| ໂອກາດພັດທະນາໝູ່ບ້ານອາຊີບຈັກສານຂອງຊາວເຜົ່າ ຂະແມ | |
| ຢູ່ໃນໝູ່ບ້ານໄຕງວຽນທີ່ປ່ຽນແປງໃໝ່ |
 |
| ບຸນປີໃໝ່ລາວໄດ້ຈັດຢູ່ວິທະຍາໄລ ໄທງວຽນ ໃນເດືອນເມສາ 2022 (ພາບ: Thành Luân). |
ຄວາມຊົງຈໍາທີ່ບໍ່ອາດລືມໄດ້
ເດືອນເມສາ 2022, ເປັນເວລາທີ່ບໍ່ສາມາດກັບບ້ານເພື່ອຕ້ອນຮັບປີໃໝ່ ຍ້ອນພະຍາດໂຄວິດ-19, ແຕ່ນັກສຶກສາລາວທີ່ພວມຮຽນຢູ່ມະຫາວິທະຍາໄລໄທງວຽນ ກໍຍັງໄດ້ຕ້ອນຮັບປີໃໝ່ດ້ວຍຄວາມເບີກບານມ່ວນຊື່ນ ແລະ ອົບອຸ່ນ.
ບັນດາພິທີກຳພື້ນເມືອງເຊັ່ນ ຜູກແຂນ, ຟ້ອນລໍາວົງ, ຫົດນໍ້າ... ໂຮງຮຽນກໍໄດ້ຈັດຕັ້ງຢ່າງຄົບຖ້ວນ. ສຳລັບນັກສຶກສາລາວ, ນີ້ບໍ່ພຽງແຕ່ແມ່ນຄວາມພາກພູມໃຈ, ເປັນໂອກາດເພື່ອພົບປະແລກປ່ຽນ, ແບ່ງປັນວັດທະນະທຳທີ່ເປັນເອກະລັກສະເພາະຂອງຊາດຕົນເອງເທົ່ານັ້ນ, ຫາກຍັງເປັນໂອກາດເພື່ອຜູກພັນກັບໂຮງຮຽນ ແລະ ດິນແດນໄທງວຽນຫຼາຍກວ່າອີກດ້ວຍ.
ພາຍຫຼັງພິທີກໍາແມ່ນການຫຼິ້ນບຸນ, ບັນດານັກສຶກສາລາວ, ຄູ-ອາຈານ ແລະ ເພື່ອນມິດຫວຽດນາມ ໄດ້ເຕົ້າໂຮມນັ່ງນໍາກັນຢູ່ອ້ອມພາຂວັນເຊິ່ງເປັນຈຸດພິເສດໃນວັດທະນະທຳຂອງອານາຈັກລ້ານຊ້າງ, ມີຄຳອວຍພອນອັນດີງາມໃຫ້ແກ່ກັນ.
ສໍານີ ທອງໃໝ່, ນັກສຶກສາສາຍໄອທີ, ໂຮງຮຽນ ວິທະຍາໄລໄທງວຽນ ໃຫ້ຮູ້ວ່າ: ນີ້ແມ່ນປີທີ 3 ທີ່ນ້ອງໄດ້ຕ້ອນຮັບປີໃໝ່ຢູ່ ຫວຽດນາມ, ແຕ່ລະປີກໍມີຄວາມຊົງຈຳທີ່ອາດລືມບໍ່ໄດ້ ເມື່ອນ້ອງໄດ້ເຂົ້າຮ່ວມບັນດາພິທີກໍາ, ກິດຈະກໍາວັດທະນະທຳ ແລະ ກິລາ ໃນກ່ອນ ແລະ ໃນວັນປີໃໝ່.
“ເຖິງວ່າຢູ່ຫ່າງຈາກບ້ານ, ບໍ່ໄດ້ຢູ່ນໍາກັບຄອບຄົວ, ຍາດພີ່ນ້ອງໃນຍາມປີໃໝ່, ແຕ່ພວກນ້ອງຍັງຮູ້ສຶກດີໃຈທີ່ໄດ້ຮັບການເອົາໃຈໃສ່ ແລະ ຄວາມຮັກແພງຈາກບັນດາຄູອາຈານ, ລຸງປ້ານ້ອາໃນສະມາຄົມມິດຕະພາບ ຫວຽດນາມ - ລາວ ແລະ ການນຳແຂວງ ໄທງວຽນ. ພວກນ້ອງເມື່ອໃດກໍຖືວ່າ ຫວຽດນາມ ແມ່ນບ້ານເກີດເມືອງນອນທີສອງຂອງຕົນ ແລະ ຈະພະຍາຍາມສຶກສາຮໍ່າຮຽນ ແລະ ຝຶກຝົນຫຼໍ່ຫຼອມໃຫ້ດີເພື່ອບໍ່ໃຫ້ທຸກໆຄົນຜິດຫວັງ”, ສໍານີ ທອງໃໝ່ ໃຫ້ຮູ້.
ສຳລັບ ທັດນິດາ ສີວັນຄຳ, ນັກສຶກສາລາວ ທີ່ມີເວລາເປັນ 4 ປີຕິດພັນກັບມະຫາວິທະຍາໄລ ສ້າງຄູ - ມະຫາວິທະຍາໄລໄທງວຽນ, ບັນດາຄູອາຈານບໍ່ພຽງແຕ່ມີຄວາມເອົາໃຈໃສ່ໃນການສຶກສາຮໍ່າຮຽນເທົ່ານັ້ນ ຫາກຍັງດູແລທັງການດໍາລົງຊີວິດຂອງນັກສຶກສາອີກດ້ວຍ. ນັກສຶກສາລາວໃຫ້ຢູ່ຫໍພັກຕ່າງຫາກ, ມີເຮືອນຄົວ, ບໍລິເວນອອກກຳລັງກາຍ, ຢູ່ໃນຫ້ອງນອນມີຕຽງ, ໂຕະ, ເຄື່ອງປັບນໍ້າຮ້ອນ... ຢ່າງຄົບຖ້ວນ.
ໃນທ້າຍປີ 2021, ເມື່ອການລະບາດພະຍາດໂຄວິດ-19 ເກີດຂຶ້ນຢ່າງສັບສົນ, ນາງ ທັດນິດາ ແລະ ບັນດາໝູ່ເພື່ອນຕ້ອງຈຳກັດການອອກໄປນອກເພື່ອກັນການລະບາດ, ບັນດາຄູສອນກໍໄດ້ມາຫໍພັກເພື່ອມອບອາຫານຫຼາຍພັນພູດ, ຜ້າປິດປາກ, ນ້ຳຢາຂ້າເຊື້ອ, ນ້ຳດື່ມໃຫ້ແກ່ນັກສຶກສາ.
"ບັນດາຄູອາຈານກໍໃຫ້ກໍາລັງໃຈ, ຕັກເຕືອນພວກນ້ອງຕ້ອງຮັກສາສຸຂະພາບດີໆ, ປະຕິບັດມາດຕະການການປ້ອງກັນຄວບຄຸມໂຄວິດ-19 ຢ່າງເຂັ້ມງວດ," ນາງ ທັດນິດາ ໃຫ້ຮູ້.
ປັດຈຸບັນ, ມະຫາວິທະຍາໄລໄທງວຽນມີຈໍານວນນັກສຶກສາສາລາວແມ່ນ 1.000 ກວ່າຄົນ, ໃນນັ້ນເຕົ້າໂຮມຫຼາຍຢູ່ມະຫາວິທະຍາໄລອຸດສາຫະກຳ, ມະຫາວິທະຍາໄລໄອທີ ແລະ ສື່ສານ, ມະຫາວິທະຍາໄລສ້າງຄູ, ມະຫາວິທະຍາໄລເສດຖະກິດ ແລະ ບໍລິຫານທຸລະກິດ, ວິທະຍາໄລເສດຖະກິດ ແລະ ເຕັກນິກ…
ການເຊື່ອມຕໍ່ຄອບຄົວຫວຽດ - ລາວ
ນັກສຶກສາລາວ ຍັງມີໂອກາດໄດ້ສຳຜັດກ່ຽວກັບຊີວິດການເປັນຢູ່, ຮູ້ສຶກເຖິງຄວາມຮັກແພງ, ວັດທະນະທຳ ແລະ ຄວາມງາມໃນຊີວິດປະຈຳວັນຂອງຊາວຫວຽດນາມ ໂດຍຜ່ານຫລາຍໂຄງການທີ່ຄອບຄົວຫວຽດນາມ ໜູນຊ່ວຍ ແລະ ຮ່ວມເດີນທາງກັບນັກສຶກສາຕ່າງປະເທດ.
ໃນ 6 ປີຜ່ານມາ, ສະມາຄົມມິດຕະພາບ ຫວຽດນາມ - ລາວ ແຂວງ ໄທງວຽນ ໄດ້ຜັນຂະຫຍາຍ ໂຄງການ Homestay ໂດຍສູນກາງສະມາຄົມປຸກລະດົມຢ່າງມີປະສິດທິຜົນ: ລະດັບດ້ານພາສາຫວຽດ ຂອງນ້ອງໆນັກຮຽນລາວ ໄດ້ຍົກສູງ; ຄວາມສາມາດໃນການສົນທະນາມີຄວາມຫມັ້ນໃຈ ແລະ ດີກວ່າ; ມີຄວາມເຂົ້າໃຈກວ່າກ່ຽວກັບວັດທະນະທຳຫວຽດນາມ ແລະ ນໍ້າໃຈຂອງຊາວຫວຽດນາມເວົ້າລວມ, ແຂວງໄທງວຽນ ເວົ້າສະເພາະຕໍ່ຊາວລາວ...
ສະມາຊິກສະມາຄົມມິດຕະພາບຫວຽດນາມ - ລາວ ແຂວງ ໄທງວຽນ, ຄູສອນຂອງບັນດາໂຮງຮຽນທີ່ມີນັກຮຽນລາວສຶກສາຮ່ຳຮຽນ ມັກຮັບເຂົາເຈົ້າກັບເມືອຄອບຄົວຂອງຕົນໃນຍາມບຸນ, ປີໃໝ່ ເພື່ອໃຫ້ເຂົາເຈົ້າໄດ້ແລກປ່ຽນພາສາ, ວັດທະນະທຳຄອບຄົວ, ຊີມອາຫານຫວຽດ. ບັນດານ້ອງໆໄດ້ຮຽນເພງຫວຽດນາມ, ແຂ່ງຮ້ອງເພງຊາດຫວຽດນາມ; ໄດ້ໄປຊົນນະບົດເພື່ອທ່ອງທ່ຽວ ແລະ ເຂົ້າຮ່ວມບັນດາກິດຈະກໍາຜະລິດກະສິກຳ. ພ້ອມກັນນັ້ນ ນ້ອງໆນັກຮຽນກໍໄດ້ໄປທ່ຽວເຂດຮ່ອງຮອຍ ATK ດິງຮ່໋ວາ, ວິຫານບູຊາ ເຢືອງຕຶມິງ, ວັດຮາງ, ວັດຝູຫຼຽນ, ຫໍພິພິທະພັນວັດທະນະທຳບັນດາເຜົ່າຫວຽດນາມ, ໜອງນູຍກົກ, ໜອງບາເບ໊...
ທ່ານ ຫງວຽນຕ໋ຽນລອງ, ຮອງປະທານສະມາຄົມມິດຕະພາບຫວຽດນາມ - ລາວ ໃຫ້ຮູ້ວ່າ: ໜຶ່ງໃນບັນດາໜ້າທີ່ຂອງສະມາຄົມມິດຕະພາບຫວຽດນາມ - ລາວ ແມ່ນເບິ່ງແຍງດູແລນັກຮຽນ, ນັກສຶກສາລາວທີ່ມາສຶກສາຮ່ຳຮຽນຢູ່ຫວຽດນາມ.
ພ້ອມກັນກັບການປຸກລະດົມໃຫ້ລູກຫຼານໄປຮ່ຳຮຽນຢູ່ ຫວຽດນາມ, ກໍຄືເຊື່ອມຕໍ່ລະຫວ່າງພວກລູກຫຼານກັບບັນດາຄອບຄົວຫວຽດ, ໃນໄລຍະຈະມາເຖິງ, ສອງສະມາຄົມມິດຕະພາບຈະເພີ່ມທະວີການເຊື່ອມຕໍ່ລະຫວ່າງຄອບຄົວຫວຽດນາມທີ່ເປັນຜູ້ອຸປະຖຳ ແລະ ຄອບຄົວຢູ່ລາວ ເພື່ອເຮັດໃຫ້ຕິດພັນກັນເລິກເຊິ່ງກວ່າອີກ.
ສາຍພົວພັນນີ້ຍັງຄົງໄດ້ຮັກສາໄວ້ພາຍຫຼັງທີ່ພວກລູກຫຼານຮຽນຈົບແລ້ວ, ກັບໄປປະເທດລາວເພື່ອເຮັດວຽກ. ຖ້າເຮັດໄດ້ຄືແນວນັ້ນ, ພວກເຮົາຈະມີຄອບຄົວຫວຽດ - ລາວ ນັບໝື່ນໆຄອບຄົວໄດ້ເຊື່ອມຕໍ່ເຂົ້າກັນ, ໂດຍຜ່ານນັ້ນກໍເພື່ອປັບປຸງນໍ້າໃຈສາມັກຄີ, ມິດຕະພາບລະຫວ່າງປະຊາຊົນສອງປະເທດ.
ຫອມມາລາ
