 |
| ທ່ານນາຍົກລັດຖະມົນຕີ ຟ້າມມິງຈິງ ແລະ ທ່ານ ບໍວຽງຄຳ ວົງດາລາ ປະທານສະມາຄົມມິດຕະພາບ ລາວ - ຫວຽດນາມ (ພາບ: TTXVN) |
ໃນຂອບເຂດການຢ້ຽມຢາມ ປະເທດ ສປປ.ລາວ ຢ່າງເປັນທາງການ, ຕອນບ່າຍວັນທີ 11 ມັງກອນ, ທ່ານນາຍົກລັດຖະມົນຕີ ຟ້າມມິງຈິງ ໄດ້ໃຫ້ການຕ້ອນຮັບທ່ານ ບໍວຽງຄຳ ວົງດາລາ ປະທານສະມາຄົມມິດຕະພາບ ລາວ - ຫວຽດນາມ ພ້ອມກັບຄະນະບໍລິຫານງານສະມາຄົມມິດຕະພາບ ລາວ - ຫວຽດນາມ ເນື່ອງໃນໂອກາດເຂົ້າຢ້ຽມຂ່ຳນັບ.
ທ່ານນາຍົກລັດຖະມົນຕີ ຟ້າມມິງຈິງ ເນັ້ນໜັກວ່າ ສອງປະເທດ, ສອງຊາດ ຫວຽດນາມ - ລາວ ມີການພົວພັນມິດຕະພາບທີ່ເປັນມູນເຊື້ອແບບພິເສດ, ນ້ຳໃຈບໍລິສຸດຜຸດຜ່ອງ ແລະ ຍາມໃດກໍ່ໜູນຊ່ວຍເຊິ່ງກັນແລະກັນໃນພາລະກິດແຫ່ງການຕໍ່ສູ້ປົດປ່ອຍຊາດ ໃນເມື່ອກ່ອນ ກໍ່ຄືໃນໄລຍະສ້າງສາ, ພັດທະນາ ແລະ ປົກປັກຮັກສາປະເທດຊາດໃນປັດຈຸບັນ.
ທ່ານນາຍົກລັດຖະມົນຕີ ຕີລາຄາສູງໝາກຜົນການຮ່ວມມືລະຫວ່າງສອງສະມາຄົມມິດຕະພາບ ຫວຽດນາມ - ລາວ, ລາວ - ຫວຽດນາມ ໃນໄລຍະຜ່ານມາ, ພິເສດແມ່ນໃນປີສາມັກຄີມິດຕະພາບ 2022, ໄດ້ປະກອບສ່ວນເຂົ້າໃນການໂຄສະນາ, ສຶກສາ, ຊຸກຍູ້ການພົບປະແລກປ່ຽນປະຊາຊົນ, ຍົກສູງຄວາມຮັບຮູ້ຂອງປະຊາຊົນສອງປະເທດກ່ຽວກັບມູນເຊື້ອການພົວພັນແບບພິເສດຫວຽດນາມ ແລະ ລາວ
ທ່ານນາຍົກລັດຖະມົນຕີ ຟ້າມມິງຈິງ ກໍ່ສະແດງຄວາມຊົມເຊີຍຕໍ່ບັນດາການເຄື່ອນໄຫວພົ້ນເດັ່ນຂອງສະມາຄົມມິດຕະພາບ ລາວ - ຫວຽດນາມ ໃນປີຜ່ານມາ, ທ່ານສະເໜີສ້າງບັນດາໜ່ວຍສະມາຄົມມິດຕະພາບ ຢູ່ບັນດາທ້ອງຖິ່ນ, ພ້ອມທັງສືບຕໍ່ມີບັນດາຮູບການພົບປະແລກປ່ຽນໃໝ່, ລະອຽດແມ່ນປະດິດຄິດສ້າງເພື່ອແນໃສ່ປະກອບສ່ວນເຂົ້າໃນການປັບປຸງ ແລະ ເພີ່ມທະວີການພົວພັນມິດຕະພາບອັນຍິ່ງໃຫຍ່ ແລະ ຄວາມສາມັກຄີແບບພິເສດລະຫວ່າງປະຊາຊົນສອງປະເທດ.
ທ່ານປະທານສະມາຄົມມິດຕະພາບ ລາວ - ຫວຽດນາມ ບໍວຽງຄຳ ວົງດາລາ ສະແດງຄວາມຍິນດີ ແລະ ເປັນກຽດທີ່ໄດ້ເຂົ້າຢ້ຽມຂ່ຳນັບທ່ານນາຍົກລັດຖະມົນຕີ ຟ້າມມິງຈິງ, ທ່ານກໍ່ຢັ້ງຢືນວ່າ ຍາມໃດກໍ່ຈາລຶກ ແລະ ສະແດງຄວາມຮູ້ບຸນຄຸນຕໍ່ການຊ່ວຍເຫຼືອອັນລ້ຳຄ່າຂອງພັກ, ລັດ, ລັດຖະບານ ແລະ ປະຊາຊົນ ຫວຽດນາມ ທີ່ສະຫງວນໃຫ້ແກ່ລາວ ໃນພາລະກິດແຫ່ງການຕໍ່ສູ້ປົດປ່ອຍຊາດ ໃນເມື່ອກ່ອນ ແລະ ໃນວິວັດການພັດທະນາ, ສ້າງສາປະເທດຊາດໃນປັດຈຸບັນ, ທ່ານກໍ່ໃຫ້ຮູ້ວ່າ ສອງສະມາຄົມມິດຕະພາບ ໄດ້ຈັດຕັ້ງຫຼາຍການເຄື່ອນໄຫວທີ່ມີຄວາມໝາຍຫຼາຍຢ່າງໃນປີສາມັກຄີມິດຕະພາບ ລາວ ຫວຽດນາມ, ຫວຽດນາມ ລາວ 2022 ຄື ແລກປ່ຽນຄະນະຜູ້ແທນ, ຈັດຕັ້ງງານວາງສະແດງກ່ຽວກັບປະຫວັດສາດການພົວພັນ, ຈັດຕັ້ງການປະກວດບົດກອນ ແລະ ບົດຂຽນ, ຍ້ອງຍໍສັນລະເສີນສ່ວນບຸກຄົນທີ່ມີການປະກອບສ່ວນຫຼາຍຢ່າງໃຫ້ແກ່ສະມາຄົມ.
ທ່ານປະທານສະມາຄົມມິດຕະພາບ ລາວ - ຫວຽດນາມ ໄດ້ເນັ້ນໜັກວ່າ ສະມາຄົມຍາມໃດກໍ່ຖືເປັນສຳຄັນການໂຄສະນາໃຫ້ແກ່ປະຊາຊົນລາວ ພິເສດແມ່ນຊາວໜຸ່ມ, ມີການຮັບຮູ້ຢ່າງຈະແຈ້ງກ່ຽວກັບການພົວພັນມິດຕະພາບອັນຍິ່ງໃຫຍ່, ນ້ຳໃຈສະມັກຄີ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ລາວ - ຫວຽດນາມ. ທ່ານສະແດງຄວາມຫວັງຈະມານະພະຍາຍາມເຮັດຈົນສຸດຄວາມສາມາດຂອງຕົນເພື່ອຮັກສາ ແລະ ເພີ່ມພູນຄູນສ້າງໃຫ້ແກ່ການພົວພັນສາມັກຄີ - ມິດຕະພາບ ລາວ - ຫວຽດນາມ ໃຫ້ຍືນຍົງຄົງຕົວຊົ່ວກາລະນານ.
ບຸນຄົງ
