ລາວເປັນປະເທດຢືນອັນດັບທໍາອິດໃນຈຳນວນ 78 ປະເທດ ແລະ ເຂດແຄ້ວນທີ່ຫວຽດນາມ ລົງທຶນຢູ່ຕ່າງປະເທດ, ດ້ວຍ 237 ໂຄງການ, ມີຍອດຈຳນວນທຶນຈົດທະບຽນ 5,34 ຕື້ USD. ຫວຽດນາມ ຢືນອັນດັບທີ 3 ໃນບັນດາປະເທດທີ່ລົງທຶນຢູ່ລາວ (ຖັດຈາກຈີນ ແລະ ໄທ).
ການພົວພັນລະຫວ່າງ ຫວຽດນາມ - ລາວ ຍາມໃດກໍ່ໝັ້ນຄົງ ແລະ ນັບມື້ນັບພິເສດ
ທ່ານນາງ ສອນຈັນ ພຸດທະວົງ, ທີ່ປຶກສາຝ່າຍເສດຖະກິດ-ການຄ້າ, ສະຖານທູດລາວ ປະຈຳ ຫວຽດນາມ ໃຫ້ຮູ້ວ່າ: ການພົວພັນຮ່ວມມືດ້ານການຄ້າລະຫວ່າງ ລາວ-ຫວຽດນາມ ແມ່ນການຮ່ວມມືແບບພິເສດ ແລະ ມີມູນເຊື້ອມາແຕ່ດົນນານນັບແຕ່ລະດັບການນໍາຂັ້ນສູງລັດ ຕະຫຼອດຮອດຂັ້ນກະຊວງ, ຂະແໜງການ.
 |
| ທ່ານນາງ ສອນຈັນ ພຸດທະວົງ, ທີ່ປຶກສາຝ່າຍເສດຖະກິດ-ການຄ້າ, ສະຖານທູດລາວ ປະຈຳ ຫວຽດນາມ. ພາບ: ຟ້າມຫຼີ |
ທ່ານນາງ ສອນຈັນ ພຸດທະວົງ ໃຫ້ຮູ້ວ່າ “ສອງຝ່າຍຈະສືບຕໍ່ຄົ້ນຄວ້າ ແລະ ວາງອອກບັນດານະໂຍບາຍບຸລິມະສິດເພື່ອດຶງດູດການລົງທຶນພື້ນຖານໂຄງລ່າງໃນຂົງເຂດເສດຖະກິດ, ການຜະລິດ ແລະ ການຄ້າຊາຍແດນລະຫວ່າງ ລາວ ແລະ ຫວຽດນາມ; ພ້ອມກັນຄົ້ນຄວ້າ ແລະ ປັບປຸງບັນດາສັນຍາທີ່ມີຢູ່ແລ້ວ, ພິເສດແມ່ນສັນຍາການຄ້າສອງຝ່າຍ ລາວ-ຫວຽດນາມ, ສັນຍາການຄ້າ ຊາຍແດນ ລາວ-ຫວຽດນາມ ແລະ ຂໍ້ຕົກລົງຮ່າໂນ້ຍ ປີ 2007 ວ່າດ້ວຍ ການສ້າງເງື່ອນໄຂສະດວກໃຫ້ແກ່ປະຊາຊົນ, ພາຫະນະ ແລະ ສິນຄ້າໃຫ້ແທດ ເໝາະກັບສະພາບຕົວຈິງ; ສ້າງເງື່ອນໄຂສະດວກໃນການເຂົ້າເຖິງຕະຫຼາດ ເຊິ່ງກັນແລະກັນ”.
ໄລ່ລວມໃນ 7 ເດືອນຕົ້ນປີ 2022, ວົງເງິນການຄ້າລະຫວ່າງສອງປະເທດ ລາວ-ຫວຽດນາມ ໄດ້ເພີ່ມຂຶ້ນດີພໍສົມຄວນ, ບັນລຸກວ່າ 948 ລ້ານໂດລາສະຫະລັດ, ເພີ່ມຂຶ້ນ 54,14% ເມື່ອທຽບໃສ່ໄລຍະດຽວກັນຂອງປີກາຍ. ໃນນັ້ນ, ສປປ ລາວ ສົ່ງອອກບັນລຸກວ່າ 585 ລ້ານ USD, ເພີ່ມຂຶ້ນ 48,13% ແລະ ນໍາເຂົ້າ ກວ່າ 362 ລ້ານ USD, ຫຼຸດລົງ 1,63%.
ທ່ານເອກອັກຄະລັດຖະທູດ ຫງວຽນຝູບິ່ງ, ປະທານສະມາຄົມຕິດຕໍ່ກັບ ຊາວຫວຽດນາມ ອາໄສຢູ່ຕ່າງປະເທດ ເນັ້ນໜັກວ່າ: ໃນທົດສະວັດຜ່ານມາ, ການພົວພັນມິດຕະພາບທີ່ເປັນມູນເຊື້ອອັນດີງາມ ແລະ ຄວາມສະໜິດຕິດພັນທີ່ບໍລິສຸດຜຸດຜ່ອງລະຫວ່າງປະຊາຊົນສອງປະເທດ ຫວຽດນາມ - ລາວ ໂດຍການນຳພັກ, ລັດ ແລະ ປະຊາຊົນສອງປະເທດໄດ້ເພີ່ມພູນຄູນສ້າງ, ກາຍເປັນຊັບສິນອັນລ້ຳຄ່າຂອງສອງຊາດ.
ໃນໄລຍະໃໝ່ແຫ່ງການສ້າງສາປະເທດຊາດໃນສະໄໝສັນຕິພາບ, ການພົວພັນລະຫວ່າງສອງປະເທດໄດ້ພັດປ່ຽນຈາກຄວາມສາມັກຄີແບບພິເສດໃນການຕໍ່ສູ້ເປັນການພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານພາຍໃຕ້ການນຳພາຂອງພັກກອມມູນິດຫວຽດນາມ ແລະ ພັກປະຊາຊົນ ປະຕິວັດລາວ.
ຕ້ອງແກ້ໄຂພື້ນຖານໂຄງລ່າງການຄົມມະນາຄົມ ແລະ ບຳລຸງສ້າງແຫຼ່ງຊັບ ພະຍາກອນມະນຸດ
ຕາງໜ້າສະຖານທູດລາວ ປະຈໍາ ຫວຽດນາມ, ທ່ານນາງ ສອນຈັນ ພຸດທະວົງ ປາດຖະໜາຢາກໃຫ້ບັນດາວິສາຫະກິດ, ນັກລົງທຶນຫວຽດນາມ ມີຄວາມສົນໃຈເຖິງກາລະໂອກາດລົງທຶນຢູ່ລາວ. “ເພື່ອຍົກລະດັບການຮ່ວມມື, ກ່ອນອື່ນໝົດພວກເຮົາຕ້ອງແກ້ໄຂບັນຫາພື້ນຖານໂຄງລ່າງຄົມມະນາຄົມ, ສ້າງເງື່ອນໄຂສະດວກໃຫ້ແກ່ການລົງທຶນ, ການແລກປ່ຽນການຄ້າ ແລະ ການທ່ອງທ່ຽວລະຫວ່າງສອງປະເທດ. ຕໍ່ໄປແມ່ນບັນຫາການບຳລຸງສ້າງແຫຼ່ງຊັບພະຍາກອນມະນຸດ. ປະຈຸບັນ, ຫວຽດນາມ ໄດ້ລົງທຶນຫຼາຍຢ່າງເຂົ້າໃນການບຳລຸງສ້າງແຫຼ່ງຊັບພະຍາກອນມະນຸດໃຫ້ແກ່ລາວ ເພາະວ່າແຫຼ່ງຊັບພະຍາກອນມະນຸດຂອງລາວມີລາຄາຖືກແຕ່ມີຄຸນນະພາບຕ່ຳ. ລາວ ຫວັງວ່າ ຫວຽດນາມ ຈະຍູ້ແຮງການລົງທຶນບຳລຸງສ້າງແຫຼ່ງຊັບພະຍາກອນມະນຸດລາວ ໃຫ້ຫຼາຍກວ່າອີກ.
ທ່ານ ຫງວຽນຢຸຍຈຸງ, ປະທານສະມາຄົມໃຫຍ່ຊາວຫວຽດນາມ ອາໄສຢູ່ ລາວ ຕີລາຄາວ່າ: ວິສາຫະກິດທັງຂອງຫວຽດນາມ ແລະ ລາວ ຍັງບໍ່ທັນໄດ້ພັດທະນາ ກວມລວມ.
ທ່ານ ຫງວຽນຢຸຍຈຸງ ປະທານສະມາຄົມໃຫຍ່ຊາວຫວຽດນາມ ອາໄສຢູ່ ລາວ ໃຫ້ຮູ້ວ່າ “ຂ້າພະເຈົ້າເຫັນວ່າສິນຄ້າຂອງໄທ ມີທ່າໄດ້ປຽບກວ່າເມື່ອສູນຈຳໜ່າຍຂອງເຂົາຢູ່ໃກ້ກັບຊາຍແດນລາວ, ຊ່ວຍປະຢັດເວລາ ແລະ ຄ່າໃຊ້ຈ່າຍ. ນີ້ກໍແມ່ນຂໍ້ສະເໜີແນະໃຫ້ຫວຽດນາມ. ຖ້າ ຫວຽດນາມ ມີເສັ້ນທາງເຊື່ອມຕໍ່ລາວ ທີ່ສະດວກກວ່າ, ອາດຈະປັບປຸງຄວາມສາມາດແກ່ງແຍ້ງຂອງສິນຄ້າຫວຽດນາມ ຢູ່ຕະຫຼາດລາວ.
ທ່ານ ໂດ໊ກວກຮືງ, ຮອງຫົວໜ້າກົມຕະຫຼາດ ອາຊີ - ອາຟະຣິກາ, ກະຊວງອຸດສາຫະກຳ ແລະ ການຄ້າ ໃຫ້ຮູ້ວ່າ: ໃນໄລຍະຈະມາເຖິງ, ບັນດາວິສາຫະກິດຫວຽດນາມ ຕ້ອງເອົາໃຈໃສ່ ແລະ ເພີ່ມທະວີການສົ່ງອອກ ຜະລິດຕະພັນເຫຼັກກ້າ, ພາຫະນະຂົນສົ່ງ ແລະ ເຄື່ອງອາໄຫຼ່, ເຄື່ອງຈັກ, ອຸປະກອນ ແລະ ເຄື່ອງມື, ສິນຄ້າຮັບໃຊ້ການຜະລິດກະສິກຳ ເພື່ອຍາດແຍ່ງ ກະແສການລົງທຶນເຂົ້າຕະຫຼາດລາວ. ກົງກັນຂ້າມ, ບັນດາສິນຄ້ານຳເຂົ້າຢ່າງແຮງຈາກລາວ ໄປ ຫວຽດນາມ ມີ ໄມ້ ແລະ ຜະລິດຕະພັນຈາກໄມ້, ຖ່ານຫີນ, ແຮ່ທາດ… ນີ້ແມ່ນແຫຼ່ງວັດຖຸດິບຍຸດທະສາດໃຫ້ແກ່ການຜະລິດອຸດສາຫະກຳ - ພະລັງງານຂອງຫວຽດນາມ.
ເພື່ອຊຸກຍູ້ການພົວພັນດ້ານການຄ້າລະຫວ່າງສອງປະເທດ, ທ່ານຮອງຫົວໜ້າກົມຕະຫຼາດອາຊຽນ ໂດ໊ກວກຮືງ ໄດ້ສະເໜີແນະວ່າ, ບັນດາວິສາຫະກິດຕ້ອງກໍາແໜ້ນບັນດາຂໍ້ກຳນົດຂອງສັນຍາການຄ້າເພື່ອຫຼີກລ່ຽງຂໍ້ຕິດຂັດທີ່ເກີດຂຶ້ນໃນການປະຕິບັດລະບຽບການດ້ານພາສີ; ຕ້ອງໝູນໃຊ້ບັນດາໂຄງການເຊື່ອມໂຍງການຄ້າ ແລະ ສົ່ງເສີມການຄ້າ ເພື່ອຊອກຫາຄູ່ຄ້າ ແລະ ລູກຄ້າ.
| ນະໂຍບາຍສົ່ງເສີມການລົງທຶນຕາມຂະແໜງການ ແລະ ເຂດພາກຂອງລາວ: ນະໂຍບາຍສົ່ງເສີມໄດ້ຮັບການປະຕິບັດຢູ່ 3 ເຂດພາກ, ໃນນັ້ນມີເຂດ 1: ເຂດປະສົບກັບຄວາມຫຍຸ້ງຍາກ, ເຂດຫ່າງໄກສອກຫຼີກ, ພື້ນຖານໂຄງລ່າງບໍ່ສະດວກໃຫ້ແກ່ການລົງທຶນ; ເຂກ 2: ເຂດທີ່ມີພື້ນຖານໂຄງລ່າງສະດວກໃນການລົງທຶນ; ເຂດ 3: ເຂດສະເພາະກິດ. ຖ້າວິສາຫະກິດລົງທຶນເຂົ້າໃນ 9 ຂະແໜງສົ່ງເສີມ ແລະ ນອນຢູ່ໃນເຂດ 1, ນັກລົງທຶນຈະໄດ້ຮັບສິດທິພິເສດຍົກເວັ້ນພາສີກໍາໄລ ແລະ ບໍ່ເສຍຄ່າເຊົ່າ ຫຼື ການມອບ-ໂອນທີ່ດິນເປັນເວລາ 10 ປີ, ແລະ ຖ້າລົງທຶນເຂົ້າໃນຂະແໜງ 2, 3, 5 ແລະ 6 ຈະໄດ້ຊົມໃຊ້ບຸລິມະສິດຄືດັ່ງກ່າວຕື່ມອີກ 5 ປີ. ຖ້າລົງທຶນໃນເຂດ 2, ນັກລົງທຶນຈະໄດ້ຊົມໃຊ້ບຸລິມະສິດຍົກເວັ້ນພາສີກໍາໄລ ແລະ ຄ່າເຊົ່າ ຫຼື ຄ່າມອບ-ໂອນທີ່ດິນ ເປັນເວລາ 5 ປີ ແລະ ຖ້າ ລົງທຶນເຂົ້າໃນຂະແໜງ 2, 3, 5 ແລະ 6, ຈະໄດ້ຊົມໃຊ້ບຸລິມະສິດຄືດັ່ງກ່າວຕື່ມອີກ 3 ປີ. ນອກຈາກນັ້ນ, ນັກລົງທຶນຍັງໄດ້ຊົມໃຊ້ບຸລິມະສິດພາສີນໍາເຂົ້າ ແລະ ອາກອນມູນຄ່າເພີ່ມ 0% ໃນການນໍາເຂົ້າອຸປະກອນ ແລະ ວັດຖຸດິບໃນການຜະລິດທີ່ລາວບໍ່ສາມາດຜະລິດເພື່ອສ້າງຊັບສິນຄົງທີ່ ແລະ ພາຫະນະຮັບໃຊ້ໂດຍກົງໃນການຜະລິດ. |
ບູນມີ
