 |
ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ວັນທີ 12 ພະຈິກ 2019
ສຳລັບມື້ທີ 3 ນີ້ ສສຊ ໄດ້ສືບຕໍ່ປະກອບຄຳຄິດຄຳເຫັນຕໍ່ວຽກງານລັດຖະບານ ເປັນຕົ້ນ ບົດລາຍງານລັດຖະບານ ອົງການກວດສອບແຫ່ງລັດ ແລະ ອົງການກວດກາລັດຖະບານ ໃນນີ້ ທ່ານນາງ ຄຳຈອມພູ ສີລິທຳ ສສຊ ເຂດເລືອກຕັ້ງທີ 5 ແຂວງບໍ່ແກ້ວ ໄດ້ສະເໜີໃຫ້ລັດຖະບານແກ້ໄຂບັນຫາການສຳປະທານທີ່ດິນປູກກ້ວຍຂອງນັກລົງທຶນຕ່າງປະເທດທີ່ສົ່ງຜົນກະທົບຕໍ່ສຸຂະພາບ ແລະ ສິ່ງແວດລ້ອມທຳມະຊາດ ຈາກການໃຊ້ສານເຄມີບາງຊະນິດໃນການປູກກ້ວຍ ພ້ອມທັງໃຫ້ຢຸດຕິການປູກກ້ວຍທັນທີ ພາຍຫຼັງທີ່ໝົດອາຍຸການສຳປະທານທີ່ດິນປູກກ້ວຍ ແລະ ບໍ່ໃຫ້ລັດຖະບານຕໍ່ອາຍຸສຳປະທານຕື່ມອີກ ເພາະໄລຍະຜ່ານມາຍັງມີສວນກ້ວຍຈຳນວນໜຶ່ງມີການລັກລອບປູກຄືນ ເຖິງວ່າອາຍຸການສຳປະທານເນື້ອທີ່ດິນດັ່ງກ່າວໝົດອາຍຸແລ້ວ ຈຶ່ງຢາກໃຫ້ ລັດຖະບານແກ້ໄຂບັນຫານີ້ຢ່າງຈິງຈັງ ແລະ ຫັນມາໃຫ້ປະຊາຊົນປູກພືດທີ່ປອດສານພິດແທນ ເປັນຕົ້ນປູກເຂົ້າເປັນສິນຄ້າ ແລະ ປູກພືດຕາມລະດູການ ເພື່ອສົ່ງເສີມໃຫ້ປະຊາຊົນຢູ່ເຂດທ້ອງຖິ່ນທີ່ມີທ່າແຮງຫັນມາຜະລິດພືດເປັນສິນຄ້ານັບມື້ຫຼາຍຂຶ້ນ.
ທ່ານ ດົງເພັດ ພະຍົນ ສສຊ ເຂດ 16 ແຂວງເຊກອງ ສະເໜີລັດຖະບານມີມາດຕະການໃນການຄວບຄຸມບັນຫາໄພພິບັດ ແລະ ຜົນເສຍຫາຍຈາກໄພພິບັດທຳມະຊາດ ມີການບໍລິຫານຈັດການນ້ຳ ທີ່ໄດ້ມາດຕະ ຖານ ເພື່ອແກ້ໄຂບັນຫານ້ຳຖ້ວມຢູ່ຕາມເຂດພູດອຍ ທີ່ມັນໄດ້ສົ່ງຜົນກະທົບໃນດ້ານຄົມມະນາຄົມ ຂົນສົ່ງ ຂະ ແໜງກະສິກຳ ແລະ ພື້ນຖານໂຄງລ່າງຕ່າງໆ ການອອກແບບກໍ່ສ້າງເສັ້ນທາງ ແລະ ຂົວ ໃຫ້ອອກແບບໄດ້ມາດຕະຖານສາກົນ ເພື່ອປ້ອງກັນດິນເຈື່ອນ ແລະ ຂົວຂາດ ເວລາທີ່ມີຝົນຕົກໜັກ.
ທ່ານນາງ ສົມຈັນ ຈິດວົງເດືອນ ສສຊ ເຂດ 4 ແຂວງອຸດົມໄຊ ສະເໜີໃຫ້ລັດຖະບານຊຸກຍູ້ສົ່ງເສີມປະ ຊາຊົນປູກພືດລະດູແລ້ງ ເພາະໄລຍະຜ່ານມາແຂວງອຸດົມໄຊ ໄດ້ຮັບຜົນກະທົບຈາກໄພພິບັດ ປະຊາຊົນບາງຄອບຄົວຍັງບໍ່ທັນໄດ້ຮັບຄ່າຊົດເຊີຍ ປີນີ້ຊ້ຳພັດມາປະສົບກັບໄພແຫ້ງແລ້ງ ປະຊາຊົນຢູ່ 7 ເມືອງ ບໍ່ສາມາດປູກພືດລະດູແລ້ງໄດ້ ເຊັ່ນ: ປູກສາລີທີ່ເປັນທ່າແຮງສົ່ງອອກອັນດັບຕົ້ນໆໄປຂາຍຢູ່ຕ່າງປະເທດ ປູກໄດ້ໜ້ອຍບໍ່ພຽງພໍຕາມຄວາມຕ້ອງການຂອງຕະຫຼາດ ນອກນີ້ ປະຊາຊົນທີ່ລ້ຽງໝູກໍພົບກັບພະຍາດໝູອະຫິວາອາຟຣິກາ ເຮັດໃຫ້ໝູຈຳນວນຫຼວງຫຼາຍລົ້ມຕາຍ ເຮັດໃຫ້ເຂົາເຈົ້າເປັນໜີ້ທະນາຄານ ຈຶ່ງໄດ້ສະເໜີໃຫ້ລັດຖະບານ ແລະ ຂະແໜງການກ່ຽວຂ້ອງ ຊ່ວຍແກ້ໄຂການປູກພືດລະດູແລງປີນີ້ ເພື່ອໃຫ້ປະຊາຊົນມີຊີວິດການເປັນຢູ່ດີຂຶ້ນ.（ແຫຼ່ງຂໍ້ມູນ： vientianemai.net）
