| ຫວຽດນາມ ໜຶ່ງໃນບັນດາຄູ່ຮ່ວມມືສອງຝ່າຍສຳຄັນທີ່ສຸດຂອງ ອົດສະຕາລີ | |
| ສາດສະດາຈານ ອິນໂດເນເຊຍ ຕີລາຄາສູງຄວາມສາມາດບົ່ມຊ້ອນໃນການຮ່ວມມືກັບ ຫວຽດນາມ |
 |
| ທີ່ການເຮັດວຽກລະຫວ່າງສອງຝ່າຍ (ພາບ: MPI) |
ຫວຽດນາມ - Uzbekistan ຍັງມີຄວາມສາມາດບົ່ມຊ້ອນຫຼາຍຢ່າງໃນການຮ່ວມມືສອງຝ່າຍ
ວັນທີ 6 ກຸມພາ, ຢູ່ຮ່າໂນ້ຍ, ໃນການຕ້ອນຮັບລັດຖະມົນຕີກະຊວງການລົງທຶນ, ອຸດສາຫະກຳ ແລະ ການຄ້າ Uzbekistan Laziz Kudratov, ທ່ານລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ຫງວຽນຈິຢຸງ ຢັ້ງຢືນສອງປະເທດພວມມີຫຼາຍຄວາມສາມາດບົ່ມຊ້ອນ, ກາລະໂອກາດເພື່ອຍົກລະດັບວົງເງິນການຄ້າການລົງທຶນສອງສົ້ນ ກໍ່ຄືການລົງທຶນໂດຍກົງໃຫ້ຫຼາຍກວ່າອີກ.
ທີ່ການພົບປະ, ທ່ານລັດຖະມົນຕີ ຫງວຽນຈີຢຸງ ໄດ້ຕີລາຄາສູງການພົວພັນຮ່ວມມືລະຫວ່າງ ຫວຽດນາມ ແລະ Uzbekistan. ເຖິງຢ່າງໃດກໍຕາມ, ມາຮອດປະຈຸບັນ, ໝາກຜົນຂອງການຮ່ວມມືດ້ານການລົງທຶນຍັງບໍ່ທັນແທດເໝາະກັບຄວາມສາມາດບົ່ມຊ້ອນທີ່ມີຢູ່ແລ້ວກໍ່ຄືຄວາມປາດຖະໜາຂອງ 2 ປະເທດ.
ທ່ານລັດຖະມົນຕີ ຫງວຽນຈິຢຸງ ເນັ້ນໜັກວ່າ 2 ປະເທດມີຄວາມສາມາດບົ່ມຊ້ອນ ແລະ ກາລະໂອກາດຫຼາຍຢ່າງ ເພື່ອເພີ່ມທະວີວົງເງິນການຄ້າການລົງທຶນສອງສົ້ນ ກໍ່ຄືການລົງທຶນໂດຍກົງໃຫ້ຫຼາຍກວ່າອີກ.ເພື່ອປະຕິບັດໄດ້ສິ່ງນີ້, ບັນດາອົງການທີ່ກ່ຽວຂ້ອງຂອງສອງປະເທດຕ້ອງເພີ່ມທະວີການສົນທະນາ, ເກັບກຳຂໍ້ມູນຂ່າວສານ, ຄວາມສາມາດ ແລະ ຄວາມຕ້ອງການເພື່ອມີມາດຕະການ, ຮູບແບບການຮ່ວມມື, ແບ່ງປັນ ແລະ ສົມທົບກັນຢ່າງແໜ້ນແຟ້ນ; ພິເສດແມ່ນບົດບາດຂອງສະຖານທູດຂອງສອງປະເທດ, ຈັດຕັ້ງການເຄື່ອນໄຫວເພື່ອໃຫ້ວິສາຫະກິດຂອງສອງປະເທດມີໂອກາດຊອກຫາກາລະໂອກາດຮ່ວມມືດ້ານການຄ້າ ແລະ ການລົງທຶນ, ຮ່ວມມືນຳກັນ, ນຳມາເຊິ່ງຜົນປະໂຫຍດໃຫ້ແກ່ສອງຝ່າຍ.
ທ່ານລັດຖະມົນຕີ Laziz Kudratov ສະແດງຄວາມຫວັງຢາກເພີ່ມທະວີການເຊື່ອມຕໍ່ວິສາຫະກິດສອງປະເທດ, ສ້າງໜ່ວຍປະຕິບັດງານລວມເພື່ອຍົກອອກວິທີການແກ້ໄຂເຊື່ອມຕໍ່ການຄ້າ, ພັດທະນາບັນດາຂະແໜງທີ່ເປັນທ່າແຮງຂອງສອງປະເທດຄື: ຕ່ຳແຜ່ນຕັດຫຍິບ, ກໍ່ສ້າງ, ເຄມີ, ແຮ່ທາດ, ຊອກຫາກາລະໂອກາດຮ່ວມມືໃນອະນາຄົດ.
ໂດຍເຫັນດີກັບຄຳເຫັນຕີລາຄາ, ຂໍ້ສະເໜີຂອງ ທ່ານລັດຖະມົນຕີ Laziz Kudratov, ທ່ານລັດຖະມົນຕີ ຫງວຽນຈີຢຸງ ຖືວ່າ Uzbekistan ມີຄວາມສາມາດບົ່ມຊ້ອນ, ທ່າໄດ້ປຽບຫຼາຍຢ່າງ ແລະ ຫວຽດນາມ ກໍ່ມີຄວາມສາມາດບົ່ມຊ້ອນເພື່ອໜູນຊ່ວຍ, ເພີ່ມເຕີມ, ຮ່ວມມື, ແບ່ງປັນນຳກັນ. ເຖິງຢ່າງໃດກໍ່ຕາມ, ລະຫວ່າງສອງລັດຍັງບໍ່ມີເສັ້ນທາງບິນໂດຍກົງ, ການແລກປ່ຽນສິນຄ້າສ່ວນຫຼາຍແມ່ນຂົນສົ່ງທາງທະເລ ດ້ວຍລາຄາສູງ, ພູມີສາດຂອງ Uzbekistan ພັດບໍ່ໃກ້ກັບທ່າກຳປັ່ນໃຫຍ່. ດັ່ງນັ້ນ, ສອງປະເທດຕ້ອງຊອກຫາວິທີການເໝາະສົມເພື່ອຊຸກຍູ້ການຄ້າ ແລະ ການລົງທຶນເພື່ອເສີມຂະຫຍາຍໄດ້ຄວາມສາມາດບົ່ມຊ້ອນ ແລະ ທ່າໄດ້ປຽບຂອງທັງສອງປະເທດຢ່າງສຸດຂີດ.
ພ້ອມກັນນັ້ນ, ສອງຝ່າຍຕ້ອງສຳຫຼວດກວດກາຄືນບັນດາລະບຽບການລົງທຶນ, ເສີມຂະຫຍາຍກົນໄກຄະນະກຳມະການລະຫວ່າງລັດຖະບານສອງປະເທດ ເພື່ອຄົ້ນຫາ, ຜັນຂະຫຍາຍບັນດາເນື້ອໃນລະອຽດຂອງຄະນະກຳມະການນີ້, ຈັດຕັ້ງບັນດາການເຄື່ອນໄຫວເພື່ອແລກປ່ຽນ, ກຳແໜ້ນຂໍ້ມູນ, ຊອກຫາກາລະໂອກາດການລົງທຶນ. ຈາກນັ້ນ, ກໍ່ຜັນຂະຫຍາຍບັນດາເນື້ອໃນລະອຽດ, ນຳມາເຊິ່ງປະສິດທິຜົນຢ່າງແທດຈິງ.
ບຸນຄົງ
