ໃນການພົບປະສອງຝ່າຍພາຍຫຼັງພິທີຕ້ອນຮັບ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ແລະ ທ່ານນາຍົກລັດຖະມົນຕີ Anwar Ibrahim ໄດ້ເຫັນດີເປັນເອກະພາບເພີ່ມທະວີການແລກປ່ຽນພົບປະຄະນະຜູ້ແທນທຸກຂັ້ນ ໃນຊ່ອງທາງພັກ, ລັດ, ລັດຖະບານ ແລະ ລັດຖະສະພາ; ພິຈາລະນາກໍ່ສ້າງກົນໄກສອງນາຍົກລັດຖະມົນຕີ ພົບປະ, ແລກປ່ຽນກັນເປັນປະຈຳ ຫຼື ປະຈຳໄລຍະ ພາຍໃຕ້ຮູບການຕ່າງໆຕາມຄວາມເໝາະສົມ ຢູ່ເວທີປາໄສຫຼາຍຝ່າຍ; ຊຸກຍູ້ກັນຜັນຂະຫຍາຍບັນດາກົນໄກຮ່ວມມືທາງດ້ານວິຊາການທີ່ໄດ້ລົງນາມແລ້ວໂດຍໂດຍໄວ; ສູ້ຊົນນຳວົງເງິນການຄ້າສອງຝ່າຍບັນລຸ 18 ຕື້ USD ໃນປີ 2025 ຕາມທິດດຸ່ນດ່ຽງສະເໝີກັນ; ຈຳກັດການຈັດວາງຮົ້ວກີດຂວາງດ້ານການຄ້າ; ສ້າງຄວາມສະດວກໃນການນຳເຂົ້າສົ່ງອອກສິນຄ້າປະເພດຕ່າງໆເຊິ່ງສອງຝ່າຍມີທ່າແຮງ ແລະ ມີກຳລັງບົ່ມຊ້ອນ.
 |
| ທ່ານເລຂາທິການໃຫຍ່ ຫງວຽນຝູຈ້ອງ ຕ້ອນຮັບທ່ານນາຍົກລັດຖະມົນຕີ ມາເລເຊຍ Anwar Ibrahim (ພາບ: nhandan.vn) |
ສອງຝ່າຍກໍເຫັນດີເພີ່ມທະວີໃນຂົງເຂດປ້ອງກັນຊາດ, ປ້ອງກັນຄວາມສະຫງົບ ແລະ ຂົງເຂດອື່ນໆ; ຍູ້ແຮງການລົງນາມໃນເອກະສານສະບັບຕ່າງໆທີ່ກ່ຽວຂ້ອງ. ນາຍົກລັດຖະມົນຕີສອງທ່ານ ກໍເນັ້ນໜັກເຖິງຄວາມສຳຄັນຂອງການຮ່ວມມືໃນທະເລ ແລະ ມະຫາສະໝຸດ; ພິຈາລະນາການສ້າງຕັ້ງກົນໄກປຶກສາຫາລື ກ່ຽວກັບບັນດາບັນຫາຢູ່ທະເລ ແລະ ສ້າງລະບົບຕິດຕໍ່ສື່ສານຕ້ານການຂຸດຄົ້ນສິນໃນນ້ຳຢ່າງຜິດກົດໝາຍ, ບໍ່ລາຍງານ ແລະ ບໍ່ຖືກຕ້ອງຕາມຂໍ້ກຳນົດ (IUU).
ສອງຝ່າຍກໍເຫັນດີສົມທົບກັບບັນດາປະເທດ ອາຊຽນ ອື່ນ ເພື່ອຮັບປະກັນຄວາມສາມັກຄີ ແລະ ຄວາມເປັນເອກະພາບໃນ ອາຊຽນ; ພ້ອມກັນສະເໜີບັນດາຂໍ້ລິເລີ່ມທີ່ເໝາະສົມ ເພື່ອປະຕິບັດບັນດາບຸລິມະສິດຂອງ ອາຊຽນ ປີ 2023 ໃຫ້ປະກົດຜົນເປັນຈິງ.
ພາຍຫຼັງການພົບປະສອງຝ່າຍ, ນາຍົກລັດຖະມົນຕີສອງທ່ານ ໄດ້ພ້ອມກັນເປັນສັກຂີພິຍານພິທີລົງນາມໃນເອກະສານ ສອງສະບັບ, ເຊິ່ງລວມມີ: ບົດບັນທຶກຊ່ວຍຈຳວ່າດ້ວຍຈໍ້ຕົກລົງກອງປະຊຸມຄັ້ງທີ 7 ຄະນະກຳມະການປະສົມກ່ຽວກັບການຮ່ວມມືດ້ານເສດຖະກິດ, ວິທະຍາສາດ ແລະ ເຕັກນິກ ແລະ ບົດບັນທຶກຊ່ວຍຈຳລະຫວ່າງສະຫະພັນການຄ້າ ແລະ ອຸດສາຫະກຳ ຫວຽດນາມ ແລະ ຫ້ອງການການຄ້າ ແລະ ອຸດສາຫະກຳແຫ່ງຊາດ ມາເລເຊຍ.
ໃນຕອນບ່າຍຂອງວັນດຽວກັນ, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດ ຫວຽດນາມ ຫງວຽນຝູຈ້ອງ ກໍ່ໃຫ້ການຕ້ອນຮັບທ່ານນາຍົກລັດຖະມົນຕີ ມາເລເຊຍ Anwar Ibrahim ເຊັ່ນດຽວກັນ.
ດີງເລື້ອງ
