ໂຄສະນາເຜີຍແພ່ວັດທະນະທຳ ແລະ ທ່ອງທ່ຽວຫວຽດນາມ ຢູ່ ມາເລເຊຍ

08:19 | 07/10/2022

ຍສໝ - ກອງປະຊຸມສຳມະນາແນະນຳວັດທະນະທຳ ແລະ ທ່ອງທ່ຽວຫວຽດນາມ ຢູ່ Kuala Lumpur ແມ່ນກິດຈະກຳສົ່ງເສີມການທ່ອງທ່ຽວຄັ້ງທຳອິດ ໂດຍສະຖານທູດ ຈັດພາຍຫຼັງໂລກລະບາດໂຄວິດ-19.

	ຈຸດວັດທະນະທຳ ແລະການທ່ອງທ່ຽວຫວຽດນາມ ໄດ້ສ້າງຄວາມປະທັບໃຈທີ່ເຫດການໂຄສະນາເຜີຍແຜ່ວັດທະນະທຳສິລະປະມາເລເຊຍ
	Google ໂຄສະນາວັດທະນະທໍາ ແລະ ການທ່ອງທ່ຽວຫວຽດນາມ

ເຂົ້າຮ່ວມງານ ມີທ່ານນາງ Cynthia Tan ຮອງປະທານ MATTA ແລະ ຜູ້ຕາງໜ້າບໍລິສັດທ່ອງທ່ຽວມາເລເຊຍ 100 ແຫ່ງ; ປະທານ VNTE, ຜູ້ອໍານວຍການບໍລິສັດທ່ອງທ່ຽວ Nhat Dong Duong, ທ່ານ ຫງວຽນເຊີນຖຸຍ ແລະ ປະມານ 20 ບໍລິສັດທ່ອງທ່ຽວຫວຽດນາມ; ທ່ານນາງ ເຈິ່ນທິຈາງ, ປະທານສະມາຄົມມິດຕະພາບມາເລເຊຍ-ຫວຽດນາມ; ຜູ້ຕາງໜ້າສະມາຄົມວິສາຫະກິດມາເລເຊຍ - ຫວຽດນາມ ແລະ ເພື່ອນມິດທ້ອງຖິ່ນເປັນຈຳນວນຫຼວງຫຼາຍ.

ໂຄສະນາເຜີຍແພ່ວັດທະນະທຳ ແລະ ທ່ອງທ່ຽວຫວຽດນາມ ຢູ່ມາເລເຊຍ.

ໃນການພົບປະ ແລະ ປຶກສາຫາລືກັບບັນດາຄູ່ຮ່ວມມືກ່ອນການຈັດງານ, ທ່ານເອກອັກຄະລັດຖະທູດ ເຈີ່ນຫວຽດທາຍ ຊີ້ແຈ້ງວ່າ: ກອງປະຊຸມສຳມະນາບໍ່ພຽງແຕ່ແນະນຳວັດທະນະທຳ, ປະເທດຊາດ ແລະ ປະຊາຊົນ ຫວຽດນາມ ເທົ່ານັ້ນ, ຫາກຍັງແບ່ງປັນບັນດາຂໍ້ມູນຂ່າວສານໃໝ່ ກ່ຽວກັບຂໍ້ກຳນົດການເຂົ້າເມືອງຫວຽດນາມ, ເພື່ອດຶງດູດຊາວຕ່າງປະເທດເວົ້າລວມ ແລະ ຊາວມາເລເຊຍ ເວົ້າສະເພາະ ໃຫ້ມາຢ້ຽມຢາມຫວຽດນາມ. ພິເສດ, ເຫດການຍັງແມ່ນໂອກາດເພື່ອໃຫ້ບັນດາວິສາຫະກິດຂອງສອງປະເທດເຊື່ອມໂຍງ ແລະ ລົງນາມໃນສັນຍາຮ່ວມມືດ້ານການທ່ອງທ່ຽວ, ຜ່ານນັ້ນ ກໍຊ່ວຍຟື້ນຟູຂະແໜງທ່ອງທ່ຽວຂອງ 2 ປະເທດ, ຮັດແໜ້ນສາຍພົວພັນອັນດີງາມ ຫວຽດນາມ - ມາເລເຊຍ.

ກ່າວຄຳເຫັນທີ່ພິທີ, ທ່ານນາງຮອງປະທານປະເທດ MATTA Cynthia Tan ໄດ້ສະແດງຄວາມຊົມເຊີຍ ຕໍ່ຄວາມງາມຂອງປະເທດຊາດ ແລະ ປະຊາຊົນ ຫວຽດນາມ, ກໍ່ຄືບັນດາຜົນງານການພັດທະນາເຊິ່ງ ຫວຽດນາມ ບັນລຸໄດ້ໃນຊຸມປີຜ່ານມາ. ທ່ານນາງໃຫ້ຮູ້ວ່າ ລາວມີຄວາມປະທັບໃຈເປັນພິເສດ ຕໍ່ບັນດາຫາດຊາຍທະເລທີ່ຍາວ ແລະ ສວຍງາມຢູ່ນະຄອນ ຍາຈາງ ແລະ ຝູ໋ກວກ, ຫວັງວ່າ ຄຽງຄູ່ກັບການຕັດສິນໃຈເປີດເສັ້ນທາງໂດຍກົງ ຈາກ Kuala Lumpur ໄປຫາ ດ່າໜັງ, ນັກທ່ອງທ່ຽວຈາກມາເລເຊຍ ໄປຍັງ ຫວຽດນາມ ຈະເພີ່ມຂຶ້ນ. ທ່ານນາງຢືນຢັນວ່າ ໃນໄລຍະຈະມາເຖິງ, MATTA ຈະຊຸກຍູ້ການຂຸດຄົ້ນຕະຫຼາດທ່ອງທ່ຽວຫວຽດນາມ ຢ່າງມີປະສິດທິຜົນ ໂດຍຜ່ານບັນດາຕົວແທນຂອງ MATTA ທີ່ມີຢູ່ 13 ລັດຂອງມາເລເຊຍ.

ຕາງໜ້າໃຫ້ VNTE, ທ່ານ ຫງວຽນເຊີນຖຸຍ ກໍ່ສະແດງຄວາມເປັນກຽດທີ່ໄດ້ຮ່ວມມືກັບສະຖານທູດເພື່ອຈັດຕັ້ງກອງປະຊຸມສຳມະນາ. ທ່ານກ່າວວ່າ ດ້ວຍການອັບເດດໃໝ່ກ່ຽວກັບບັນດາຜະລິດຕະພັນທ່ອງທ່ຽວທີ່ເໝາະສົມກັບຕະຫຼາດມາເລເຊຍ, ຫວຽດນາມ ຈະມີກາລະໂອກາດເປີດກວ້າງການຮ່ວມມື, ຄົ້ນຫາຕະຫຼາດທີ່ມີຫຼາຍຈຸດະິເສດຄືມາເລເຊຍ.

ທີ່ເຫດການ, ແຂກທ່ອງທ່ຽວໄດ້ຊົມການສະແດງລາຍການສິລະປະເຊັ່ນ: ການຟ້ອນ “ຫວຽດນາມ ບ້ານເກີດຂອງຂ້າພະເຈົ້າ”, “ສະບາຍດີ ຫວຽດນາມ” ສະແດງ ໂດຍຊາວຫວຽດນາມ ອາໄສຢູ່ ມາເລເຊຍ; ເບິ່ງຮູບເງົາກ່ຽວກັບຄວາມງາມ ແລະ ອາຫານການກິນຂອງຫວຽດນາມ ກໍ່ຄືບັນດາເຂດທ່ອງທ່ຽວທີ່ມີຊື່ສຽງທີ່ສຸດຂອງຫວຽດນາມ.

ບັນດາຜູ້ແທນ ໄດ້ຖ່າຍຮູບທີ່ລະນຶກ.

ນັບແຕ່ສອງປະເທດໄດ້ຍົກເວັ້ນວີຊາສຳລັບຜູ້ຖືໜັງສືຜ່ານແດນທຳມະດາໃນເດືອນກັນຍາປີ 2001 ແລະ ປັບປຸງການເຊື່ອມຕໍ່ທາງອາກາດ, ຈຳນວນນັກທ່ອງທ່ຽວມາເລເຊຍ ໄປຍັງ ຫວຽດນາມ ໄດ້ເພີ່ມຂຶ້ນຢ່າງວ່ອງໄວ. ປີ 2019, ນັກທ່ອງທ່ຽວມາເລເຊຍໄປຫວຽດນາມບັນລຸ 605.000 ກວ່າເທື່ອຄົນ, ເພີ່ມຂຶ້ນ 12,2% ເມື່ອທຽບໃສ່ປີ 2018.

ຄຳຮຸ່ງ