ກ່າວຄຳເຫັນໃນພິທີຕ້ອນຮັບ ທ່ານ ຟານວັນມ້າຍ ໃຫ້ຮູ້ວ່າ: ນະຄອນໂຮ່ຈິມິນ ແມ່ນໃຈກາງເສດຖະກິດຂອງພາກໃຕ້ ແລະ ທົ່ວປະເທດ; ເປັນສູນກາງການຄ້າສາກົນ. ໂຄງປະກອບທາງດ້ານເສດຖະກິດຂອງນະຄອນໂຮ່ຈິມິນ 65% ແມ່ນການບໍລິການ, ອຸດສາຫະກໍາການກໍ່ສ້າງ 20%. ປະຈຸບັນນີ້ ນະຄອນໂຮ່ຈິມິນ ໄດ້ສ້າງໂຄງປະກອບເສດຖະກິດຄືນໃໝ່, ມຸ່ງໄປເຖິງຂະແໜງການບໍລິການທີ່ມີມູນຄ່າສູງກວ່າ. ການຫັນເປັນສີຂຽວ ແລະ ການພັດທະນາເສດຖະກິດສີຂຽວ ກໍ່ແມ່ນການກຳນົດທິດໃໝ່ຂອງນະຄອນໃນຕໍ່ໜ້າ...
ນະຄອນ ໂຮ່ຈີມິນ ຫວັງຢາກຈະສຶກສາບົດຮຽນ ແລະ ຊຸກຍູ້ການຮ່ວມມືກັບບັນດາທ້ອງຖິ່ນຂອງລາວ ແລະ ກໍາປູເຈຍ ເພື່ອຊຸກຍູ້ການພັດທະນາປະຊາຄົມໃຫ້ມີຄວາມເຂັ້ມແຂງກວ່າອີກໃນໄລຍະຈະມາເຖິງນີ້.
 |
| ທ່ານ ຟານວັນມ້າຍ ປະທານຄະນະກຳມະການປະຊາຊົນນະຄອນ ໂຮ່ຈີມິນ (ທາງຊ້າຍ) ແລະ ທ່ານ ປອ ສອນທະນູ ທຳມະວົງ ຫົວໜ້າສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ. ພາບ: ກາວແທ່ງ/ໜັງສືພິມ ປົດປ່ອຍໄຊງ່ອນ. |
ທ່ານ ຟານວັນມ້າຍ ໃຫ້ຮູ້ວ່າ: ບັນດາຜົນງານການຄົ້ນຄ້ວາຕົວຈິງ ຈາກບັນດາສະຖາບັນບັນດິດ ທັງ 3 ປະເທດ ຫວຽດນາມ , ລາວ, ກຳປູເຈຍ ແມ່ນມີຄວາມໝາຍສຳຄັນທີ່ສຸດກ່ຽວກັບກັບກຳນົດທິດ ແລະ ພື້ນຖານການພັດທະນາທີ່ຖືກຕ້ອງ. ສະນັ້ນ, ນະຄອນ ໂຮ່ຈີມິນ ຫວັງວ່າ ສະຖາບັນຂອງ 3 ປະເທດ ຈະສືບຕໍ່ຍູ້ແຮງການຮ່ວມມືໃນໄລຍະຈະມາເຖິງ; ແລະກຽມພ້ອມທີ່ຕ້ອນຮັບບັນດາຄະນະຄົ້ນຄ້ວາ, ຕອບສະຫນອງທຸກຄວາມຕ້ອງການເພື່ອການຄົ້ນຄວ້າບັນລຸໝາກຜົນທີ່ດີທີ່ສຸດ.
ໂດຍຕີລາຄາສູງຕໍ່ກັບການພັດທະນາຂອງນະຄອນ ໂຮ່ຈີມິນ, ທ່ານ ປອ ສອນທະນູ ທຳມະວົງ ແລະ ທ່ານ ບັນດິດ Sok Touch ໃຫ້ຮູ້ວ່າ: ການເລືອກເອົານະຄອນ ໂຮ່ຈີມິນ ເພື່ອຈັດຕັ້ງກອງປະຊຸມວິທະຍາສາດສັງຄົມ ລະຫວ່າງ 3 ປະເທດ ຈະຊ່ວຍໃຫ້ແຕ່ລະຝ່າຍທີ່ເຂົ້າຮ່ວມ ໄດ້ມີບົດຮຽນປະສົບການອັນລ້ຳຄ່າໃນການພັດທະນາເສດຖະກິດ ແລະ ການຄ້າໃນຍຸກດິຈິຕອນທົ່ວໂລກ. ໃນປີໜ້າ, ສປປ ລາວ ຈະເປັນເຈົ້າພາບຈັດກອງປະຊຸມສຳມະນາວິທະຍາສາດ ແລະ ປາດຖະໜາຈະເຊີນຄະນະຜູ້ແທນນະຄອນ ໂຮ່ຈີມິນ ເຂົ້າຮ່ວມ ເພື່ອສາມາດໄດ້ຮຽນຮູ້ປະສົບການພັດທະນາຈາກນະຄອນ ໂຮ່ຈີມິນ.
ກອງປະຊຸມສຳມະນາສາກົນກ່ຽວກັບວິທະຍາສາດສັງຄົມ ປະຈໍາປີ ໄດ້ຮັບການຈັດຕັ້ງເປັນປົກກະຕິຂອງ 3 ສະຖາບັນບັນດິດຄື: ສະຖາບັນບັນດິດ ວິທະຍາສາດສັງຄົມ ຫວຽດນາມ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ແລະສະຖາບັນບັນດິດ ລາດຊະອານາຈັກ ກຳປູເຈຍ. ສຳລັບປີນີ້ກອງປະຊຸມ ໄດ້ດຳເນີນໄປເປັນເວລາ 2 ວັນ (ວັນທີ 20 - 21 ກັນຍາ) ຢູ່ນະຄອນ ໂຮ່ຈີມິນ ດ້ວຍເນື້ອໃນປຶກສາຫາລືຕົ້ນຕໍກ່ຽວກັບການຮ່ວມມືດ້ານການຄ້າ ແລະ ການລົງທຶນ ລະຫວ່າງ 3 ປະເທດ. ນີ້ແມ່ນໂອກາດເພື່ອໃຫ້ແຕ່ລະຝ່າຍ ໄດ້ຮ່ຳຮຽນເອົາບັນດາປະສົບການຂອງກັນ ແລະ ກັນ, ປະກອບສ່ວນຮັດແໜ້ນສາຍພົວພັນລະຫວ່າງ ຫວຽດນາມ - ລາວ - ກຳປູເຈຍ.
ອານຸໄຊ ສະຫວັດ
