ລັດຖະບານ ລາວ ຊີ້ນຳແຜນພັດທະນາພູພຽງ ບໍລະເວນ ຕ້ອງກວມລວມຫລາຍເຂດ

ພູພຽງ ບໍລະເວນ. (ພາບ:dulichvietnam.com.vn)

ລັດຖະບານ ໄດ້ຊີ້ນໍາໃຫ້ສະຖາບັນຄົ້ນຄວ້າ ເສດຖະກິດແຫ່ງຊາດ ປັບປຸງຕື່ມແຜນພັດທະ ນາພູພຽງບໍລະເວນ ຕາມການປະກອບຄໍາຄິດ ຄໍາເຫັນ ຂອງສະມາຊິກລັດຖະບານ ໃຫ້ເປັນລັກສະນະກວມລວມຫລາຍຂົງເຂດ ແລະ ກົມກືນກັບທຳມະຊາດ ເປັນຕົ້ນແມ່ນ: ຮັບປະກັນບໍ່ໃຫ້ທຳລາຍທຳມະຊາດ, ການພັດທະນາ ໃຫ້ເນັ້ນໃສ່ ກະສິກຳແບບນິເວດ, ປູກພືດປອດສານພິດ, ອຸດສາຫະປຸງແຕ່ງກະ ສິກຳປອດສານພິດ, ການທ່ອງທ່ຽວທຳມະຊາດ ແລະ ການທ່ອງທ່ຽວ ຕິດພັນກັບ ການເຮັດກະສິກຳ, ການພັດທະນາອະສັງຫາລິມະຊັບ ແລະ ສົ່ງເສີມການປູກກາເຟ.

ແຜນພັດທະນາແບບກວມລວມ ເຂດພູພຽງບໍລະເວນ ໂດ້ຖືກນຳເຂົ້າພິຈາລະນາ ແລະ ຮັບຮອງພຽງດ້ານຫລັກການ ໃນກອງປະຊຸມລັດຖະບານ ສະໄໝສາມັນ ປະຈໍາເດືອນ ສິງຫາ 2019 ທີ່ຜ່ານມາ, ແຕ່ຍັງມີບາງເນື້ອໃນ ທີ່ຍັງບໍ່ທັນຮັບປະກັນໃຫ້ເປັນແຜນ ທີ່ສາມາດຈັດຕັ້ງປະຕິບັດໄດ້. ສະນັ້ນ, ລັດຖະບານ ຈຶ່ງໄດ້ຢ້ຳໃຫ້ກວດກາ ໃຈ້ແຍກ ແລະ ກຳນົດດິນຂອງລັດ ທີ່ສາມາດພັດທະນາໄດ້ໂລດ ແລະ ໃຫ້ມີການອອກແບບລະອຽດ, ການປຸກສ້າງເຮືອນຊານແມ່ນ ໃຫ້ຮັກສາລັກສະນະຊາດ, ເຜົ່າ ເພື່ອເປັນການດຶງດູດ ແລະ ສົ່ງເສີມໃຫ້ພາກທຸລະກິດທັງພາຍໃນ ແລະ ຕ່າງປະເທດ ເຂົ້າມາລົງທຶນໃນເຂດພູພຽງພໍລິເວນ. ໃນຂະນະດຽວກັນ, ກໍໄດ້ຫ້າມເດັດຂາດບໍ່ໃຫ້ມີ ການຂຸດບໍ່ແຮ່ຢູ່ເຂດດັ່ງ ກ່າວ. ສໍາລັບການຈັດຕັ້ງຄຸ້ມຄອງ ແມ່ນໃຫ້ຈັດຕັ້ງກະທັດຮັດ ໂດຍເຮັດໃຫ້ທ້ອງຖິ່ນທີ່ກ່ຽວຂ້ອງ ມີສ່ວນຮ່ວມ.

（ແຫຼ່ງ​ຂໍ້​ມູນ​： ຂປລ）