| ນັກຊ່ຽວຊານລັດເຊຍ ຕີລາຄາສູງຕໍ່ຄວາມໄວໃນການເຕີບໂຕດ້ານເສດຖະກິດຂອງ ຫວຽດນາມ | |
| ແບ່ງປັນປະສົບການໃນການເຄື່ອນໄຫວຢູ່ນະຄອນ ດ່ານັງ ແລະ ລາວ |
 |
| ທ່ານເລຂາທິການໃຫຍ່ ຫງວຽນຟູ໋ຈ້ອງ ກ່າວຄຳເຫັນທີ່ພິທີ (ພາບ: ຫງວຽນຕຸງ) |
ຕອນເຊົ້າວັນທີ 18 ກໍລະກົດ, ຢູ່ຮ່າໂນ້ຍ, ໄດ້ດຳເນີນພິທີສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ. ເຂົ້າຮ່ວມພິທີສະເຫຼີມສະຫຼອງມີ: ທ່ານເລຂາທິການໃຫຍ່ ຫງວຽນຟູ໋ຈ້ອງ, ທ່ານປະທານປະເທດ ຫງວຽນຊວນຟຸກ; ທ່ານນາຍົກລັດຖະມົນຕີ ຟ້າມມິງຈິງ; ທ່ານປະທານສະພາແຫ່ງຊາດ ເວືອງດິ່ງເຫ້ວ; ທ່ານຮອງນາຍົກລັດຖະມົນຕີ ຟ້າມບິ່ງມິງ; ທ່ານ ໂດວັນຈຽນ ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ; ອະດີດການນຳພັກ ແລະ ລັດ, ການນຳຂັ້ນສູນກາງ, ບັນດາກະຊວງ, ຂະແໜງການ...
ຝ່າຍລາວ, ມີທ່ານ ບຸນທອງ ຈິດມະນີ ຮອງປະທານປະເທດ; ທ່ານ ສິນລະວົງ ຄຸດໄພທູນ ປະທານຄະນະກຳມະການສູນກາງແນວລາວສ້າງຊາດ; ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດລາວ; ສະມາຊິກຄະນະຜູ້ແທນຂັ້ນສູງພັກ ແລະ ລັດລາວ; ທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ແລະ ບັນດາສະມາຊິກຂອງສະຖານທູດ; ຜູ້ຕາງໜ້າພົນລະເມືອງລາວ ແລະ ນັກສຶກສາຢູ່ຕ່າງປະເທດທີ່ໄປຮຽນຢູ່ຫວຽດນາມ.
ເຂົ້າຮ່ວມພິທີມີຜູ້ຕາງໜ້າສະຫະພັນບັນດາອົງການມິດຕະພາບຫວຽດນາມ; ສະມາຄົມມິດຕະພາບ ຫວຽດນາມ-ລາວ; ຄະນະປະສານງານທະຫານອາສາສະຫມັກ ແລະ ຊ່ຽວຊານການທະຫານຫວຽດນາມ ຢູ່ ລາວ; ພະນັກງານປະຕິວັດນັກຮົບເກົ່າ, ແມ່ວິລະຊົນຫວຽດນາມ, ວິລະຊົນຂອງກອງທັບປະຊາຊົນ, ວິລະຊົນກຳມະກອນ, ນາຍພົນທະຫານ, ນັກຮົບເກົ່າ, ປະຊາຊົນ, ປັນຍາຊົນ ແລະ ຜູ້ຕາງໜ້າທຸກຊັ້ນວັນນະຊາວນະຄອນຫຼວງ.
ພ້ອມກັນແບ່ງປັນຄວາມຫວັງຢາກຫຼຸດພົ້ນອອກຈາກແອກປົກຄອງຂອງຫົວເມືອງຂຶ້ນ
ກ່າວຄຳເຫັນທີ່ພິທີສະເຫຼີມສະຫຼອງ, ໃນນາມການນຳຂອງພັກ, ລັດ ແລະ ປະຊາຊົນຫວຽດນາມ, ທ່ານເລຂາທິການໃຫຍ່ ຫງວຽນຟູ໋ຈ້ອງ ສົ່ງເຖິງພັກ, ລັດ ແລະ ປະຊາຊົນລາວ ດ້ວຍຄວາມຮູ້ສຶກສະໜິດສະໜົມ, ຈິງໃຈ ແລະ ຄຳອວຍພອນອັນອົບອຸ່ນ.
ທ່ານເລຂາທິການໃຫຍ່ຊີ້ແຈ້ງວ່າ: ໃນຖານະເປັນປະເທດບ້ານໃກ້ເຮືອນຄຽງ, ກິນນ້ຳຂອງສາຍດຽວກັນ, ມີສາຍພູຫຼວງທີ່ໃຫຍ່ໂຕມະຖານ, ຫວຽດນາມ ແລະ ລາວ ມີຮີດຄອງປະເພນີແຫ່ງການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ຕິດພັນສະໜິດສະໜົມທີ່ສຸດໃນປະຫວັດສາດແຫ່ງການສ້າງສາ ແລະ ປົກປັກຮັກສາປະເທດຊາດຂອງສອງປະເທດ. ຫຼາຍກວ່າ 9 ທົດສະວັດຜ່ານມາ, ການແບ່ງປັນຄວາມມຸ່ງຫວັງຢາກຫຼຸດພົ້ນອອກຈາກແອກປົກຄອງລະບອບຫົວເມືອງຂຶ້ນ, ຍາດເອົາເອກະລາດແຫ່ງຊາດ, ນັກປະຕິວັດໃນເມື່ອກ່ອນຂອງສອງປະເທດໄດ້ຮ່ວມກັນສ້າງຕັ້ງພັກກອມມູນິດອິນດູຈີນ ໂດຍແມ່ນຕົ້ນກຳເນີດຂອງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ ໃນມື້ນີ້.
ພາຍໃຕ້ການນຳພາຂອງພັກກອມມູນິດອິນດູຈີນ, ການເຄື່ອນໄຫວຕໍ່ສູ້ຂອງປະຊາຊົນຫວຽດນາມ ແລະ ປະຊາຊົນລາວນັບມື້ນັບກວ້າງຂວາງ ແລະ ແໜ້ນແຟ້ນ, ດ້ວຍຈິດໃຈແບບສະຫາຍ, ຖານອ້າຍນ້ອງ ແລະ ນ້ຳໃຈປະຕິວັດ ໄດ້ສ້າງກຳລັງແຮງອັນໃຫຍ່ຫຼວງຊ່ວຍໃຫ້ປະຊາຊົນທັງສອງກຳໄດ້ອຳນາດໃນປີ 1945 ດ້ວຍການສ້າງຕັ້ງລັດຖະບານຫວຽດນາມປະຊາທິປະໄຕສາທາລະນະລັດ ໃນວັນທີ 2 ກັນຍາ ແລະ ລັດຖະບານລາວອິດສະຫຼະ ໃນວັນທີ 12 ຕຸລາ 1945.
ໃນຊຸມປີຕໍ່ມາ, ພັກກອມມູນິດອິນດູຈີນໄດ້ແບ່ງອອກເປັນ 3 ພັກຢູ່ແຕ່ລະປະເທດ ຫວຽດນາມ, ລາວ ແລະ ກຳປູເຈຍ, ໂດຍໄດ້ນຳພາປະເທດພັນທະມິດສູ້ຮົບ, ປະສານສົມທົບ ແລະ ສະໜັບສະໜູນເຊິ່ງກັນ ແລະ ກັນໃນດ້ານການທະຫານ, ການເມືອງ ແລະ ການຕ່າງປະເທດ ພ້ອມກັນຍາດໄດ້ໄຊຊະນະຫຼາຍ, ບັງຄັບໃຫ້ພວກລ່າເມືອງຂຶ້ນຝະຣັ່ງນັ່ງຢູ່ໂຕະເຈລະຈາໂດຍມີການເຂົ້າຮ່ວມຂອງບັນດາສະມາຊິກຖາວອນຂອງສະພາຄວາມໝັ້ນຄົງ ອົງການສະຫະປະຊາຊາດ, ຕະຫຼອດຮອດການຢັ້ງຢືນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງສາມປະເທດທີ່ກອງປະຊຸມ Gieneve ໃນປີ 1954.
ໄຊຊະນະອັນສະຫງ່າລາສີຂອງການປະຕິວັດລາວເວົ້າສະເພາະ ແລະ ສຳພັນທະມິດການສູ້ຮົບຫວຽດນາມ-ລາວ ເວົ້າລວມ ໃນ 8 ປີຕໍ່ມາ ສືບຕໍ່ພາໄປເຖິງການລົງນາມໃນສັນຍາ Gieneve ຂອງປະເທດລາວໃນວັນທີ 23 ກໍລະກົດ 1962, ເຊິ່ງຢັ້ງຢືນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດລາວ.
ຫຼັງນັ້ນ 2 ເດືອນ, ຮອດວັນທີ 5 ກັນຍາ 1962, ສອງປະເທດໄດ້ສ້າງຕັ້ງການພົວພັນທາງການທູດຢ່າງເປັນທາງການ, ໂດຍສະແດງໃຫ້ເຫັນການສືບຕໍ່ພົວພັນຮ່ວມມືຍຸດທະສາດຫວຽດນາມ - ລາວ, ນ້ຳໃຈສາມັກຄີ, ການສະໜັບສະໜູນເຊິ່ງກັນແລະກັນລະຫວ່າງປະຊາຊົນສອງປະເທດນັບທັງດ້ານການທະຫານ ແລະ ການພົວພັນຕ່າງປະເທດ, ເປັນຂີດໝາຍສຳຄັນໃນປະຫວັດສາດການພົວພັນລະຫວ່າງຫວຽດນາມ - ລາວ ໃນຍຸກສະໄໝໃໝ່.
ໃນເວລາກ່ວາ 10 ປີຫຼັງຈາກນັ້ນ, ກອງທັບ ແລະ ປະຊາຊົນສອງປະເທດໄດ້ສືບຕໍ່ຮ່ຽງບ່າຮ່ຽງໄຫຼ່ສະເໝີຕົ້ນສະເໝີປາຍ, ຕໍ່ສູ້ຢ່າງເດັດດ່ຽວໜຽວແໜ້ນ ແລະ ຍາດໄດ້ໄຊຊະນະອັນສະຫງ່າລາສີຂອງສອງຟາກສາຍພູຫຼວງ ແລະ ເສັ້ນທາງປະຫວັດສາດໂຮ່ຈິມິນ ເພື່ອມຸ່ງໄປເຖິງໄຊຊະນະຢ່າງຄົບຖ້ວນຂອງການປະຕິວັດຂອງແຕ່ລະປະເທດໃນປີ 1975. ນັບແຕ່ນັ້ນເປັນຕົ້ນມາ, ການພົວພັນລະຫວ່າງ ຫວຽດນາມ ແລະ ລາວ ໄດ້ຫັນເປັນໜ້າປະຫວັດສາດໃໝ່, ຈາກສຳພັນທະມິດໃນການສູ້ຮົບຢູ່ຕະຄອງດຽວກັນມາເປັນການຮ່ວມມືຮອບດ້ານລະຫວ່າງສອງປະເທດເປັນເອກະລາດ, ອະທິປະໄຕ ນັ້ນແມ່ນປະເທດ ສສ ຫວຽດນາມ ແລະ ສປປ ລາວ.
ພາຍໃຕ້ການນຳພາຂອງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ, ປະຊາຊົນສອງປະເທດໄດ້ຄຽງບ່າຄຽງໄລ່ນັບແຕ່ມື້ເຕັມໄປດ້ວຍສິ່ງທ້າທາຍ ແລະ ຫຍຸ້ງຍາກລຳບາກ, ໃນການປົກປັກຮັກສາ ແລະ ກໍ່ສ້າງພັກສັງຄົມນິຍົມຢູ່ແຕ່ລະປະເທດ. ສອງພັກ, ສອງລັດ ໄດ້ໜູນຊ່ວຍເຊິ່ງກັນແລະກັນກ້າວໄປເຖິງການກໍ່ສ້າງເສດຖະກິດສັງຄົມພາຍຫຼັງສົງຄາມ, ພ້ອມທັງຄ່ອຍໆສ້າງ ແລະ ພັດທະນາການພົວພັນຮ່ວມມືໃນຂົງເຂດສຳຄັນຄື ເສດຖະກິດ,ວັດທະນະທຳ ແລະ ສັງຄົມ, ການສຶກສາ - ບຳລຸງສ້າງ; ການປ້ອງກັນຊາດ, ປ້ອງກັນຄວາມສະຫງົບ ແລະ ການຕ່າງປະເທດ...
ນ້ຳໃຈ ຫວຽດນາມ-ລາວ ຈະໝັ້ນຄົງທະນົງແກ່ນກວ່າພູຜາ ແລະ ແມ່ນ້ຳລ້ຳເຊ
ໃນບົດກ່າວປາໄສ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຢືນຢັນວ່າ: ຍ້ອນຄວາມຕ້ອງການການຮ່ວມມືຢ່າງເລິກເຊິ່ງກວ້າງຂວາງ ແລະ ຮີບດ່ວນລະຫວ່າງສອງປະເທດໃນສະພາບການໃໝ່, ວັນທີ 18 ກໍລະກົດ 1977, ຫວຽດນາມ ແລະ ລາວ ໄດ້ລົງນາມໃນສົນທິສັນຍາມິດຕະພາບ ແລະ ການຮ່ວມມື, ໃນນັ້ນໄດ້ຊີ້ແຈ້ງວ່າ: ສອງຝ່າຍໃຫ້ຄຳໝັ້ນສັນຍາຈະປົກປັກຮັກສາ ແລະ ພັດທະນາສາຍພົວພັນແບບພິເສດຫວຽດນາມ - ລາວ ຢ່າງບໍ່ຢຸດຢັ້ງ, ເພີ່ມທະວີຄວາມສາມັກຄີ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ການຮ່ວມມືຮອບດ້ານໃນໄລຍະຍາວ, ການຊ່ວຍເຫຼືອເຊິ່ງກັນ ແລະ ກັນໃນທຸກດ້ານບົນຈິດໃຈຂອງລັດທິກຳມະຊີບສາກົນ ແລະ ບົນຫຼັກການສະເໝີພາບ, ເຄົາລົບເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ, ເຄົາລົບຜົນປະໂຫຍດອັນຊອບທຳຂອງກັນ, ບໍ່ແຊກແຊງເຂົ້າໃນວຽກງານພາຍໃນຂອງກັນ.
ທ່ານເລຂາທິການໃຫຍ່ກໍ່ຢືນຢັນວ່າ: ຄວາມສາມັກຄີ, ການຮ່ວມມື ແລະ ການຊ່ວຍເຫຼືອເຊິ່ງກັນ ແລະ ກັນລະຫວ່າງ ຫວຽດນາມ - ລາວ ແມ່ນກົດເກນພາວະວິໄວ, ເປັນປັດໄຈສຳຄັນທີ່ມີລັກສະນະເປັນຕາຍຂອງແຕ່ລະພັກ ແລະ ແຕ່ລະປະເທດ; ພ້ອມທັງແມ່ນຊັບສິນອັນລ້ຳຄ່າ ແລະ ແມ່ນພື້ນຖານເພື່ອໃຫ້ສອງປະເທດພວກເຮົາພ້ອມກັນເສີມຂະຫຍາຍໃນບັນດາໄລຍະປະຫວັດສາດຕໍ່ໄປ. ຫວຽດນາມ ແລະ ລາວບໍ່ພຽງແຕ່ແມ່ສອງປະເທດບ້ານໃກ້ເຮືອນຄຽງເທົ່ານັ້ນ, ຫາກຍັງແມ່ນສອງປະເທດອ້າຍນ້ອງ, ສະຫາຍອີກດ້ວຍ.
ໂດຍໄດ້ຮັບຮູ້ຢ່າງເລິກເຊິ່ງວ່າ, ໄຊຊະນະໃນພາລະກິດແຫ່ງການຕໍ່ສູ້ປົດປ່ອຍຊາດໃນເມື່ອກ່ອນກໍ່ຄືໃນການກໍ່ສ້າງປະເທດຊາດສັງຄົມນິຍົມໃນປະຈຸບັນຂອງ ຫວຽດນາມ ລ້ວນແຕ່ຕິດພັນກັບການໜູນນຊ່ວຍອັນລ້ຳຄ່າ, ທັນການ ແລະ ຈິງໃຈຂອງພັກ, ລັດ ແລະ ປະຊາຊົນລາວ. ເນື່ອງໃນໂອກາດນີ້, ທ່ານເລຂາທິການໃຫຍ່ ຫງວຽນຟູ໋ຈ້ອງ ອີກຄັ້ງໜຶ່ງໄດ້ສະແດງຄວາມຂອບອົກຂອບໃຈຢ່າງເລິກເຊິ່ງຂອງພັກ, ລັດ ແລະ ປະຊາຊົນຫວຽດນາມ ທີ່ມີຕໍ່ພັກປະຊາຊົນປະຕິວັດລາວ, ລັດ ແຫ່ງ ສປປ ລາວ ແລະ ປະຊາຊົນລາວອ້າຍນ້ອງ.
“ປະຊາຊົນ ຫວຽດນາມ ໃນວັນນີ້ ແລະ ໃນອະນາຄົດ ຍາມໃດກໍ່ຈົດຈຳ ແລະ ຈຳລຶກຄຳເວົ້າຂອງ ປະທານ ໂຮ່ຈີມິນ ທີ່ວ່າ: “ສອງຊາດຫວຽດນາມ-ລາວໄດ້ ຝັງຄວາມຮັກຢູ່ໃນໃຈ, ຮົ່ງຮ່າທັງແມ່ຂອງ ບໍ່ເລິກປຸນປານໄດ້” ແລະ ທ່ານປະທານ ສຸພານຸວົງ ຖືວ່າ: ນ້ຳໃຈມິດຕະພາບ ຫວຽດນາມ - ລາວ ສູງກວ່າພູຜາ, ຍາວກວ່າແມ່ນ້ຳ, ກວ້າງກວ່າມະຫາສະໝຸດ, ງາມກວ່າເດືອນເພັງ, ຫອມກວ່າດອກໄມ້ໃດໆທີ່ຫອມທີ່ສຸດໃນໂລກ”. ທ່ານເລຂາທິການໃຫຍ່ກ່າວ.
ໃນຖານະເປັນເພື່ອນມິດສະຫາຍທີ່ສະໜິດສະໜົມ, ພັກ, ລັດ ແລະ ປະຊາຊົນ ຫວຽດນາມ ຍາມໃດກໍ່ເອົາໃຈໃສ່ຕິດຕາມກວດກາ ແລະ ມີຄວາມເອກອ້າງທະນົງໃຈຕໍ່ບັນດາຜົນງານອັນໃຫຍ່ຫຼວງ, ຮອບດ້ານ ແລະ ມີຄວາມໝາຍດ້ານປະຫວັດສາດທີ່ພັກ, ລັດ ແລະ ປະຊາຊົນບັນດາເຜົ່າລາວຍາດມາໄດ້ໃນພາລະກິດແຫ່ງການການປະຕິວັດທີ່ສະຫງ່າລາສີຂອງຕົນ.
ສິ້ນສຸດບົດກ່າວສູນທອນພົດ, ທ່ານເລຂາທິການໃຫຍ່ຊີ້ແຈ້ງວ່າ ເຖິງວ່າ ໂລກຈະປ່ຽນແປງແນວໃດກໍ່ຕາມ, ພວກເຮົາຍັງຕັດສິນໃຈພ້ອມກັນຮັກສາ ແລະ ເສີມຂະຫຍາຍການພົວພັນແບບພິເສດ, ສະເໝີຕົ້ນສະເໝີປາຍ ຂອງ ຫວຽດນາມ - ລາວ ຄືດັ່ງຄວາມຫວັງຂອງປະທານ ໄກສອນ ພົມວິຫານ: ພູຍັງອາດມີເຈື່ອນ, ແມ່ນໍ້າຍັງອາດມີເຫືອດແຫ້ງ, ແຕ່ສາຍພົວພັນມິດຕະພາບ ລາວ - ຫວຽດນາມ ຈະຫມັ້ນຄົງຂະຫນົງແກ່ນຊົ່ວກາລະນານ”.
ລາວຢຶດໝັ້ນກັບການພົວພັນມິດຕະພາບ ແລະ ການຮ່ວມມືຮອບດ້ານ ລາວ - ຫວຽດນາມ
 |
| ທ່ານຮອງປະທານປະເທດລາວ ບຸນທອງ ຈິດມະນີ ກ່າວຄຳເຫັນທີ່ພິທີ (ພາບ: ຫງວຽນຕຸງ) |
ກ່າວຄຳເຫັນທີພິທີ, ທ່ານຮອງປະທານປະເທດ ບຸນທອງ ຈິດມະນີ ໄດ້ຫວນຄືນຄວາມຊົງຈຳກ່ຽວກັບນ້ຳໃຈມິດຕະພາບອັນລ້ຳຄ່າລະຫວ່າງພັກ, ລັດ ແລະ ປະຊາຊົນສອງປະເທດ ຫວຽດນາມ - ລາວ, ທ່ານກໍ່ຢັ້ງຢືນວ່າ ພັກ, ລັດ ແລະ ປະຊາຊົນລາວ ໄດ້ຈາລຶກໃນໃຈ ແລະ ສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ທ່ານ ປະທານ ໂຮ່ຈີມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ ແມ່ນຜູ້ກໍ່ສ້າງ ແລະ ເປັນແບບຢ່າງໃສແຈ້ງໃນການປົກຮັກຮັກສາ, ເພີ່ມພູນຄູນສ້າງ ນ້ຳໃຈມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວາງສອງປະເທດ ຫວຽດນາມ - ລາວ ກາຍເປັນຊັບສິນອັນລ້ຳຄ່າ, ແມ່ນກົດເກນຄົງຕົວ ແລະ ພັດທະນາຂອງສອງປະເທດ, ແມ່ນໜຶ່ງໃນປັດໄຈຕັດສິນໄຊຊະນະຂອງການປະຕິວັດແຕ່ລະປະເທດ.
ທ່ານຮອງປະທານປະເທດ ລາວ ບຸນທອງ ຈິດມະນີ ຊີ້ແຈ້ງວ່າ: ພາຍຫຼັງສອງປະເທດກ້າວເຂົ້າສູ່ຍຸກສະໄໝໃໝ່ໃນໄລຍະສັນຕິພາບ, ເອກະລາດ ແລະ ກໍ່ສ້າງພັດທະນາກ້າວໜ້າ, ວັດທະນາຖາວອນ, ເພື່ອແນໃສ່ປົກປ້ອງໝາກຜົນຂອງການປະຕິວັດ ແລະ ແມ່ນພື້ນຖານເສີມຂະຫຍາຍການພົວພັນຮ່ວມມື ລາວ - ຫວຽດນາມ ເຂົ້າສູ່ລວງເລິກ, ສອງປະເທດພວກເຮົາໄດ້ພ້ອມກັນລົງນາມສົນທິສັນຍາ ແລະ ການຮ່ວມມື ຢູ່ນະຄອນຫຼວງວຽງຈັນ ໃນວັນທີ 18 ກໍລະກົດ 1977, ມາຮອດປັດຈຸບັນແມ່ນຄົບຮອບ 45 ປີ.
ສົນທິສັນຍານີ້ແມ່ນພື້ນຖານສຳຄັນໃຫ້ແກ່ການພົວພັນຮ່ວມມືຮອບດ້ານ, ເໝາະສົມກັບຫຼັກການສາກົນ, ສົນທິສັນຍາໄດ້ຮັບການຜັນຂະຫຍາຍເຂົ້າໃນຊີວິດຕົວຈິງ ແລະ ນັບມື້ນັບມີປະສິດທິຜົນ, ໄດ້ກາຍເປັນປັດໄຈໜູນຊ່ວຍສຳຄັນໃນການປົກປັກຮັກສາ ແລະ ສ້າງສາພັດທະນາ ຢູ່ສອງປະເທດ ຫວຽດາມ - ລາວ.
ທ່ານຮອງປະທານປະເທດ ລາວ ບຸນທອງ ຈິດມະນີ ຢັ້ງຢືນວ່າ: ພັກ, ລັດ ແລະ ປະຊາຊົນລາວ ພວກຂ້າພະເຈົ້າ ຍາມໃດກໍ່ຢຶດໝັ້ນ ແລະ ຖືເປັນຄວາມຮັບຜິດຊອບຂອງຕົນໃນການເສີມຂະຫຍາຍມູນເຊື້ອແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງລາວ - ຫວຽດນາມ ທີ່ໄດ້ຜ່ານການທົດສອບ ແລະ ເພີ່ມພູນຄູນສ້າງດ້ວຍເລືອດເນື້ອເຫື່ອໄຄຂອງບັນດານັກຮົບວິລະຊົນ ກໍ່ຄືປະຊາຊົນລາວ ແລະ ປະຊາຊົນ ຫວຽດນາມ ຫຼາຍລຸ່ນຄົນນັ້ນ ໃຫ້ຍືນຍົງຄົງຕົວໄປຈົນເທົ່າກາລະນານ, ນຳເອົາຜົນປະໂຫຍດທີ່ແທດຈິງ ແລະ ສູງສຸດມາສູ່ປະຊາຊົນສອງຊາດ, ສົມກັບເປັນບົດກະວີຂອງ ທ່ານ ປະທານ ໄກສອນ ພົມວິຫານ: ພູຍັງອາດມີເຈື່ອນ, ແມ່ນໍ້າຍັງອາດມີເຫືອດແຫ້ງ, ແຕ່ສາຍພົວພັນມິດຕະພາບ ລາວ - ຫວຽດນາມ ຈະຫມັ້ນຄົງຂະຫນົງແກ່ນຊົ່ວກາລະນານ” ແລະ ບົດກະວີຂອງ ປະທານ ໂຮ່ຈີມິນ: “ຮັກຫອມກັນຫມາຍຫມັ້ນ ຫລາຍສັນພູກໍ່ປີນໄຕ່/ຫລາຍນ້ຳໃຫ່ຍ ແລະ ໂຄກຄ້ອຍ ຂວາງກັນກໍ່ດຸ່ງໄປ/ສອງຊາດຫວຽດ-ລາວໄດ້/ຝັງຄວາມຮັກຢູ່ໃນໃຈ/ຮົ່ງຮ່າທັງແມ່ຂອງບໍ່ເລິກປຸນປານໄດ້”.
ບຸນຄົງ
