ດ້ວຍອັດຕາການເຕີບໂຕ 20% ຕໍ່ປີ, ຫວຽດນາມ ໄດ້ຖືກຈັດອັນດັບໃນກຸ່ມ 5 ປະເທດທີ່ມີອັດຕາການເຕີບໂຕດ້ານການຄ້າອອນລາຍສູງສຸດໃນໂລກ. ໂດຍສະເພາະໃນປີ 2022, ມູນຄ່າການສົ່ງອອກໃນເວທີການຄ້າາເອເລັກໂຕນິກສາກົນຈະເພີ່ມຂຶ້ນຢ່າງຫຼວງຫຼາຍ.
 |
| ຫວຽດນາມ ມີທ່າໄດ້ປຽບຫຼາຍຢ່າງເພື່ອຊຸກຍູ້ການສົ່ງອອກທາງອອນໄລ |
ຕາມການລາຍງານຂອງ Amazon Global Selling, ໃນປີ 2022, ຈຳນວນວິສາຫະກິດຫວຽດນາມ ທີ່ເຂົ້າຮ່ວມການຊື້ຂາຍສິນຄ້າໃນເວທີການຄ້າອອນໄລ Amazon ໄດ້ເພີ່ມຂຶ້ນກວ່າ 80% ເມື່ອທຽບໃສ່ໄລຍະດຽວກັນ; ມີເກືອບ 10 ລ້ານເຄື່ອງໝາຍການຄ້າຂອງຫວຽດນາມ ໄດ້ຂາຍຢູ່ Amazon. ບົດລາຍງານ ໃຫ້ຮູ້ວ່າ: ການຄ້າຂາຍຍ່ອຍຂ້າມຊາຍແດນຂອງຫວຽດນາມ ບັນລຸ 80.000 ຕື້ດົ່ງໃນປີ 2022 ແລະ ຄາດວ່າຈະບັນລຸ 250.000 ຕື້ດົ່ງໃນປີ 2026. ທ່ານ Gijae Seong, CEO ຂອງ Amazon Global Selling Vietnam ໃຫ້ຮູ້ວ່າ: ຫວຽດນາມ ມີທ່າໄດ້ປຽບຫລາຍຢ່າງ ເພື່ອຊຸກຍູ້ການສົ່ງອອກທາງອອນລາຍ, ເຊັ່ນ ສິ່ງແວດລ້ອມ, ນະໂຍບາຍໜູນຊ່ວຍ, ກຳລັງການຜະລິດທີ່ອຸດົມສົມບູນ ແລະ ປະຊາຄົມຜູ້ຄ້າຂາຍເປັນຈຳນວນຫຼວງຫຼາຍ, ມີຄວາມຂະຫຍັນຂັນເຄື່ອນ.
ເພື່ອຕອບສະໜອງຄວາມຮຽກຮ້ອງຕ້ອງການ ທີ່ເພີ່ມຂຶ້ນຂອງການເຂົ້າຮ່ວມຕະຫຼາດສົ່ງອອກຜ່ານການຄ້າທາງອອນໄລ, ກະຊວງອຸດສາຫະກຳ ແລະ ການຄ້າ ຫວຽດນາມ ພວມສົມທົບກັບຫຼາຍເວທີປາໄສການຄ້າອອນໄລຂ້າມຊາດ ເພື່ອຈັດຕັ້ງບັນດາຊຸດຝຶກອົບຮົມ ແລະ ປະຕິບັດຕົວຈິງ ເພື່ອຍົກສູງທັກສະໃຫ້ບັນດາວິສາຫະກິດ, ນຳບັນດາຜະລິດຕະພັນທີ່ຜະລິດຢູ່ຫວຽດນາມ ອອກສູ່ໂລກ.
ການຄົ້ນຄວ້າຫຼ້າສຸດໂດຍ Access Partnership ສະແດງໃຫ້ເຫັນວ່າ ຍອດລາຍຮັບການສົ່ງອອກທາງອອນໄລຂອງ ຫວຽດນາມ ຈະບັນລຸເກືອບ 300.000 ຕື້ດົ່ງໃນປີ 2027 ຖ້າບັນດາວິສາຫະກິດພາຍໃນໄດ້ຮັບການໜູນຊ່ວຍຢ່າງຄົບຖ້ວນ ແລະ ຍູ້ໄວອັດຕານຳໃຊ້ການຄ້າເອເລັກໂຕນິກເພື່ອສົ່ງອອກ.
ຄຳຮຸ່ງ
