| ເພີ່ມທະວີການພົວພັນມິດຕະພາບທີ່ເປັນມູນເຊື້ອ ລະຫວ່າງຄະນະຜູ້ແທນຫວຽດນາມ ແລະ ລາວ ປະຈຳສະຫະປະຊາຊາດ | |
| ຫວຽດນາມ ແລະ UNESCO ສົມທົບກັນເຮັດໃຫ້ວັດທະນະທຳກາຍເປັນເປົ້າໝາຍພັດທະນາແບບຍືນຍົງຂອງສະຫະປະຊາຊາດ |
ວັນທີ 11 ທັນວາ, ຢູ່ສໍານັກງານໃຫຍ່ ສປຊ ຢູ່ນິວຢອກ - ອາເມລິກາ, ທ່ານເອກອັກຄະລັດຖະທູດ ດັ້ງຮວ່າງຢາງ, ຫົວໜ້າຄະນະຜູ້ຕາງໜ້າຫວຽດນາມ ປະຈໍາ ສປຊ ໄດ້ມີການເຮັດວຽກກັບ ທ່ານ Faisal Shahkar, ທີ່ປຶກສາຕໍາຫຼວດ ສປຊ ເພື່ອແລກປ່ຽນກ່ຽວກັບບັນດາມາດຕະການເພີ່ມທະວີການເຂົ້າຮ່ວມຂອງບັນດານາຍຕຳຫຼວດ ຫວຽດນາມ ໃນການເຄື່ອນໄຫວຮັກສາສັນຕິພາບຂອງ ສປຊ.
 |
| ທ່ານເອກອັກຄະລັດຖະທູດ ດັ້ງຮວ່າງຢາງ ແລະ ທ່ານ Faisal Shahkar ທີ່ປຶກສາຕຳຫຼວດ ສປຊ. |
ທີ່ການພົບປະ, ທ່ານເອກອັກຄະລັດຖະທູດ ດັ້ງຮວ່າງຢາງ ໄດ້ສະເເດງຄວາມຂອບໃຈຫ້ອງການຕຳຫຼວດ, ກົມຮັກສາສັນຕິພາບ ສປຊ ແລະ ສ່ວນຕົວທ່ານ Faisal Shahkar ທີ່ໄດ້ໃຫ້ການຊ່ວຍເຫຼືອຢ່າງມີປະສິດທິຜົນ ແລະ ຕັ້ງໜ້າໃນຄວາມມານະພະຍາຍາມເຂົ້າຮ່ວມບັນດາການເຄື່ອນໄຫວຮັກສາສັນຕິພາບຂອງ ຫວຽດນາມ, ພິເສດແມ່ນບັນດາການເຄື່ອນໄຫວຝຶກອົບຮົມ ແລະ ບຳລຸງສ້າງ, ການສ້າງຄວາມສາມາດໃຫ້ບັນດານາຍຕຳຫຼວດທີ່ກະຊວງຕຳຫຼວດ ໄດ້ສົ່ງໃຫ້ເຂົ້າຮ່ວມການເຄື່ອນໄຫວຮັກສາສັນຕິພາບ.
ທ່ານເອກອັກຄະລັດຖະທູດຢືນຢັນວ່າ, ໃນຖານະເປັນສະມາຊິກທີ່ຕັ້ງໜ້າ ແລະ ມີຄວາມຮັບຜິດຊອບຂອງ ສປຊ ແລະ ປະຊາຄົມສາກົນ, ຫວຽດນາມ ຈະສືບຕໍ່ເພີ່ມທະວີການເຂົ້າຮ່ວມການເຄື່ອນໄຫວຮັກສາສັນຕິພາບ, ໃນນັ້ນມີຂົງເຂດຕຳຫຼວດ, ເໝາະສົມກັບບັນດາຫຼັກການຂອງກົດບັດ ສປຊ; ພ້ອມກັນນັ້ນ, ພວກຂ້າພະເຈົ້າກໍ່ປາດຖະໜາຢາກເຂົ້າຮ່ວມໃນຂະບວນການສ້າງນະໂຍບາຍຂອງ ສປຊ ໃນຂົງເຂດນີ້ຢ່າງເລິກເຊິ່ງ ແລະ ແທດຈິງກ່ວາອີກ.
ໂດຍຕີລາຄາສູງການເຂົ້າຮ່ວມຢ່າງຕັ້ງໜ້າຂອງຫວຽດນາມ ເພື່ອບັນລຸໄດ້ບັນດາໝາກຜົນທີ່ດີໃນການເຄື່ອນໄຫວຮັກສາສັນຕິພາບ ເວົ້າລວມ ແລະ ບັນດາການເຄື່ອນໄຫວຂອງກຳລັງຕຳຫຼວດ ເວົ້າສະເພາະ, ທ່ານທີ່ປຶກສາຕຳຫຼວດ Faisal Shahkar ປາດຖະໜາຢາກສືບຕໍ່ຮ່ວມມືກັບ ຫວຽດນາມ ໃນບັນຫານີ້ຢ່າງແໜ້ນແຟ້ນກ່ວາ.
ທ່ານ Faisal Shahkar ຢືນຢັນວ່າ: ກົມຕຳຫຼວດພ້ອມແລ້ວທີ່ຈະໜູນຊ່ວຍ ຫວຽດນາມ ຈົນສຸດຄວາມສາມາດໃນຂະບວນການກະກຽມກຳລັງ, ໜູນຊ່ວຍຝຶກອົບຮົມ, ກວດກາຕີລາຄາພື້ນຖານຄວາມສາມາດ ແລະ ຕີລາຄາຂະບວນການຜັນຂະຫຍາຍບັນດານາຍຕຳຫຼວດອອກໄປສູ່ພື້ນທີ່ຕົວຈິງ.
ດີງເລື້ອງ
