 |
ກອງປະຊຸມ ລະດັບຊາດ ເພື່ອໃຫ້ຄວາມຮູ້ການເຂົ້າເຖິງການບໍລິການທາງດ້ານການເງິນ ປະຈຳປີ 2019
ພ້ອມນີ້, ຍັງປູກຈິດສຳນຶກ ໃນການບໍລິການທາງດ້ານການເງິນ ທີ່ມີຄວາມຮັບຜິດຊອບຕໍ່ສັງຄົມ ຂອງຂະແໜງການເງິນຈຸລະພາກໃນ ສປປ ລາວ ໃຫ້ສູງຂຶ້ນ. ທ່ານ ສົມພອນ ສີແສງລັດ ປະທານ ສກມຈ ກ່າວວ່າ: ກອງປະຊຸມຄັ້ງນີ້ ຍັງໄດ້ສົນທະນາກັນກ່ຽວກັບລະບຽບການທີ່ສະໜັບສະໜູນ ສຳລັບການພັດທະນາການເງິນ ດີຈີຕອນໃນ ສປປ ລາວ ຈາກພາກລັດ ລະຫວ່າງກົມຊຳລະສະສາງ ທຫລ, ກົມພັດທະນາຊົນນະບົດ ແລະ ສະຫະກອນ ກະຊວງກະສິກຳ ແລະ ປ່າໄມ້, ກົມສົ່ງເສີມວິສາຫະກິດຂະໜາດກາງ ແລະ ຂະໜາດນ້ອຍ ກະຊວງອຸດສາຫະກຳ ແລະ ການຄ້າ, ລວມທັງກົມສ່ວຍສາອາກອນ ກະຊວງການເງິນ. ໃນຂະນະທີ່ ບັນດາທະນາຄານ, ລວມທັງພາກສ່ວນກ່ຽວຂ້ອງ ແລະ ບໍລິສັດ ໃນຂົງເຂດເທັກໂນໂລຊີ ຍັງໄດ້ວິເຄາະກ່ຽວກັບ ລະບົບນິເວດຂອງການເງິນ ແລະ ຜົນກະທົບຂອງ ດີຈິີຕອນ ເພື່ອຫລຸດຊ່ອງຫວ່າງ ແລະ ຄວາມສ່ຽງ ໃນການເຂົ້າເຖິງການບໍລິການທາງດ້ານການເງິນຢູ່ ສປປ ລາວ. ນອກນີ້, ຍັງມີການສົນທະນາກ່ຽວກັບຄວາມຮັບຜິດຊອບດ້ານສັງຄົມຂອງຂະແໜງການເງິນຈຸລະພາກ ໃນ ສປປ ລາວ, ຜົນກະທົບຕໍ່ລູກຄ້າ ແລະ ຄວາມຍືນຍົງ.
ກອງປະຊຸມຄັ້ງນີ້ ຍັງກາຍເປັນເວທີສະແດງອອກຢ່າງແຈ່ມແຈ້ງ ໃນຫລາຍດ້ານທີ່ຕິດພັນກັບການເຂົ້າເຖິງການບໍລິການດ້ານການເງິນ ແລະ ຂົງເຂດໃນການນຳໃຊ້ລະບົບ ດີຈີຕອນ ແລະ ຄວາມຮັບຜິດຊອບຕໍ່ສັງຄົມ ໃນການເຂົ້າເຖິງການບໍລິການດ້ານການເງິນ ຂອງຂະແໜງການເງິນຈຸລະພາກໃນ ສປປ ລາວ, ທັງເປັນການສ້າງສາຍ ສຳພັນກັບຜູ້ມີສ່ວນຮ່ວມຕ່າງໆ ໃນການແລກປ່ຽນຄວາມຮູ້ ແລະ ຮຽນຮູ້ກ່ຽວກັບທ່າອ່ຽງ ຂອງຂົງເຂດໃນການນຳໃຊ້ ເທັກໂນໂລຊີໃໝ່ໆ ຂອງສະຖາບັນການເງິນຈຸລະພາກ ໃນການໃຫ້ບໍລິການການເງິນ.
（ແຫຼ່ງຂໍ້ມູນ： ຂປລ）
