 |
ພາບປະກອບ
ທ່ານນາຍົກລັດຖະມົນຕີໄດ້ອອກຂໍ້ຕົກລົງ ວ່າດ້ວຍການແບ່ງຕົວເລກລັດຖະກອນໃໝ່ ປີ 2020 ສະບັບລົງວັນທີ 19 ທັນວາ 2019 ເຫັນດີອະນຸມັດແບ່ງຈຳນວນຕົວເລກລັດຖະກອນໃໝ່ (ໂກຕ້າ) ໃຫ້ບັນດາກະຊວງ ອົງການຈັດຕັ້ງຂັ້ນສູນກາງ ແລະ ທ້ອງຖິ່ນ ໃນປີ 2020 ຈຳນວນ 2.000 ຄົນ ດັ່ງນີ້: ກະຊວງການຕ່າງປະເທດ 11 ຄົນ ກະຊວງຍຸຕິທຳ 10 ຄົນ ກະຊວງການເງິນ 30 ຄົນ ກະຊວງແຜນການ ແລະ ການລົງທຶນ 20 ຄົນ ກະຊວງສຶກສາທິການ ແລະ ກີລາ 1.070 ຄົນ ໃນນັ້ນ ລັດຖະກອນຄູ 1.040 ຄົນ ແລະ ລັດຖະກອນບໍລິການ 30 ຄົນ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ 38 ຄົນ ກະຊວງແຮງງານ ແລະ ສະຫວັດດີການສັງຄົມ 20 ຄົນ ອົງການກາແດງລາວ 3 ຄົນ ກະຊວງສາທາລະນະສຸກ 300 ຄົນ ໃນນັ້ນ ລັດຖະກອນແພດ 280 ຄົນ ແລະ ລັດຖະກອນບໍລິຫານ 20 ຄົນ ກະຊວງໄປສະນີ ຄົມມະນາຄົມ ແລະ ການສື່ສານ 9 ຄົນ ກະຊວງພະລັງງານ ແລະ ບໍ່ແຮ່ 10 ຄົນ ກະຊວງວິທະຍາສາດ ແລະ ເຕັກໂນໂລຊີ 5 ຄົນ ກະຊວງພາຍໃນ 21 ຄົນ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ 21 ຄົນ ຫ້ອງວ່າການສຳນັກງານນາຍົກລັດຖະມົນຕີ 5 ຄົນ ອົງການກວດກາພັກ-ລັດຖະບານ 20 ຄົນ ສະພາແຫ່ງຊາດ 24 ຄົນ ຫ້ອງວ່າການປະທານປະເທດ 3 ຄົນ ສານປະຊາຊົນສູງສຸດ 14 ຄົນ ອົງການໄອຍະການປະຊາຊົນສູງສຸດ 12 ຄົນ ອົງການກວດສອບແຫ່ງລັດ 7 ຄົນ ຫ້ອງວ່າການສູນກາງພັກ 5 ຄົນ ຄະນະຈັດຕັ້ງສູນກາງພັກ 6 ຄົນ ຄະນະໂຄສະນາອົບຮົມສູນກາງພັກ 3 ຄົນ ຄະນະພົວພັນຕ່າງປະເທດສູນກາງພັກ 4 ຄົນ ສູນກາງແນວລາວສ້າງຊາດ 4 ຄົນ ສູນກາງຊາວໜຸ່ມປະຊາຊົນ ປະຕິວັດລາວ 3 ຄົນ ສູນກາງສະຫະພັນແມ່ຍິງລາວ 3 ຄົນ ສູນກາງສະຫະພັນກຳມະບານລາວ 3 ຄົນ ສະຫະພັນນັກຮົບເກົ່າແຫ່ງຊາດ 3 ຄົນ ສະຖາບັນການເມືອງ ແລະ ການປົກຄອງແຫ່ງຊາດ 3 ຄົນ ສະຖາບັນວິທະຍາສາດ-ສັງຄົມແຫ່ງຊາດ 3 ຄົນ ແລະ ຄະນະຮັບຜິດ ຊອບພິພິທະພັນ ໄກສອນ ພົມວິຫານ 3 ຄົນ. ພາກສ່ວນທ້ອງຖິ່ນ: ນະຄອນຫຼວງວຽງຈັນ 12 ຄົນ ແຂວງຜົ້ງສາລີ 10 ຄົນ ແຂວງຫຼວງນ້ຳທາ 10 ຄົນ ແຂວງອຸດົມໄຊ 11 ຄົນ ແຂວງບໍ່ແກ້ວ 11 ຄົນ ແຂວງຫຼວງພະບາງ 10 ຄົນ ແຂວງໄຊຍະບູລີ 11 ຄົນ ແຂວງຫົວພັນ 11 ຄົນ ແຂວງຊຽງຂວາງ 11 ຄົນ ແຂວງໄຊສົມບູນ 30 ຄົນ ແຂວງວຽງຈັນ 10 ຄົນ ແຂວງບໍລິຄຳໄຊ 10 ຄົນ ແຂວງຄຳມ່ວນ 10 ຄົນ ແຂວງສະຫວັນນະເຂດ 14 ຄົນ ແຂວງສາລະວັນ 11 ຄົນ ແຂວງຈຳປາສັກ 11 ຄົນ ແຂວງເຊກອງ 10 ຄົນ ແລະ ແຂວງອັດຕະປື 10 ຄົນ.
ໃນວັນທີ 23 ທັນວາ 2019 ກະຊວງພາຍໃນ ໄດ້ຈັດກອງປະຊຸມສະຫລຸບການຈັດຕັ້ງປະຕິບັດວຽກງານ ປະຈຳ ປີ 2019 ແລະ ທິດທາງແຜນການ ປະຈຳປີ 2020 ຂຶ້ນໂດຍການເປັນປະທານຂອງ ທ່ານ ຄຳໝັ້ນ ສູນວິເລີດ ລັດຖະມົນຕີ ກະຊວງພາຍໃນ, ມີຮອງລັດຖະມົນຕີ, ຫົວໜ້າຫ້ອງການ, ຫົວໜ້າກົມຈັດຕັ້ງ ແລະ ພະນັກງານ ບັນດາກະຊວງ ແລະ ອົງການທຽບເທົ່າ, ມີບັນດາຫົວໜ້າກົມ, ຫ້ອງການ ແລະ ສະຖາບັນ, ພ້ອມດ້ວຍພະນັກງານຫລັກແຫລ່ງ ກະຊວງພາຍໃນເຂົ້າຮ່ວມ. ໃນໂອກາດເຂົ້າຮ່ວມກອງປະຊຸມ ທ່ານ ຄຳໝັ້ນ ສູນວິເລີດ ລັດຖະມົນຕີ ກະຊວງພາຍໃນ ໄດ້ໂອ້ລົມຕໍ່ກອງປະຊຸມ, ໂດຍທ່ານໄດ້ທົບທວນຄືນ ເຖິງຄໍາຂວັນທີ່ທ່ານນາຍົກລັດຖະມົນຕີ ໄດ້ສະເໜີໃນກອງປະຊຸມປະຈໍາ ປີ 2018 ຂອງກະຊວງພາຍໃນ ວ່າ “ກົງຈັກກະທັດຮັດ, ໜັກແໜ້ນ, ເຂັ້ມແຂງ, ມີປະສິດທິຜົນ, ໂປ່ງໃສ ແລະ ຮັບໃຊ້ປະຊາຊົນຢ່າງແທ້ຈິງ”, ເຊິ່ງຕໍ່ກັບຄໍາຂວັນດັ່ງກ່າວນີ້ ຂະແໜງພາຍໃນ ໄດ້ພະຍາຍາມ ແລະ ເອົາໃຈໃສ່ໃນການຜັນຂະຫຍາຍຄໍາຂວັນດັ່ງກ່າວ ເຂົ້າໃນການປະຕິບັດວຽກງານຕົວຈິງ ໃນການ ຄົ້ນຄວ້າ ແລະ ປັບປຸງວຽກງານຕ່າງໆ ໂດຍສະເພາະແມ່ນ ເນື້ອໃນຈິດໃຈຂອງຄໍາສັ່ງ ເລກທີ 03/ນຍ ໃຫ້ປາກົດຜົນເປັນຈິງ ເທື່ອລະກ້າວ, ການຄົ້ນຄວ້າປັບປຸງກົງຈັກ ຕິດພັນກັບການກໍານົດຕໍາແໜ່ງງານຄືນ ໃໝ່ໃຫ້ສອດຄ່ອງກັບພາລະບົດບາດ ຂອງແຕ່ລະການ ຈັດຕັ້ງ.
ສໍາລັບປີ 2020 ຊຶ່ງເປັນປີສຸດທ້າຍ ຂອງແຜນການ 5 ປີຄັ້ງທີ I ຂອງຂະແໜງການພາຍໃນ, ທ່ານ ຄຳໝັ້ນ ສູນວິເລີດ ໄດ້ເນັ້ນໃຫ້ແຕ່ ລະພາກສ່ວນ ເອົາໃຈໃສ່ກວດກາຄືນ ບັນຫາທີ່ຍັງເປັນຈຸດຄົງຄ້າງຕ້ອງໄດ້ແກ້ໄຂ ແລະ ຈະຕ້ອງໄດ້ສືບຕໍ່ເອົາໃຈໃສ່ ປະຕິບັດຄໍາຂວັນດັ່ງກ່າວ ໃຫ້ປາກົດຜົນເປັນຈິງ ແລະ ເຮັດໃຫ້ການປັບປຸງວຽກງານ ໄດ້ຮັບຜົນດີກວ່າເກົ່າ ເພື່ອປະຕິບັດພາ ລະບົດບາດ ເປັນເສນາທິການ ໃຫ້ແກ່ລັດຖະບານ ແລະ ອົງການປົກຄອງທ້ອງຖິ່ນ ຕາມຄວາມຮັບຜິດຊອບ ຂອງຂະແໜງ ການພາຍໃນ ໂດຍສະເພາະ ກ່ຽວກັບການຄົ້ນຄວ້າ ປັບປຸງກົງຈັັກການຈັດຕັ້ງ ຂອງອົງການບໍລິຫານລັດ ທັງໃນລະດັບສູນກາງ ແລະ ທ້ອງຖິ່ນ ແລະ ບັນຫາອື່ນໆ ທີ່ປີ່ນອ້ອມລວມທັງ ວຽກລັດຖະກອນ, ວຽກເຕັກນິກການປົກຄອງ ແລະ ການຮ່ວມມືສາກົນ ໃຫ້ມີຄວາມເຂັ້ມແຂງ ແລະ ໜັກແໜ້ນ.
（ໄຊພອນ）
