ກ່າວຄຳເຫັນທີ່ພິທີເປີດຊຸດຝຶກອົບຮົມ, ສະຫາຍພົນຈັດຕະວາ ດວ່ານຊວນໂບະ, ຫົວໜ້າບັນນາທິການໜັງສືພິມກອງທັບປະຊາຊົນຫວຽດນາມ ໄດ້ແນະນໍາໂດຍສັງເຂບກ່ຽວກັບປະຫວັດຄວາມເປັນມາ, ມູນເຊື້ອ, ພາລະບົດບາດ, ໜ້າທີ່ ແລະການກໍານົດທິດພັດທະນາຂອງໜັງສືພິມກອງທັບປະຊາຊົນຫວຽດນາມ ໃນໄລຍະຈະມາເຖິງ.
 |
ບັນດາຜູ້ແທນທີ່ເຂົ້າຮ່ວມພິທີເປີດຊຸດອົບຮົມນັກຂ່າວກອງທັບປະຊາຊົນລາວ ໄດ້ຖ່າຍຮູບທີ່ລະນຶກ. |
ສະຫາຍພົນຈັດຕະວາ ດວ່ານຊວນໂບະ ເນັ້ນໜັກວ່າ, ຜ່ານໄລຍະທາງ 73 ປີແຫ່ງການກໍ່ສ້າງ ແລະເຕີບໃຫຍ່ຂະຫຍາຍຕົວ, ມາຮອດປັດຈຸບັນ, ໜັງສືພິມກອງທັບປະຊາຊົນຫວຽດນາມ ໄດ້ມີບາດກ້າວພັດທະນາຢ່າງແຂງແຮງ, ໜັງສືພິມກອງທັບປະຊາຊົນຫວຽດນາມ ຍາມໃດກໍ່ໄດ້ຮັບການຊີ້ນໍາ, ລະດົມກໍາລັງໃຈຈາກພັກ, ລັດ, ຄະນະພັກການທະຫານສູນກາງ ແລະກະຊວງປ້ອງກັນປະເທດ, ກົມໃຫຍ່ການເມືອງກອງທັບປະຊາຊົນຫວຽດນາມ ແລະໄດ້ຮັບການຊ່ວຍເຫຼືອຈາກຄະນະ, ກະຊວງ, ຂະແໜງການຂັ້ນສູນກາງ; ບັນດາອົງການ, ກົມກອງໃນກອງທັບ ແລະການນຳ, ອຳນາດການປົກຄອງ, ປະຊາຊົນບັນດາທ້ອງຖິ່ນໃນທົ່ວປະເທດ ແລະເພື່ອນມິດສາກົນ, ໃນນັ້ນມີການລະດົມກຳລັງໃຈເປັນພິເສດຈາກການນຳຂອງພັກ, ລັດ, ກອງທັບ ແລະປະຊາຊົນລາວ, ພິເສດແມ່ນເພື່ອນຮ່ວມງານຢູ່ໜັງສືພິມກອງທັບປະຊາຊົນລາວອ້າຍນ້ອງ.
ສ່ວນສະຫາຍພັນໂທ ຄອນສະຫວັນ ໄຊຍະລາດ, ຮອງຫົວໜ້າບັນນາທິການໜັງສືພິມກອງທັບປະຊາຊົນລາວ ໃຫ້ຮູ້ວ່າ, ໃນຊຸມປີມໍ່ໆມານີ້, ພັກ ແລະ ລັດລາວ ຍາມໃດກໍ່ເອົາໃຈໃສ່ເຖິງການເຕີບໃຫຍ່ຂະຫຍາຍຕົວ ແລະການພັດທະນາຂອງສື່ມວນຊົນ, ໜັງສືພິມກອງທັບປະຊາຊົນລາວ ຍາມໃດກໍ່ເອົາໃຈໃສ່ວຽກງານພັດທະນາຮອບດ້ານ, ພິເສດແມ່ນວຽກງານກໍ່ສ້າງຖັນແຖວນັກຂ່າວທີ່ມີລະດັບ, ມີຄວາມຮູ້, ຄວາມສາມາດປະຕິບັດສຳເລັດທຸກໜ້າທີ່ເປັນຢ່າງດີ, ໃນນັ້ນຕ້ອງໄດ້ເວົ້າເຖິງການຊ່ວຍເຫຼືອ, ການປະກອບສ່ວນອັນໃຫຍ່ຫຼວງຂອງໜັງສືພິມກອງທັບປະຊາຊົນຫວຽດນາມ ໃຫ້ແກ່ໜັງສືພິມກອງທັບປະຊາຊົນລາວ.
ຊຸດຝຶກອົບຮົມຄັ້ງນີ້ ໄດ້ຈັດຂຶ້ນກົງກັບໂອກາດກະກຽມສະເຫຼີມສະຫຼອງ 75 ປີແຫ່ງວັນສ້າງຕັ້ງກອງທັບປະຊາຊົນລາວ ແລະ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ, ແມ່ນໂອກາດທີ່ດີເພື່ອໃຫ້ພະນັກງານໜັງສືພິມກອງທັບປະຊາຊົນລາວ ຮັບເອົາຄວາມຮູ້, ບົດຮຽນ, ປະສົບການດີໆຈາກໜັງສືພິມກອງທັບປະຊາຊົນຫວຽດນາມ ຕື່ມອີກ, ຈາກນັ້ນກໍ່ນຳໄປໝູນໃຊ້ເຂົ້າໃນວິວັດການໂຄສະນາໃຫ້ບັນລຸປະສິດທິຜົນຢ່າງສູງ, ປະຕິບັດສຳເລັດໜ້າທີ່ ເຊິ່ງພັກ, ລັດ ມອບໝາຍໃຫ້ເປັນຢ່າງດີ.
ສະຫາຍພັນໂທ ຄອນສະຫວັນ ໄຊຍະລາດ ໄດ້ຢືນຢັນເຖິງຄວາມຕັດສິນໃຈຜ່ານຜ່າທຸກຄວາມຫຍຸ້ງຍາກ, ຕັ້ງໃຈ, ພະຍາຍາມປະຕິບັດໜ້າທີ່ການຮ່ຳຮຽນ, ສຶກສາຄົ້ນຄວ້າ ເພື່ອໃຫ້ໄດ້ຮັບໝາກຜົນສູງສຸດ.
ຄຳຮຸ່ງ
