![]() |
ກອງປະຊຸມສຳມະນາ (ພາບ: PHA) |
ຫວ່າງແລ້ວນີ້, ຢູ່ຮ່າໂນ້ຍ, ຄູ່ຮ່ວມມືກະທຳກ່ຽວກັບຢາງປຼາສຕິກ ແລະ ສຸຂະພາບ (PHA) ພ້ອມກັບ FHI 360 ໄດ້ຮ່ວມຈັດກອງປະຊຸມສຳມະນາ “ຜົນກະທົບຕໍ່ສຸຂະພາບຂອງສິ່ງເສດເຫຼືອປຼາສຕິກ - ບັນດາຂໍ້ສະເໜີນະໂຍບາຍ ແລະ ການແຊກແຊງຢູ່ ຫວຽດນາມ.”
ກິດຈະກຳດັ່ງກ່າວເປັນສ່ວນໜຶ່ງຂອງໂຄງການ “ຫຼຸດຜ່ອນມົນລະພິດປຼາສຕິກດ້ວຍວິທີແກ້ໄຂໃນທ້ອງຖິ່ນ” (LSPP) ທີ່ໄດ້ຮັບທຶນຈາກອົງການພັດທະນາສາກົນຂອງສະຫະລັດອາເມລິກາ (USAID).
ກອງປະຊຸມສຳມະນາໄດ້ຍົກໃຫ້ເຫັນຄວາມສ່ຽງດ້ານສຸຂະພາບທີ່ກ່ຽວຂ້ອງເຖິງການຜະລິດ, ການບໍລິໂພກ ແລະ ນຳມາຜະລິດໃຊ້ຄືນໃໝ່, ຈາກນັ້ນ ກໍໄດ້ຍົກອອກຂໍ້ສະເໜີແນະເພື່ອຊຸກຍູ້ການຄົ້ນຄວ້າຫຼຸດຜ່ອນຜົນກະທົບຈາກປຼາສຕິກຕໍ່ສຸຂະພາບ ແລະ ສິ່ງແວດລ້ອມການດຳລົງຊີວິດຢູ່ຫວຽດນາມ.
ຢູ່ຫວຽດນາມ, ແຕ່ລະປີໄດ້ຜະລິດສິ່ງເສດເຫຼືອຈາກການດຳລົງຊີວິດປະມານ 25 ລ້ານໂຕນ, ໃນນັ້ນອັດຕາສ່ວນສິ່ງເສດເຫຼືອປຼາສຕິກກວມ 10-20% (ປະມານ 2,5 ຫາ 5 ລ້ານໂຕນ) ແລະ ເພີ່ມຂຶ້ນພາຍຫຼັງໂລກລະບາດໂຄວິດ-19 ຢ່າງເຫັນໄດ້ຊັດ. ສິ່ງເສດເຫຼືອປຼາສຕິກອາດຈະຖືກປ່ອຍອອກມາໃນສິ່ງແວດລ້ອມ ແລະ ແຊກຊຶມເຂົ້າໄປໃນລະບົບຕ່ອງໂສ້ອາຫານໂດຍການແຕກອອກເປັນປ່ຽງ ຫຼື ຕ່ອນນ້ອຍໆຕາມການເວລາ.
ກອງປະຊຸມໄດ້ສຸມໃສ່ປຶກສາຫາລືຜົນກະທົບຕໍ່ສຸຂະພາບຂອງປຼາສຕິກຕໍ່ກັບສຸຂະພາບຂອງມະນຸດຢູ່ຫວຽດນາມ; ຕົວຈິງຂອງມົນລະພິດ microplastic ແລະ ຜົນກະທົບຕໍ່ສຸຂະພາບ; ຜົນກະທົບຕໍ່ສຸຂະພາບຂອງວິວັດການລີໄຊເຄີນສິ່ງເສດເຫຼືອປຼາສຕິກ; ພ້ອມກັນນັ້ນກໍຍົກອອກບັນດາຂໍ້ສະເໜີແນະ ແລະ ທິດທາງການເຄື່ອນໄຫວໃນຕໍ່ໜ້າ.
ໂດຍແບ່ງປັນກ່ຽວກັບພາລະກິດຂອງ PHA, ທ່ານ ປທ ຫງວຽນດຶກວິງ, ເລຂາທິການໃຫຍ່ PHA ເນັ້ນໜັກວ່າ: “PHA ຈະສົມທົບກັບບັນດາຄູ່ຮ່ວມມື ແລະ ເຄືອຂ່າຍທີ່ກ່ຽວຂ້ອງ ເພື່ອແນໃສ່ສ້າງປະຊາຄົມຮ່ວມມືກ່ຽວກັບບັນຫາປຼາສຕິກ ແລະ ສຸຂະພາບ ແລະ ສົມທົບກັນຜັນຂະຫຍາຍບັນດາການເຄື່ອນໄຫວຄື: ຄົ້ນຄ້ວາ, ກໍ່ສ້າງ ແລະ ສື່ສານບັນດາຕົວແບບປະຕິບັດທີ່ດີ; ການໂອ້ລົມສົນທະນາ ແລະ ໂຄສະນານະໂຍບາຍເພື່ອຫລຸດຜ່ອນຜົນກະທົບຈາກມົນລະພິດປຼາສຕິກຕໍ່ສຸຂະພາບຂອງມະນຸດ ແລະ ສິ່ງແວດລ້ອມການດຳລົງຊີວິດຢູ່ ຫວຽດນາມ”.
ທ່ານ ປອ ນາງ ຫງວຽນທິທູນາມ, ຫົວໜ້າຜູ້ຕາງໜ້າ FHI 360 ຫວຽດນາມ ໃຫ້ຮູ້ວ່າ, ດ້ວຍທ່າແຮງວິຊາສະເພາະ ແລະ ປະສົບການໃນການຄົ້ນຄວ້າ ແລະ ໜູນຊ່ວຍດ້ານເຕັກນິກສາກົນ, FHI 360 ພ້ອມແລ້ວທີ່ຈະນຳເອົາຂໍ້ລິເລີ່ມ ແລະ ພ້ອມກັບບັນດາອົງການຄຸ້ມຄອງ, ອົງການຈັດຕັ້ງ ແລະ ປະຊາຄົມໃນບັນດາຂົງເຂດ ແລະ ປະຊາຄົມໃນຄວາມພະຍາຍາມເພື່ອແກ້ໄຂມົນລະພິດປຼາສຕິກ ແລະ ຜົນກະທົບທາງລົບຕໍ່ສຸຂະພາບຂອງມະນຸດ ແລະ ສິ່ງແວດລ້ອມ.
ບຸນຄົງ