ຢ້ຽມຢາມໝູ່ບ້ານຜ້າໄໝ ນາມກາວ. ພ້ອມກັບພັນລະຍາສອງທ່ານ ມີທ່ານປະທານຄະນະກຳມະການປະຊາຊົນແຂວງ ໄທບິ່ງ ຫງວຽນຄັກເທິນ, ທ່ານຮອງປະທານຄະນະກຳມະການປະຊາຊົນແຂວງ ນາງ ເຈີ່ນທິບິກຮັ່ງ.

ເມື່ອພັນລະຍາສອງທ່ານໄປຮອດບ້ານເດັກ SOS ໄທບິ່ງ, ເດັກນ້ອຍຫຼາຍຄົນໄດ້ແລ່ນອອກມາເພື່ອຕ້ອນຮັບ ແລະ ຢາກຈັບມືຖ່າຍຮູບກັບພັນລະຍາສອງທ່ານ.

ແນະນໍາບ້ານເດັກ SOS ໄທບິ່ງ, ທ່ານຫົວໜ້າ ຫງວຽນວັນເຕິນ ໃຫ້ຮູ້ວ່າ: ໝູ່ບ້ານໄດ້ຮັບການສ້າງຕັ້ງຂຶ້ນໃນປີ 2013, ໄດ້ເບິ່ງແຍງລ້ຽງດູເດັກນ້ອຍ 218 ຄົນ ທີ່ພວມດຳລົງຊີວິດ, ຮໍ່າຮຽນໃນໝູ່ບ້ານ ແລະ ລ້ຽງດູນອກຊຸມຊົນ 320 ຄົນ, ໃນນັ້ນ ມີບາງຄົນກໍໄດ້ໄປຮຽນຢູ່ມະຫາວິທະຍາໄລ ແລະ ສ້າງຄອບຄົວແລ້ວ. ບ້ານເດັກ SOS ໄທບິ່ງ ບໍ່ພຽງແຕ່ແມ່ນສະຖານທີ່ທີ່ນຳຄວາມຮັກແພງພິເສດມາໃຫ້ເດັກນ້ອຍເທົ່ານັ້ນ, ຫາກຍັງໄດ້ຮັບໂອກາດໄປໂຮງຮຽນເພື່ອສາມາດເຊື່ອມໂຍງເຂົ້າກັບຊີວິດ.

ໃນຫຼາຍປີທີ່ດຳລົງຊີວິດຢູ່ພາຍໃຕ້ຊາຄາດຽວກັນ, ດ້ວຍຄວາມຮັກ, ຄວາມສາມັກຄີ ແລະ ການຊ່ວຍເຫຼືອເຊິ່ງກັນ ແລະ ກັນ, ເຂົາເຈົ້າໄດ້ກາຍເປັນຄອບຄົວດຽວກັນ ແລະ ຖືເປັນສາຍເລືອດດຽວກັນຂອງຕົນ. ແມ່ໆ ແລະ ປ້າໆ ແມ່ນຜູ້ທີ່ເຮັດໃຫ້ຫົວໃຈນ້ອຍໆອົບອຸ່ນ, ຊ່ວຍໃຫ້ພວກເຂົາມີຄວາມເຂັ້ມແຂງເພື່ອບືນຕົວຂຶ້ນໃນຊີວິດ.

ມາຢ້ຽມຢາມຄອບຄົວທີ່ມີແມ່ 1 ຄົນ ແລະ ລູກ 7 ຄົນໃນບ້ານ, ພັນລະຍາສອງທ່ານ ໄດ້ຢື້ຢາມຖາມຂ່າວ, ໃຫ້ກໍາລັງໃຈແມ່ ແລະ ລູກໆ. ພັນລະຍານາຍົກລັດຖະມົນຕີ 2 ທ່ານໄດ້ຕີລາຄາສູງຕໍ່ຄວາມເອົາໃຈໃສ່, ຄວາມມານະພະຍາຍາມ, ຄວາມຮັກແພງຂອງແມ່ທີ່ມີຕໍ່ລູກໆ, ພ້ອມທັງຫວັງວ່າ ລູກໆຈະມານະພະຍາຍາມໃນການຮ່ຳຮຽນ ແລະ ໃນຊີວິດ. ພິເສດ, ທັງສອງທ່ານຫວັງວ່າ ລູກຫຼານຈະຈາລຶກຄວາມຮັກແພງ ແລະ ການເບິ່ງແຍງຂອງບັນດາແມ່, ປ້າ ແລະ ຄະນະການນຳບ້ານເດັກ SOS.

ຢູ່ບ້ານເດັກ SOS, ພັນລະຍາສອງທ່ານ ໄດ້ມອບຂອງຂວັນທີ່ມີຄວາມໝາຍໃຫ້ແກ່ເດັກນ້ອຍ. ພັນລະຍາສອງທ່ານ ຫວັງວ່າພະນັກງານ, ລັດຖະກອນຂອງບ້ານເດັກຈະສືບຕໍ່ປະຕິບັດໜ້າທີ່ໃນການເບິ່ງແຍງດູແລ ລ້ຽງດູລູກຫຼານທີ່ມີສະພາບພິເສດ. ຄຽງຄູ່ກັບການດູແລທາງດ້ານວັດຖຸ, ພວກເຮົາຈໍາເປັນຕ້ອງໄດ້ເອົາໃຈໃສ່ຢ່າງໃກ້ຊິດກັບການດູແລຈິດໃຈ ແລະ ການໃຫ້ຄວາມສົນໃຈ.

ທ່ານນາງ ເລທິບິກເຈີນ ແລະ ທ່ານນາງ ວັນດາລາ ສີພັນດອນ ໄດ້ໄປຢ້ຽມຢາມໝູບ້ານຜ້າໄໝ ນາມກາວ (ເມືອງ ກ໋ຽນເຊື່ອງ).

ນັບແຕ່ຕົ້ນບ້ານ, ຄົນງານຜ້າໄໝ, ເດັກນ້ອຍໃນໝູ່ບ້ານ ແລະ ປະຊາຊົນໄດ້ເຕົ້າໂຮມກັນເປັນຈຳນວນຫຼວງຫຼາຍເພື່ອຕ້ອນຮັບສອງທ່ານນາງ ແລະ ຄະນະ.

ສອງທ່ານນາງໄດ້ຮັບຟັງການແນະນຳບ້ານຜ້າໄໝ ນາມກາວ. ຕາມການແນະນຳຢູ່ໝູ່ບ້ານ, ໃນທ້າຍສະຕະວັດທີ 16, ມີຄົນຕະກຸນ ຫງວຽນຊວນ ໄດ້ກັບຄືນເມືອບ້ານເກີດເມືອງນອນຂອງຕົນ ເບິດບາດ - ເຊີນໄຕ ເພື່ອຮຽນຕັດຫຍິບ. ຕໍ່ມາ, ລາວໄດ້ກັບຄືນໄປສອນລູກຫຼານປູກມອນ, ລ້ຽງມ້ອນ, ເຂັນຝ້າຍ... ນັບແຕ່ນັ້ນມາ, ການທໍຜ້າໄດ້ກາຍເປັນອາຊີບພື້ນເມືອງຢູ່ໝູ່ບ້ານກາວບັດ, ຕາແສງ ນາມກາວ. ໃນຕົ້ນສະຕະວັດທີ 20, ສັງຄົມ ອານນາມ ມີຄວາມເປັນທັນສະໄໝ, ການຄ້າຂາຍພັດທະນາ, ອາຊີບຂອງໝູ່ບ້ານນັບມື້ນັບພັດທະນາ. ນາມກ່າວ ໄດ້ມີອາຊີບການຖັກແສ່ວເພີ່ມອີກ.

ພາຍຫຼັງປີ 1954, ອາຊີບຫັດຖະກຳຂອງໝູ່ບ້ານໄດ້ພັດທະນາເປັນສະຫະກອນຫັດຖະກຳ ນາມກາວ. ຜ່ານຫຼາຍໄລຍະປະຫວັດສາດ, ມາຮອດປະຈຸບັນ, ອາຊີບຫັດຖະກຳຂອງໝູ່ບ້ານໄດ້ມີບັນດາຜົນງານດ້ານເສດຖະກິດ, ວັດທະນະທຳທີ່ມີຄຸນຄ່າສູງ. ປະຈຸບັນ, ສະຫະກອນຜ້າໄຫມ ນາມກາວ ມີນັກສິລະປະກອນ (ຊ່າງ) 200 ກວ່າຄົນ, ເນື້ອທີ່ວັດຖຸດິບ 1.000 ເຮັກຕາ, ລາຍຮັບແຕ່ລະປີນັບສິບຕື້ດົ່ງ, ນຳມາເຊິ່ງລາຍຮັບທີ່ໝັ້ນຄົງໃຫ້ແກ່ປະຊາຊົນ ໃນຂະນະທີ່ຍັງຄົງຮັກສາເອກະລັກຂອງໝູ່ບ້ານອາຊີບຫັດຖະກຳທີ່ໄດ້ຜ່ານ 5 ສະຕະວັດ.

ພາຍຫຼັງໄດ້ຮັບຟັງການແນະນຳອາຊີບເຮັດຜ້າໄໝຂອງໝູ່ບ້ານຜ້າໄໝ ນາມກາວ ແລ້ວຍ່າງຜ່ານຮ່ອມນ້ອຍໆຂອງບ້ານ, ສອງທ່ານໄດ້ໄປຢາມເຮືອນບູຮານທີ່ມີອາຍຸກວ່າ 100 ປີ, ໄດ້ຟັງການຂັບແຈວ, ຊິມເຂົ້າໜົມ ໄກ໋ ແລະ ພິເສດແມ່ນລົງຕົວຈິງໃນການເປັນຊ່າງຢູ່ໝູ່ບ້ານຜ້າໄໝ.

ສອງທ່ານໄດ້ຮັບຟັງການແນະນຳຂະບວນການເຮັດຜ້າໄໝ ນາມກາວ ແລະ ໄດ້ມີການເຂົ້າຮ່ວມເຮັດຕົວຈິງໃນຂະບວນການຜະລິດເປັນຜ້າໄໝ.

ໃນບັນຍາກາດທີ່ຄຶກຄັກດ້ວຍສຽງຮ້ອງເພງ, ສຽງຫົວ ແລະ ສຽງເຂັນຝ້າຍ, ດຶງໄໝ, ຕີກອງ, ພ້ອມກັບການແນະນຳຂອງນັກສິລະປະການ, ບາງຄົນປີນີ້ມີອາຍຸຮອດ 95 ປີ, ທັງສອງທ່ານໄດ້ເຊື່ອມຕົວເປັນນັກສິລະປະການໝູ່ບ້ານຜ້າໄໝ ນາມກາວ ເມື່ອພ້ອມກັນເຂັນຝ້າຍ, ດຶງໄໝ, ຕີກອງ...