ເພີ່ມທະວີການເປັນຄູ່ຮ່ວມ ເພື່ອເລັ່ງລັດການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ການສ້າງແຜນພັດທະນາແຫ່ງຊາດ

ທ່ານ ສອນໄຊ ສີພັນດອນ

ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ກ່າວວ່າ: ລັດຖະບານ ສປປ ລາວ ໄດ້ເອົາ ໃຈໃສ່ໃນການຈັດຕັ້ງ ຜັນຂະຫຍາຍບັນດາເປົ້າໝາຍຕ່າງໆຂອງ ການພັດທະນາແບບຍືນຍົງ (SDGs) ໂດຍສະເພາະການຈັດຕັ້ງປະຕິບັດເປົ້າໝາຍ 18 ຂອງ ສປປ ລາວ ກ່ຽວກັບການເກັບກູ້ລະເບີດບໍ່ທັນແຕກ. ເພື່ອສຸມໃສ່ການຫລຸດພົ້ນ ອອກຈາກສະຖານະພາບ ການເປັນປະເທດດ້ອຍພັດທະນາ (LDC), ກໍ່ຈະໄດ້ຖືກປະເມີນເປັນຄັ້ງທີ່ສອງໃນປີ 2021, ຖ້າຫາກວ່າຜ່ານການປະເມີນ ກໍ່ຈະສາມາດປະກາດຫລຸດພົ້ນອອກໄດ້ໃນປີ 2024. ປັດຈຸບັນ ສປປ ລາວ ສາມາດບັນລຸໄດ້ 2 ໃນ 3 ເງື່ອນໄຂຕາມມາດຖານທີ່ໄດ້ກຳນົດໄວ້ ຄື: ລວມຍອດລາຍໄດ້ແຫ່ງຊາດຕໍ່ຫົວຄົນ (GNI) ແລະ ດັດສະນີຊັບສິນມະນຸດ (HAI), ສໍາລັບດັດສະນີຄວາມບອບບາງດ້ານເສດຖະກິດ (EVI) ຍັງບໍ່ສາມາດບັນລຸໄດ້ຕາມມາດຖານ. ໜຶ່ງໃນສາເຫດແມ່ນ ລັດຖະບານ ຈໍາເປັນຕ້ອງໄດ້ຫັນງົບປະມານ ປົກກະຕິໄປສູ່ການແກ້ໄຂໄພພິບັດ ແລະ ເລັ່ງປັບປຸງ ໂຄງລ່າງພື້ນຖານທີ່ຖືກທໍາລາຍ ໃຫ້ກັບມານໍາໃຊ້ໄດ້ປົກກະຕິໂດຍໄວ.

ກອງປະຊຸມໂຕະມົນປະຈຳປີ 2019 ໄດ້ເປີດຂຶ້ນ ໃນວັນທີ 26 ພະຈິກ 2019

ທ່ານ ຄຳຂັນ ຈັນທະວີສຸກ, ກ່າວວ່າ: ວຽກງານຂອງຂັ້ນແຂວງ ແມ່ນສຸມໃສ່ການຈັດຕັ້ງປະຕິ ບັດ ແຜນພັດທະນາເສດຖະກິດສັງຄົມໃນ 9 ເດືອນ ປະຈຳປີ 2019 ຂອງແຂວງຫລວງພະບາງ ແລະ ການກະກຽມແຜນພັດທະນາ ເສດຖະກິດສັງຄົມແຫ່ງຊາດຄັ້ງທີ VIII (2021-2025) ຫລັງຈາກນັ້ນ, ທ່ານ ນາງ ຊາຣ່າ ຊິກເກັນເນສ ຜູ້ປະສານງານ ຂອງອົງການສະຫະປະຊາຊາດ ປະຈຳ ສປປ ລາວ ກໍໄດ້ກ່າວວ່າ: ການເພີ່ມທະວີການເປັນຄູ່ຮ່ວມພັດທະນາທີ່ດີ ບັນດາຄູ່ຮ່ວມພັດທະນາ ແມ່ນໄດ້ເອົາໃຈໃສ່ໃນການສະໜັບສະໜູນ ແລະ ຊ່ວຍເຫລືອຫລາຍດ້ານເຊັ່ນ, ການຮັບມືກັບຄວາມສ່ຽງຈາກການເກີດໄພພິບັດທຳມະຊາດ, ການປ່ຽນແປງດິນຟ້າອາກາດ ແລະ ການຫລຸດຜ່ອນການຕັດໄມ້ທຳລາຍປ່າ. ນອກຈາກນັ້ນ, ຍັງໄດ້ສຸມໃສ່ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ແລະ ເປົ້າໝາຍການຫລຸດພົ້ນອອກຈາກ ສະຖານະພາບການ ເປັນປະເທດດ້ອຍພັດທະນາ (LDC).

ໃນກອງປະຊຸມໂຕະມົນປະຈຳປີ 2019 ຄັ້ງນີ້ ໄດ້ຮັບຟັງການນໍາສະເໜີ ກ່ຽວກັບຜົນສຳເລັດ ຂອງການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ແຫ່ງຊາດ ປະຈຳປີ 2019, ແຜນບູລິມະສິດສຳລັບປີ 2020 ແລະ ການກະກຽມສ້າງແຜນພັດທະນາ ເສດຖະກິດ-ສັງຄົມແຫ່ງຊາດ 05 ປີ ຄັ້ງທີ IX. ນອກຈາກນີ້, ໄດ້ຮັບຟັງການລາຍງານຜົນ ຂອງການປຶກສາຫາລືກຸ່ມສົນທະນາຕ່າງໆ ຂອງ ວັນທີ 25 ພະຈິກ 2019 ໃນ 04 ຂົງເຂດທີ່ບັນດາຮອງລັດຖະມົນຕີ, ກະຊວງຂະແໜງການຕ່າງໆໄດ້ນໍາສະເໜີຕົ້ນຕໍ ຄື: ໃນຂົງເຂດຫົວຂໍ້ກ່ຽວກັບ ການຫລຸດພົ້ນອອກຈາກ ສະຖານະພາບການເປັນປະ ເທດດ້ອຍພັດທະນາ ກອງປະຊຸມໄດ້ນໍາສະເໜີຂົງເຂດທີ່ທາງພາກລັດ ແລະ ຄູ່ຮ່ວມພັດທະນາຕ້ອງເອົາໃຈໃສ່ເປັນຕົ້ນແມ່ນ ການວາງແຜນທີ່ເປັນແຜນງານໄລຍະຍາວ ທີ່ສອດຄ່ອງແຜນງົບປະມານ ປັບ ປຸງກົນໄກການ ການຮ່ວມມືທີ່ມີທຸກພາກສ່ວນ ມີສ່ວນຮ່ວມຢ່າງມີປະສິດທິຜົນ, ສູ້ຊົນລະດົມທຶນ ແລະ ນໍາໃຊ້ທຶນຢ່າງມີປະສິດທິຜົນ ເພື່ອແກ້ໄຂຄວາມທຸກຍາກ. ຂົງເຂດການຈັດຕັ້ງຜັນຂະຫຍາຍ ເປົ້າໝາຍການພັດທະນາແບບຍືນຍົງ ຕ້ອງມີການພົວພັນກັບ ຫລາຍຂະແໜງການ ແລະ ເຊື່ອມສານກັບແຜນພັດທະນາ ເສດຖະກິດ-ສັງຄົມແຫ່ງຊາດ, ການເປັນຄູ່ຮ່ວມຂອງການພັດທະນາ ແລະ ສ່ວນຮ່ວມຂອງຫລາຍພາກສ່ວນແມ່ນສຳຄັນ ໃນການຈັດຕັ້ງເປົ້າໝາຍ ການພັດທະນາແບບຍືນຍົງ (SDGs), ເຄື່ອງມື ແລະ 8 ຫລັກການຂອງ VDCAP ວ່າດ້ວຍການເປັນຄູ່ຮ່ວມ ເພື່ອການພັດທະນາ ເປັນເຄື່ອງມືໃນການຈັດຕັ້ງ ບັນດາແຜນງານ/ໂຄງການ.

ກອງປະຊຸມໄດ້ປຶກສາຫາລື ແລະ ສະເໜີເອົາວຽກງານຫລຸດຜ່ອນຄວາມສ່ຽງ ທີ່ເກີດຈາກໄພພິບັດທຳມະຊາດ ເປັນວຽກງານບູລິມະສິດ ເພື່ອເຊື່ອມສານເຂົ້າໃນ ແຜນພັດທະນາເສດຖະກິດສັງຄົມ 5 ປີຄັ້ງທີ IX. ຂົງເຂດການເຊື່ອມສານວຽກງານການປ່ຽນແປງດິນຟ້າອາກາດ ເຂົ້າໃນແຜນພັດທະນາ ເສດຖະກິດ-ສັງຄົມແຫ່ງຊາດ 05 ປີ ຄັ້ງທີ IX, ລວມທັງ ການຈັດຕັ້ງປະຕິບັດຍຸດ ທະສາດການເຕີບໂຕສີຂຽວ ຂອງ ສປປ ລາວ ກອງປະຊຸມໄດ້ຍົກໃຫ້ເຫັນເຖິງ ຄວາມສໍາຄັນໃນວຽກງານດັ່ງກ່າວ ທີ່ຕິດພັນກັບຫລາຍຂະແໜງການ ເຊິ່ງຕ້ອງໄດ້ເພີ່ມທະວີຂອດ ການປະສານງານໃນຂັ້ນສູນກາງ ແລະ ທ້ອງຖິ່ນ ໃຫ້ມີຄວາມສອດຄ່ອງ ແລະ ກົມກຽວ ພ້ອມທັງສ້າງຂີດຄວາມສາມາດ ແລະ ປູກຈິດສໍານຶກໃຫ້ແກ່ປະຊາຊົນ ໃນການປົກປັກຮັກສາສິ່ງແວດລ້ອມ ໂດຍສະ ເພາະລະບົບນິເວດຕ່າງໆ. ນອກຈາກນີ້, ຄະນະປະທານ, ຜູ້ເຂົ້າຮ່ວມກອງປະຊຸມທັງໝົດ ແລະ ນ້ອງນັກຮຽນ ຈາກມະຫາວີທະຍາໄລສຸພານຸວົງ, ວິທະຍາໄລການເງິນພາກເໜືອ ແລະ ວິທະຍາໄລ ວິທະ ຍາສາດ ແລະ ສຸຂະພາບ ຫລາຍກ່ວາ 60 ຄົນ ໄດ້ເຂົ້າທ່ຽວຊົມງານວາງສະແດງຜົນສໍາເລັດຂອງການພັດທະນາ ເພື່ອເປັນການຂ່ຳນັບຮັບຕ້ອນ ກອງປະຊຸມໂຕະມົນປະຈໍາປີ 2019.

ກອງປະຊຸມໂຕະມົນຄັ້ງນີ້, ໄດ້ດໍາເນີນດ້ວຍບັນຍາກາດອັນຟົດຟື້ນ, ມີການປຶກສາຫາລື ແລະ ມີຄໍາເຫັນຢ່າງກົງໄປກົງມາທີ່ຫລາກຫລາຍ ເຊິ່ງເຫັນວ່າກອງປະຊຸມໄດ້ມີຜົນສໍາເລັດຕາມລະດັບຄາດ ໝາຍທີ່ວາງໄວ້. ພິເສດ, ເພື່ອເປັນການຈັດຕັ້ງປະຕິບັດນາໂຍບາຍ ການພັດທະນາສີຂຽວ ກອງປະຊຸມໂຕະມົນປະຈໍາ ປີ 2019 ໄດ້ຊຸກຍູ້ໃຫ້ມີການຫລຸດຜ່ອນການນໍາໃຊ້ປາສຕິກ ແລະ ເຈ້ຍ, ຊຶ່ງຜູ້ເຂົ້າຮ່ວມຈະໄດ້ຮັບຈອກນໍ້າໄມ້ໄຜ່ ທີ່ສາມາດນໍາໃຊ້ຄືນໄດ້ ແລະ ຈະມີການຫລຸດຜ່ອນການພິມເອກະສານໃຫ້ຫລາຍທີ່ສຸດ.

（ແຫຼ່ງ​ຂໍ້​ມູນ​： ຂປລ）