 |
| ບັນດາຜູ້ແທນເຂົ້າຮ່ວມເວທີປາໄສ |
ເວທີປາໄສດັ່ງກ່າວແມ່ນເຫດການທີ່ຈັດແບບເຊິ່ງໜ້າທຳອິດເພື່ອແນໃສ່ຜັນຂະຫຍາຍຂໍ້ຕົກລົງການຮ່ວມມືລະຫວ່າງເຂດ Flanders ແລະ ຄະນະກຳມະການແມ່ນ້ຳຂອງສາກົນ ພາຍຫຼັງ 2 ປີທີ່ຖືກຂາດວັກຂາດຕອນ ຍ້ອນພະຍາດໂຄວິດ - 19. ຢູ່ກອງປະຊຸມຄັ້ງທີ 27 ຂອງ ສະພາຄະນະກຳມະການແມ່ນ້ຳຂອງ ສາກົນ (ເດືອນພະຈິກ 2020), ເຂດ Flanders ໄດ້ກາຍເປັນຄູ່ຮ່ວມມືພັດທະນາຂອງ MRC ຢ່າງເປັນທາງການ ແລະ ໄດ້ລົງນາມຂໍ້ຕົກລົງໜູນຊ່ວຍໂຄງການຮ່ວມມືທີ່ມີມູນຄ່າ 1,1 ລ້ານ ເອີໂຣ (1,07 ລ້ານ USD) ໃນໄລຍະ 2021 – 2025.
ເຂົ້າຮ່ວມເວທີປາໄສມີ ທ່ານເລຂາທິການໃຫຍ່ອົງການການທູດ ເຂດ Flanders, Julie Bynens; ເອກອັກຄະລັດຖະທູດປະເທດ ກຳປູເຈຍ, ລາວ, ຫວຽດນາມ ແລະ ໄທ ປະຈຳ ແບນຊິກ, ຜູ້ອຳນວຍການຄະນະກຳມະການແມ່ນ້ຳຂອງສາກົນ Anoulak Kitthikhoun, ພ້ອມກັບຜູ້ຕາງໜ້າບັນດາອົງການ, ວິສາຫະກິດ ແລະ ສະຖາບັນຄົ້ນຄ້ວາຂອງແບນຊິກ ຈຳນວນໜຶ່ງ.
 |
 |
ທີ່ເວທີປາໄສ, ບັນດາຜູ້ແທນໄດ້ສຸມໃສ່ແລກປ່ຽນບັນດາທິດທາງເພີ່ມທະວີການຮ່ວມມືລະຫວ່າງພາກພື້ນ Flanders ແລະ ພາກພື້ນແມ່ນ້ຳຂອງ ໃນການຄຸ້ມຄອງແຫຼ່ງນ້ຳ ພ້ອມທັງຊອກຫາວິທີຮັບມືບັນດາສິ່ງທ້າທາຍລວມທີ່ກ່ຽວຂ້ອງເຖິງການປ່ຽນແປງຂອງດິນຟ້າອາກາດ, ນ້ຳຖ້ວມ, ໄພແຫ້ງແລ້ງ ແລະ ການຄົມມະນາຄົມ. ຫຼາຍບໍລິສັດທີ່ສະຫນອງການແກ້ໄຂເຕັກໂນໂລຢີ Flanders ໄດ້ສະແດງຄວາມສົນໃຈ ແລະ ປາຖະຫນາທີ່ຈະເຊື່ອມຕໍ່ເພື່ອຊອກຫາໂອກາດການຮ່ວມມື ແລະ ການລົງທຶນໃຫມ່.
ກ່າວຄຳເຫັນທີ່ເວທີປາໄສ, ທ່ານເອກອັກຄະລັດຖະທູດຫວຽດນາມ ປະຈຳ ແບນຊິກ ຫງວຽນວັນຖາວ ໄດ້ສະແດງຄວາມກຽມພ້ອມຢາກສົມທົບກັນຊຸກຍູ້ການຮ່ວມມືລະຫວ່າງເຂດ Flanders ກັບພາກພື້ນແມ່ນ້ຳຂອງ ບົນຈິດໃຈຮ່ວມມືຕ່າງຝ່າຍຕ່າງມີຜົນປະໂຫຍດ. ທ່ານເອກອັກຄະລັດຖະທູດໄດ້ແບ່ງປັນບັນດາສິ່ງທ້າທາຍທີ່ພາກພື້ນພວມປະເຊີນໜ້າຄື: ຜົນກະທົບຈາກການປ່ຽນແປງຂອງດິນຟ້າອາກາດ, ໄພນ້ຳຖ້ວມ, ໄພແຫ້ງແລ້ງ, ລະດັບນ້ຳທະເລຍຶ່ງຂຶ້ນ, ນ້ຳທະເລຊືມເຂົ້າເຂດດິນ, ການຂາດວັກຂາດຕອນຂອງຕ່ອງໂສ້ການສະໜອງ. ທ່ານເອກອັກຄະລັດຖະທູດສະເໜີການຮ່ວມມື Flanders - ແມ່ນ້ຳຂອງ ໂດຍສຸມໃສ່ສອງຂົງເຂດຄຸ້ມຄອງແຫຼ່ງນ້ຳຂ້າມຊາຍແດນ ແລະ ພັດທະນາກະສິກຳເຕັກໂນໂລຢີສູງທີ່ສາມາດປັບຕົວເຂົ້າກັບການປ່ຽນແປງຂອງດິນຟ້າອາກາດ.
 |
 |
ບົນພື້ນຖານບັນດາທ່າແຮງຂອງພາກພື້ນ Flanders, ທ່ານເອກອັກຄະລັດຖະທູດ ຫງວຽນວັນຖາວ ໄດ້ສະເໜີໃຫ້ເພີ່ມທະວີການແລກປ່ຽນປະສົບການ, ບຳລຸງສ້າງແຫຼ່ງຊັບພະຍາກອນມະນຸດ ແລະ ຖ່າຍທອດບັນດາເຕັກໂນໂລຢີແບບຢ່າງຂອງເຂດ Flanders ຄື: ການເກັບຄວາມເຢັນອັດສະລິຍະ ເພື່ອຮັບໃຊ້ໃຫ້ແກ່ການສົ່ງອອກຜະລິດຕະພັນກະເສດ, ຜະລິດໄຟຟ້າ ແລະ ນ້ຳສະອາດຈາກລົມ (water-by-wind), ກໍ່ສ້າງສູນຂົນສົ່ງ ແລະ ພື້ນຖານໂຄງລ່າງການຂົນສົ່ງທາງນໍ້າ.
ທ່ານເອກອັກຄະລັດຖະທູດເນັ້ນໜັກເຖິງການເພີ່ມທະວີການເຂົ້າຮ່ວມຂອງວິສາຫະກິດເພື່ອຜົນປະໂຫຍດລວມ. ທ່ານເອກອັກຄະລັດຖະທູດປາດຖະໜາວ່າ ການພົວພັນຄູ່ຮ່ວມມືຍຸດທະສາດ ຫວຽດນາມ - ແບນຊິກ ໃນຂົງເຂດກະສິກຳ ຈະປະກອບສ່ວນນຳມາເຊິ່ງບັນດາໝາກຜົນການຮ່ວມມືຢ່າງແທດຈິງ, ພິເສດແມ່ນໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ (1973 – 2023).
 |
ບຸນຄົງ
