 |
| ທ່ານເອກອັກຄະລັດຖະທູດ ດັ້ງຮວ່າງຢາງ, ຫົວໜ້າຄະນະຜູ້ຕາງໜ້າ ຫວຽດນາມ (ພາບ: TTXVN) |
ຫວຽດນາມ ແລະ Trinidad & Tobago ສ້າງຕັ້ງການພົວພັນທາງການທູດ
ວັນທີ 1 ກຸມພາ, ທີ່ສຳນັກງານຄະນະຜູ້ຕາງໜ້າ ຫວຽດນາມ ປະຈຳ ສປຊ ຢູ່ ນິວຢອກ, ອາເມລິກາ, ທ່ານເອກອັກຄະລັດຖະທູດ ດັ້ງຮວ່າງຢາງ, ຫົວໜ້າຄະນະຜູ້ຕາງໜ້າ ຫວຽດນາມ ແລະ ທ່ານເອກອັກຄະລັດຖະທູດ Dennis Francis, ຫົວໜ້າຄະນະຜູ້ຕາງໜ້າ Trinidad & Tobago ປະຈຳ ສປຊ ໄດ້ເຊັນ “ແຈ້ງການຮ່ວມວ່າດ້ວຍການສ້າງຕັ້ງການພົວພັນທາງການທູດ ລະຫວ່າງ ປະເທດ ສສ.ຫວຽດນາມ ແລະ ສ. Trinidad & Tobago”.
ດ້ວຍການສ້າງຕັ້ງການພົວພັນທາງການທູດກັບ Trinidad & Tobago, ປັດຈຸບັນ ຫວຽດນາມ ມີການພົວພັນທາງການທູດຢ່າງເປັນທາງການກັບ 36 ປະເທດ ທະວີບອາເມລິກາ ແລະ 192 ປະເທດ ໃນໂລກ, ຜ່ານນັ້ນ ກໍ່ສືບຕໍ່ສະແດງໃຫ້ເຫັນນະໂຍບາຍການຕ່າງປະເທດທີ່ຫັນເປັນຫຼາຍຮູບແບບ, ຫັນການພົວພັນສາກົນເປັນ ຫຼາຍຝ່າຍ, ຖືການພັດທະນາການພົວພັນກັບພາກພື້ນອາເມລິກາ ລາຕິນ ແລະ Caribbean ເປັນສຳຄັນ.
ເນື່ອງໃນໂອກາດນີ້, ທ່ານເອກອັກຄະລັດຖະທູດ ດັ້ງຮວ່າງຢາງ ໄດ້ມີການແລກປ່ຽນກັບທ່ານເອກອັກຄະລັດຖະທູດ Dennis Francis Smith ກ່ຽວກັບບັນດາມາດຕະການຊຸກຍູ້ກາຮ່ວມມືລະຫວ່າງສອງປະເທດ. ສອງຝ່າຍໄດ້ສະແງດຄວາມຊົມເຊີຍຕໍ່ການສ້າງຕັ້ງການພົວພັນທາງການທູດລະຫວ່າງ ຫວຽດນາມ ແລະ Trinidad & Tobago ຢ່າງເປັນທາງການ, ຢັ້ງຢືນວ່າ ນີ້ແມ່ນບາດກວ້າທີ່ເປັນໜ້າຈົດຈຳ, ເປີດການພົວພັນຮ່ວມມືໃນຫຼາຍດ້ານລະຫວ່າງສອງປະເທດ.
ທ່ານເອກອັກຄະລັດຖະທູດ Dennis Francis Smith ກໍ່ໃຫ້ຮູ້ວ່າ Trinidad & Tobago ແມ່ນປະເທດເກາະທີ່ມີຄວາມສາມາດດ້ານເສດຖະກິດຢ່າງແຮງດ້ວຍ GDP ຢືນຢູ່ອັນດັບທີ 3 ຂອງພາກພື້ນ Caribe, ພ້ອມທັງສະແດງຄວາມປະທັບໃຈຕໍ່ປະຫວັດສາດອັນອົງອາດກ້າຫານກໍ່ຄືຜົນສຳເລັດໃນການກໍ່ສ້າງ ແລະ ພັດທະນາຂອງ ຫວຽດນາມ. ທ່ານ Dennis Francis Smith ໄດ້ຕີລາຄາຄວາມສາມາດບົ່ມຊ້ອນໃນການຮ່ວມມືລະຫວ່າງສອງປະເທດ, ເນັ້ນໜັກວ່າ Trinidad & Tobago ໄດ້ຮ່ວມມືກັບ ຫວຽດນາມ ໃນຂົງເຂດຫຼາຍຝ່າຍຂອງ ສປຊ ແລະ ປັດຈຸບັນແມ່ນມຸ່ງໄປເຖິງການພົວພັນຮ່ວມມືສອງຝ່າຍກັບ ຫວຽດນາມ, ດ້ວຍວິໄສທັດທີ່ຄ້າຍຄືກັນຫຼາຍຢ່າງໃນຫຼາຍຂົງເຂດ, ໃນນັ້ນມີການຮ່ວມມືດ້ານວັດທະນະທຳ, ການພົວພັນແລກປ່ຽນປະຊາຊົນ, ກະສິກຳ, ການປະມົງ, ພະລັງງານ, ເຕັກນິກ ແລະ ການທ່ອງທ່ຽວ…
ເພາະສະນັ້ນ, ການສ້າງຕັ້ງການພົວພັນທາງການທູດກັບປະເທດທີ່ສ້າງຄວາມເຂັ້ມແຂງດ້ວຍຕົນ, ຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈຄື ຫວຽດນາມ ແມ່ນຂີດໝາຍພົ້ນເດັ່ນໃນນະໂຍບາຍການທູດຂອງ Trinidad & Tobago. ບົນພື້ນຖານນັ້ນ, ເອກອັກຄະລັດຖະທູດສອງປະເທດເຫັນດີເປັນເອກະພາບສືບຕໍ່ແບ່ງປັນຂໍ້ມູນເພື່ອຊອກຫາບັນດາທ່າແຮງ ແລະ ຄວາມສາມາດບົ່ມຊ້ອນໃນການຮ່ວມມືລະຫວ່າງສອງປະເທດ, ພິເສດແມ່ນໃນຂົງເຂດຂຸດຄົ້ນນ້ຳມັນອາຍແກັດ, ການທ່ອງທ່ຽວ ແລະ ກະສິກຳ. ເອກອັກຄະລັດຖະທູດສອງຝ່າຍກໍ່ຢັ້ງຢືນຈະເພີ່ມທະວີການສົມທົບກັນຢ່າງແໜ້ນແຟ້ນຢູ່ ສປຊ ແລະ ບັນດາເວທີປາໄສຫຼາຍຝ່າຍຕ່າງໆ.
ບຸນຄົງ
