 |
ອີຢູ ສະໜັບສະໜູນ ສປປ ລາວ ເຊື່ອມໂຍງດ້ານການຄ້າກັບອາຊຽນ
ພິທີເປີດໂຄງການ ARISE Plus-ສປປ ລາວ ໄດ້ຈັດຂຶ້ນໃນວັນທີ 9 ສິງຫາ 2019 ທີ່ໂຮງແຮມຄຣາວພາຊາ ນະຄອນຫລວງວຽງຈັນ ໂດຍມີຈຸດປະສົງເ ພື່ອສົ່ງເສີມ ການຂະຫຍາຍຕົວ ທາງດ້ານເສດ ຖະກິດລວມ, ການເພີ່ມທະວີ ຄວາມຕ້ານທານ ກັບການປ່ຽນແປງ ຂອງດິນຟ້າອາກາດ, ການຫລຸດຜ່ອນຄວາມສ່ຽງ ແລະ ການສ້າງວຽກເຮັດງານທຳໃນ ສປປ ລາວ. ນອກຈາກນີ້, ປັບປຸງ ສະພາບແວດລ້ອມ ແຫ່ງການດຳເນີນ ທຸລະກິດ ໃນຂະແໜງການ ເປົ້າໝາຍ ໂດຍສຸມໃສ່ ການເຊື່ອມໂຍງ ເສດຖະກິດພາກພື້ນ (ອາຊຽນ) ເພື່ອເພີ່ມທະວີການຄ້າ ແລະ ການມີສ່ວນຮ່ວມ ໃນຕ່ອງໂສ້ ທົ່ວໂລກ ໃນຂະແໜງການເປົ້າໝາຍ.
ທ່ານ ສົມຈິດ ອິນທາມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ໂຄງການດັ່ງກ່າວ ຈະສະໜັບສະໜູນ ຄວາມສາມາດ ໃນການສົ່ງອອກ ຂອງ ສປປ ລາວ ແລະ ການເຊື່ອມໂຍງ ເຂົ້າໃນຕ່ອງໂສ້ ມູນຄ່າທົ່ວໂລກ ໂດຍການສົ່ງເສີມການຄ້າ ແລະ ນຳໃຊ້ທ່າແຮງ ຂອງສອງຂະແໜງການ ທີ່ຖືກຄັດເລືອກ ໂດຍສະເພາະ ການປຸງແຕ່ງໄມ້ ແລະ ກະສິກຳແບບສະເພາະ ເຊິ່ງຈະຊ່ວຍໃຫ້ ຜູ້ປະກອບການ ພາກເອກະຊົນລາວ ໂດຍສະເພາະ ວິສາຫະກິດ ຂະໜາກນ້ອຍ ແລະ ຂະໜາດກາງ ເພີ່ມຄວາມຮັບຮູ້ ກ່ຽວກັບສິດທິພິເສດ ທາງດ້ານການຄ້າຂອງຕົນ ລວມເຖິງວິທີການຄ້າເພື່ອໃຫ້ໄດ້ດີ ແລະ ຫລາຍຂຶ້ນ ກັບຄູ່ຄ້າໃນ ສະຫະພາບເອີຣົບ.
ທ່ານ ເນເວັນ ມິມິຊາ ຄະນະກຳມາທິການ ສະຫະພາບເອີຣົບ ເພື່ອການຮ່ວມມືສາກົນ ແລະ ການພັດທະນາສາກົນ ຂອງສະຫະພາບເອີຣົບ ໄດ້ກ່າວວ່າ: ປັດຈຸບັນ ອີຢູ ແມ່ນຄູ່ຮ່ວມມືການຄ້າໃຫຍ່ເປັນອັນດັບ 4 ຂອງ ສປປ ລາວ ເຊິ່ງອີຢູ ມີຄວາມຕັ້ງໃຈສະໜັບສະໜູນ ສປປ ລາວ ໃນການຍາດແຍ່ງຜົນປະໂຫຍດຈາກການເປັນປະເທດສະມາຊິກ ຂອງອົງການການຄ້າໂລກ ເພື່ອເກັບກ່ຽວຜົນປະໂຫຍດຈາກການເຂົ້າເຖິງຕະຫລາດໂລກໂດຍກົງ. ພ້ອມກັນນີ້ ອີຢູ ຍັງໄດ້ເພີ່ມທະວີກັບພາກພື້ນ ໃນການເຊື່ອມໂຍງເສດຖະກິດອາຊຽນ ໂດຍສະເພາະກ່ຽວກັບສັນຍາການຄ້າອາຊຽນ ແລະ ຄຳໝັ້ນສັນຍາອື່ນໆ ພາຍໃຕ້.
（ແຫຼ່ງຂໍ້ມູນ： ຂປລ）
