ເຂົ້າຮ່ວມໃນພິທີດັ່ງກ່າວມີທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ທ່ານ ບຸນອຸ້ມ ສີວັນເພັງ ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ທ່ານ ເຊິນ ຢຸນ ເຜິງ ຮອງປະທານບໍລິສັດ ຕາຂ່າຍໄຟຟ້າພາກໃຕ້ຈີນ ພ້ອມດ້ວຍພາກສ່ວນກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ.
ໃນພິທີ ທ່ານ ຢ້າງ ຢົ່ງ ຮຸຍ ປະທານບໍລິຫານບໍລິສັດລົງທຶນພະລັງງານໄຟຟ້າລາວ-ຈີນ ຈຳກັດໄດ້ຂຶ້ນກ່າວວ່າ: ພາຍໃຕ້ການສະໜັບສະໜູນຈາກກະຊວງພະລັງງານ ແລະ ບໍ່ແຮ່ ແລະ ພາກສ່ວນກ່ຽວຂ້ອງ ບໍລິສັດຕາຂ່າຍໄຟຟ້າຈີນພາກໃຕ້ ແລະ ລັດວິສາຫະກິດໄຟຟ້າລາວໄດ້ສ້າງຕັ້ງບໍລິສັດຮ່ວມລົງທຶນພະລັງງານໄຟຟ້າລາວ-ຈີນ ຈຳກັດຂຶ້ນ ໂດຍການຮ່ວມມືບໍລິສັດນີ້ມີໜ້າທີ່ພັດທະນາການກໍ່ສ້າງ ແລະ ການດຳເນີນທຸລະກິດຂອງໂຄງການກໍ່ສ້າງສາຍສົ່ງສະໜອງໄຟຟ້າໃຫ້ທາງລົດໄຟລາວ-ຈີນ ເຊິ່ງໂຄງການນີ້ຈະຜະລິດສາຍສົ່ງແຮງດັນ 115 ກິໂລໂວນ 20 ແລວສາຍ ແລະ ສ້າງຕັ້ງຂະຫຍາຍສະຖານີຍ່ອຍ 11 ແຫ່ງ ໂດຍກວມເອົາແຂວງຫຼວງນ້ຳທາ ອຸດົມໄຊ ຫຼວງພະບາງ ແລະ ນະຄອນ ຫຼວງວຽງຈັນ ຄາດວ່າຈະສຳເລັດເດືອນມີນາ 2021 ເພື່ອຮອງຮັບເປີດບໍລິການລົດໄຟລາວ-ຈີນໃນເດືອນທັນວາ 2021 ນອກນັ້ນ ຍັງເປັນການຊຸກຍູ້ການພັດທະນາເສດຖະກິດ-ສັງຄົມຂອງລາວ ເພື່ອສ້າງຜົນປະໂຫຍດໃຫ້ປະຊາຊົນທີ່ອາໄສໃນເຂດດັ່ງກ່າວ.
 |
ເລີ່ມກໍ່ສ້າງໂຄງການສະໜອງໄຟຟ້າໃຫ້ເສັ້ນທາງລົດໄຟ ລາວ-ຈີນ. (ພາບ: vientianetimes)
ທ່ານ ທອງພັດ ອິນທະວົງ ກ່າວວ່າ: ໂຄງການນີ້ມີຄວາມສຳຄັນ ນອກຈາກຈະເປັນການສ້າງພື້ນຖານໂຄງລ່າງເພື່ອຮັບປະກັນໃຫ້ແກ່ການພັດທະນາໂຄງການລົດໄຟຄວາມໄວສູງ ເຊິ່ງແມ່ນໂຄງການທີ່ເປັນຍຸດທະສາດທີ່ພັກ ແລະ ລັດເຮົາໄດ້ຖືເປັນໂຄງການທີ່ມີຄວາມສຳຄັນຍິ່ງຕໍ່ການພັດທະນາເສດຖະກິດ-ສັງຄົມຢູ່ລາວທັງໃນສະເພາະໜ້າ ແລະ ໄລຍະຍາວ ພ້ອມນັ້ນ ໂຄງການນີ້ຖືວ່າແມ່ນໂຄງການພັດທະນາລະບົບສາຍສົ່ງໂຄງການໜຶ່ງທີ່ສຳຄັນ ແລະ ໄດ້ຖືກກຳນົດຢູ່ໃນແຜນພັດທະນາວຽກງານພະລັງງານ ແລະ ບໍ່ແຮ່ ໄລຍະ 5 ປີ ຄັ້ງທີ VIII (2016-2020) ແນໃສ່ສະ ໜອງກະແສໄຟຟ້າຮັບໃຊ້ການພັດທະນາລົດໄຟຄວາມໄວສູງ ໂດຍລັດວິສາຫະກິດໄຟຟ້າລາວເປັນເຈົ້າຂອງໂຄງການ ມີຄວາມເຊື່ອໝັ້ນວ່າພາຍຫຼັງສຳເລັດການກໍ່ສ້າງໂຄງການນີ້ຈະເປັນເງື່ອນໄຂ ແລະ ສ່ວນປະກອບທີ່ສຳຄັນເຂົ້າໃນການພັດທະນາລະບົບສາຍສົ່ງ ກໍຄື ການພັດທະນາພື້ນຖານດ້ານວຽກງານຄົມມະນາຄົມໃຫ້ຂະຫຍາຍຕົວຢ່າງໜັກແໜ້ນ ແລະ ນຳເອົາຜົນປະໂຫຍດຢ່າງຫຼວງຫຼາຍມາໃຫ້ປະເທດຊາດໃນອະນາຄົດ.
（ແຫຼ່ງຂໍ້ມູນ： http://www.vientianetimes.org.la）
