ນະຄອນ ໂຮ່ຈີມິນ ຍ້ອງຍໍຊົມເຊີຍນັກສຶກສາຕົວແບບ ລາວ ແລະ ກຳປູເຈຍ
ວັນທີ 3 ທັນວາ, ຄະນະຊາວໜຸ່ມນະຄອນ ໂຮ່ຈີມິນ (HCMC) ໄດ້ຈັດຕັ້ງລາຍການຍ້ອງຍໍ “ນັກສຶກສາລາວ ແລະ ກຳປູເຈຍ ຕົວແບບ” ໃນປີ 2023. ມີນັກສຶກສາລາວ ແລະ ກຳປູເຈຍ ທີ່ມີຜົນການຮຽນດີເດັ່ນ, ຝຶກຝົນຫຼໍ່ຫຼອມ ແລະ ຕັ້ງໜ້າເຂົ້າຮ່ວມການເຄື່ອນໄຫວພົບປະມິດຕະພາບ ຈໍານວນ 123 ກວ່າ ຄົນ ທີ່ພວມຮ່ຳຮຽນຢູ່ມະຫາວິທະຍາໄລ ແລະ ວິທະຍາໄລ ຢູ່ນະຄອນ ໂຮ່ຈິມິນ ໄດ້ຮັບການຍ້ອງຍໍຊົມເຊີຍ.
ກ່າວຄຳເຫັນທີ່ພິທີຍ້ອງຍໍ, ທ່ານນາງ ເຈີ່ນທູ່ຮາ, ຮອງເລຂາຄະນະຊາວໜຸ່ມນະຄອນໂຮ່ຈີມິນ ໃຫ້ຮູ້ວ່າ: ບັນດາຕົວແບບທີ່ໄດ້ຮັບການຍ້ອງຍໍ ບໍ່ພຽງແຕ່ເປັນແວ່ນແຍງທີ່ໃສແຈ້ງໃນການຮ່ຳຮຽນ ແລະ ຝຶກຝົນຫຼໍ່ຫຼອມຕົນເອງເທົ່ານັ້ນ ແຕ່ຍັງແມ່ນບັນດາຕົວແບບທີ່ດີ ເພື່ອເພີ່ມພູນຄູນສ້າງ ມິດຕະພາບຫວຽດນາມ - ລາວ, ຫວຽດນາມ - ກຳປູເຈຍ ໃຫ້ນັບມື້ນັບພັດທະນາແບບຍືນຍົງ.
|
ທຸກໆປີ ນະຄອນ ໂຮ່ຈີມິນ ຮັບເອົານັກສຶກສາຕ່າງປະເທດ ນັບເປັນຮ້ອຍໆຄົນຈາກ ລາວ ແລະ ກຳປູເຈຍ ໄປຮຽນລະດັບປະລິນຍາຕີ, ປະລິນຍາໂທ ແລະ ບັນດາຫຼັກສູດຝຶກອົບຮົມໄລຍະສັ້ນ. ປະຈຸບັນ, ນະຄອນດັ່ງກ່າວມີນັກສຶກສາລາວ ແລະ ກຳປູເຈຍ 1,100 ກວ່າຄົນ ທີ່ກໍາລັງສືກສາຢູ່ 22 ມະຫາວິທະຍາໄລ, ວິທະຍາໄລ ແລະ ສະຖາບັນ.
|
ນາມມະຍົດ “ນັກສຶກສາ, ນັກສຳມະນາກອນ ລາວ ແລະ ກຳປູເຈຍ ຕົວແບບ ປະຈຳນະຄອນ ໂຮ່ຈີມິນ” ທີ່ຄະນະຊາວໜຸ່ມນະຄອນ ມອບໃຫ້ ແມ່ນເພື່ອລະດົມ, ຍ້ອງຍໍບັນດານັກຮຽນລາວ ແລະ ກຳປູເຈຍ ທີ່ມີຜົນງານດີເດັ່ນໃນການສຶກສາ ແລະ ຕັ້ງໜ້າເຂົ້າຮ່ວມໃນການເຄື່ອນໄຫວພົບປະມິດຕະພາບໃນໄລຍະທີ່ຮ່ຳຮຽນຢູ່ນະຄອນໂຮ່ຈິມິນ.
ພາຍຫຼັງ 18 ປີ ທີ່ຈັດຂຶ້ນ, ມາຮອດປະຈຸບັນ, ໂຄງການໄດ້ຍ້ອງຍໍນັກສຶກສາລາວ ແລະ ກຳປູເຈຍ ທີ່ດີເດັ່ນຈໍານວນ1.167 ຄົນ ທີ່ພວມຮ່ຳຮຽນຢູ່ມະຫາວິທະຍາໄລ ແລະ ສະຖານບັນ ທົ່ວນະຄອນໂຮ່ຈິມິນ.
ຊ ສະຫວັດ
