ມອບໃບຍ້ອງຍໍໃຫ້ແກ່ສະມາຄົມຊາວຫວຽດນາມ ຢູ່ ສະວິດ

ຍສໝ - ຫວ່າງແລ້ວນີ້, ຢູ່ນະຄອນຫຼວງ Bern, ສະຖານທູດ ຫວຽດນາມ ປະຈຳ ສະວິດ ໄດ້ຈັດຕັ້ງພິທີສະເຫຼີມສະຫຼອງ 77 ປີແຫ່ງວັນຊາດ ສາທາລະນະລັດ ສັງຄົມນິຍົມ ຫວຽດນາມ (2/9/1945 – 2/9/2022) ແລະ ໄດ້ພົບປະກັບປະຊາຄົມຊາວ ຫວຽດນາມ ອາໄສຢູ່ ສະວິດ.

	ສານຊົມເຊີຍວັນຊາດ ສະຫະພັນ ສະວິດ
	ທ່ານລັດຖະມົນຕີການຕ່າງປະເທດ ບຸຍແທັງເຊີນ ຕ້ອນຮັບກິຕິມະສັກກົງສູນ ຫວຽດນາມ ຢູ່ສະວິດ Philipp Rosler

ມອບໃບຍ້ອງຍໍໃຫ້ແກ່ສະມາຄົມຊາວຫວຽດນາມ ຢູ່ ສະວິດ

ທ່ານເອກອັກຄະລັດຖະທູດຫວຽດນາມ ປະຈຳສະວິດ ຝຸ່ງເທລອງ (ພາບ: TTXVN)

ເຂົ້າຮ່ວມພິທີສະເຫຼີມສະຫຼອງມີທ່ານເອກອັກຄະລັດຖະທູດຫວຽດນາມ ປະຈຳສະວິດ ຝຸ່ງເທລອງ ແລະ ພັນລະຍາ; ທ່ານນາງເອກອັກຄະລັດຖະທູດ ເລທິຕວຽດມາຍ, ຫົວໜ້າຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ (ສປຊ), ອົງການການຄ້າໂລກ ແລະ ບັນດາອົງການຈັດຕັ້ງສາກົນອື່ນໆປະຈຳ Geneva; ຜູ້ຕາງໜ້າຄະນະບໍລິຫານງານສະມາຄົມຊາວ ຫວຽດນາມ ຢູ່ ສະວິດ, ສະມາຄົມນັກຊ່ຽວຊານດ້ານຄວາມຮູ້ຫວຽດນາມ ປະຈຳສະວິດ, ພະນັກງານຂອງຄະນະຜູ້ແທນ ຫວຽດນາມ, ເຈົ້າໜ້າທີ່ສະຖານທູດ ຫວຽດນາມ ແລະ ຄອບຄົວຊາວຫວຽດນາມ ອາໄສຢູ່ສະວິດ.

ຕາມສຳນັກຂ່າວສານຫວຽດນາມ ປະຈຳສະວິດ, ທີ່ພິທີ, ທ່ານເອກອັກຄະລັດຖະທູດ ຝຸ່ງເທລອງ ເນັ້ນໜັກວ່າ: 77 ປີກ່ອນ, ວັນທີ 2 ກັນຍາ 1945, ປະທານ ໂຮ່ຈີມິນ, ຜູ້ນຳທີ່ຍິ່ງໃຫຍ່ຂອງຫວຽດນາມ ໄດ້ອ່ານຖະແຫຼງການປະກາດເອກະລາດຢູ່ສະໜາມຫຼວງ ບາດິ່ງ - ຮ່າໂນ້ຍ, ເຊິ່ງແມ່ນເຫດການທີ່ເປັນຂີດໝາຍວັນສະຖາປະນາ ຫວຽດນາມ. ພາຍຫຼັງ 35 ປີແຫ່ງການ ປ່ຽນແປງໃໝ່, ຫວຽດນາມ ບັນລຸໄດ້ບັນດາຜົນງານອັນໃຫຍ່ຫຼວງທີ່ມີຄວາມໝາຍປະຫວັດສາດ. ດ້ວຍລະດັບເຕີບໂຕ GDP ສະເລ່ຍແຕ່ລະປີປະມານ 7%, ຫວຽດນາມ ໄດ້ຈັດອັນດັບເຂົ້າໃນ 40 ພື້ນຖານເສດຖະກິດທີ່ມີ GDP ໃຫຍ່ທີ່ສຸດໃນໂລກ ແລະ ໃນຈຳນວນ 16 ພື້ນຖານເສດຖະກິດທີ່ປະສົບຜົນສຳເລັດທີ່ສຸດ. ປີ 2022, ໃນສະພາບທີ່ເສດຖະກິດໂລກປະສົບກັບຄວາມຫຍຸ້ງຍາກຫຼາຍຢ່າງ, ອັດຕາເງິນເຟີ້ສູງ, ການເຕີບໂຕຕ່ຳ, ເສດຖະກິດຫວຽດນາມບັນລຸໄດ້ໝາກຜົນດີພໍສົມຄວນ, ອັດຕາເງິນເຟີ້ໄດ້ຮັບການຄວບຄຸມ, ເສດຖະກິດມະຫາພາກມີສະຖຽນລະພາບ, ມູນຄ່າການນຳເຂົ້າ ແລະ ສົ່ງອອກທັງໝົດຄາດວ່າຈະບັນລຸລະດັບສະຖິທິຕິ, ຫຼາຍກວ່າ 800 ຕື້ USD.

ກ່ຽວກັບການພົວພັນມິດຕະພາບທີ່ເປັນມູນເຊື້ອລະຫວ່າງຫວຽດນາມ ແລະ ສະວິດ, ທ່ານເອກອັກຄະລັດຖະທູດ ຝຸ່ງເທລອງ ຖືວ່າ ສະວິດ ແມ່ນຄູ່ຮ່ວມມືດ້ານການຄ້າທີ່ສຳຄັນຂອງ ຫວຽດນາມ ຢູ່ ເອີລົບ. ຕາມຂໍ້ມູນຂອງກົມພາສີ ສະວິດ ແລ້ວ, ວົງເງິນການນຳເຂົ້າ ແລະ ສົ່ງອອກລະຫວ່າງ ຫວຽດນາມ ແລະ ສະວິດ ໃນ 7 ເດືອນຕົ້ນປີ 2022 ບັນລຸກວ່າ 1,3 ຕື້ CHF, ເພີ່ມຂຶ້ນ 1,3% ເມື່ອທຽບໃສ່ໄລຍະດຽວກັນຂອງປີ 2021, ໃນນັ້ນວົງເງິນສົ່ງອອກຂອງ ຫວຽດນາມ ບັນລຸກວ່າ 1 ຕື້ CHF, ເພີ່ມຂຶ້ນ 4.1%. ປີ 2021, ຫວຽດນາມ ແມ່ນຄູ່ຮ່ວມມືການຄ້າໃຫຍ່ອັນດັບ 3 ຂອງສະວິດກ່ຽວກັບສິນທະເລ, ຖັດຈາກນອກແວ ແລະ ໂຮນລັງ. ໃນໄລຍະ 2021 – 2023, ສະວິດ ສືບຕໍ່ໃຫ້ບຸລິມະສິດໃຫ້ແກ່ການໜູນຊ່ວຍພັດທະນາດ້ວຍຈຳນວນ 70 ລ້ານ CHF ເພື່ອໜູນຊ່ວຍ ຫວຽດນາມ ໃນຂົງເຂດປົກປັກຮັກສາສິ່ງແວດລ້ອມ, ປະຕິຮູບເສດຖະກິດ, ບຳລຸງສ້າງພະນັງງານ, ປະກອບສ່ວນເພີ່ມທະວີກຳລັງແກ່ງແຍ້ງແຫ່ງຊາດ ແລະ ເຊື່ອມໂຍງເຂົ້າກັບເສດຖະກິດໂລກຢ່າງເລິກເຊິ່ງ.

ທ່ານເອກອັກຄະລັດຖະທູດ ຝຸ່ງເທລອງ ກໍ່ແບ່ງປັນວ່າ: ພິທີສະເຫຼີມສະຫຼອງນີ້ຍັງແມ່ນການເຄື່ອນໄຫວໃຫຍ່ທຳອິດພາຍຫຼັງທ່ານເອກອັກຄະລັດຖະທູດຄົນໃໝ່ໄດ້ຍື່ນສານຕາຕັ້ງຂອງທ່ານປະທານປະເທດ ຫງວຽນຊວນຟຸກ ໃຫ້ປະທານາທິບໍດີ Ignazio Cassis, ຮັບດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດ ສັງຄົມນິຍົມ ຫວຽດນາມ ປະຈຳ ສະວິດ ຢ່າງເປັນທາງການ. ທ່ານເອກອັກຄະລັດຖະທູດ ປາດຖະໜາຢາກສືບຕໍ່ໄດ້ຮັບການໜູນຊ່ວຍ, ການຮ່ວມມື ແລະ ການຊ່ວຍເຫຼືອຂອງປະຊາຄົມຊາວ ຫວຽດນາມ ຢູ່ ສະວິດ ເພື່ອປະຕິບັດໜ້າທີ່ຂອງຕົນໃນໄລຍະເຮັດວຽກຢູ່ ສະວິດ ໃຫ້ດີກ່ວາອີກ.

ເນື່ອງໃນໂອກາດນີ້, ທ່ານເອກອັກຄະລັດຖະທູດ ຝຸ່ງເທລອງ ໄດ້ມອບໃບຍ້ອງຍໍຂອງຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດ ໃຫ້ສະມາຄົມຊາວ ຫວຽດນາມ ຢູ່ ສະວິດ. ສະມາຄົມດັ່ງກ່າວໄດ້ຮັບການສ້າງຕັ້ງຂຶ້ນເພື່ອເຕົ້າໂຮມຊາວຫວຽດນາມທີ່ອາໄສ ແລະ ເຮັດວຽກຢູ່ສະວິດ, ປົກປ້ອງ ແລະ ນຳຜົນປະໂຫຍດມາໃຫ້ປະຊາຄົມຊາວ ຫວຽດນາມ ຢູ່ ສະວິດ, ໜູນຊ່ວຍຊາວ ຫວຽດນາມ ຢູ່ ສະວິດ ໃນຂະບວນການເຊື່ອມໂຍງ, ຮັກສາ ແລະ ເສີມຂະຫຍາຍສີສັນວັດທະນະທຳ ຫວຽດນາມ, ສ້າງກາລະໂອກາດໃຫ້ລຸ້ນໜຸ່ມມຸ່ງໜ້າເມືອຫາບ້ານເກີດເມືອງນອນ, ສ້າງຄວາມປະທັບໃຈອັນດີງາມຂອງປະຊາຄົມ ແລະ ປະເທດຫວຽດນາມ ຢູ່ ປະເທດປະຈຳຖິ່ນ ພ້ອມທັງນຳມາເຊິ່ງຜົນປະໂຫຍດໃຫ້ແກ່ປະເທດຊາດ ແລະ ປະຊາຊົນ ຫວຽດນາມ.

ໂດຍຕາງໜ້າໃຫ້ສະມາຄົມຮັບໃບຍ້ອງຍໍ, ເລຂາທິການສະມາຄົມຫວຽດນາມ ຢູ່ສະວິດ, ທ່ານນາງ ງອກຢຸງ Moser ໄດ້ແບ່ງປັນບັນດາຄວາມຊົງຈຳໃນ 12 ປີທີ່ເຮັດວຽກກັບສະມາຄົມຊາວຫວຽດນາມ ຢູ່ສະວິດ, ພ້ອມກັບຄວາມຮູ້ສຶກຫັນກັບເມືອຫາບ້ານເກີດເມືອງນອນຂອງຕົນໃນໄລຍະເວລາເກືອບເຄິ່ງສະຕະວັດທີ່ອາໄສຢູ່ໃນສະວິດ. ທ່ານໃຫ້ຮູ້ວ່າສະມາຄົມຍາມໃດກໍ່ປາດຖະໜາຢາກສ້າງສະພາບແວດລ້ອມແຫ່ງການແລກປ່ຽນຂໍ້ມູນຂ່າວສານ, ຊຸກຍູ້ການພົວພັນແລກປ່ຽນ ແລະ ການຮ່ວມມືໃນທຸກຂົງເຂດໃຫ້ຫຼາຍກ່ວາອີກ ເພື່ອປະກອບສ່ວນພັດທະນາເສດຖະກິດ, ວັດທະນະທຳຊຸມຊົນຂອງປະເທດປະຈຳຖິ່ນ ກໍ່ຄືການພັດທະນາເສດຖະກິດ - ສັງຄົມຂອງ ຫວຽດນາມ. ໜຶ່ງໃນບັນດາເປົ້າໝາຍຂອງສະມາຄົມແມ່ນເຮັດແນວໃດ ເພື່ອຮັກສາພາສາຫວຽດ ໃນບັນດາລຸ້ນໜຸ່ມທີ່ເກີດ ແລະ ເຕີບໃຫຍ່ຢູ່ສະວິດ ໄວ້ໄດ້.

ໂດຍຕາງໜ້າສະຖານທູດຫວຽດນາມ ປະຈໍາ ສະວິດ, ທ່ານເອກອັກຄະລັດຖະທູດ ຝຸ່ງເທລອງ ກໍ່ໄດ້ມອບຂອງຂວັນໃຫ້ໂຮງຮຽນ ບິ່ງມິງ ພ້ອມກັບຊຸດປຶ້ມຕຳລາພາສາຫວຽດ ໃຫ້ແກ່ນ້ອງໆນັກຮຽນຂອງໂຮງຮຽນ. ໂຮງຮຽນ ບິ່ງມິງ ແມ່ນບ່ອນແລກປ່ຽນວັດທະນະທຳ, ຮັກສາ ແລະ ພັດທະນາສີສັນວັດທະນະທຳ, ພາສາຂອງປະຊາຄົມຊາວ ຫວຽດນາມ ຢູ່ ສະວິດ ເວົ້າລວມ ແລະ ເຂດ Zurich ເວົ້າສະເພາະ.

ຄູສອນ ມິງເຈົາ Glattfelder ຂອງໂຮງຮຽນ ບິ່ງມິງ ໃຫ້ຮູ້ວ່າ: ຍາມໃດຫວຽດນາມກໍ່ແມ່ນຈິດວິນຍານຂອງຊາວ ຫວຽດນາມ, ແມ່ນຄວາມພາກພູມໃຈຊົນຊາດ ແລະ ໄດ້ປະກອບສ່ວນສ້າງຄຸນຄ່າການຄົງຕົວຂອງຊາດຫວຽດນາມ. ການວິດສອນຊາວຫວຽດນາມຢູ່ຕ່າງປະເທດ, ພິເສດແມ່ນໃຫ້ລຸ້ນໜຸ່ມ ໄດ້ກາຍເປັນຂະບວນການເຄື່ອນໄຫວພັດທະນາໃນທົ່ວໂລກ.

ບຸນຄົງ